৪. ঘটীকাৰসুত্তং

১০৫. একমন্তং ঠিতো খো ঘটীকাৰো দেৱপুত্তো ভগৱতো সন্তিকে ইমং গাথং অভাসি –

‘‘অৱিহং উপপন্নাসে, ৱিমুত্তা সত্ত ভিক্খৱো;

ৰাগদোসপৰিক্খীণা, তিণ্ণা লোকে ৱিসত্তিক’’ন্তি.

‘‘কে চ তে অতৰুং পঙ্কং, মচ্চুধেয্যং সুদুত্তৰং;

কে হিত্ৱা মানুসং দেহং, দিব্বযোগং উপচ্চগু’’ন্তি.

‘‘উপকো পলগণ্ডো [ফলগণ্ডো (ক.)] চ, পুক্কুসাতি চ তে তযো;

ভদ্দিযো খণ্ডদেৱো চ, বাহুৰগ্গি চ সঙ্গিযো [বাহুদন্তী চ পিঙ্গিযো (সী. স্যা.)];

তে হিত্ৱা মানুসং দেহং, দিব্বযোগং উপচ্চগু’’ন্তি.

‘‘কুসলী ভাসসী তেসং, মাৰপাসপ্পহাযিনং;

কস্স তে ধম্মমঞ্ঞায, অচ্ছিদুং ভৱবন্ধন’’ন্তি.

‘‘ন অঞ্ঞত্ৰ ভগৱতা, নাঞ্ঞত্ৰ তৱ সাসনা;

যস্স তে ধম্মমঞ্ঞায, অচ্ছিদুং ভৱবন্ধনং.

‘‘যত্থ নামঞ্চ ৰূপঞ্চ, অসেসং উপৰুজ্ঝতি;

তং তে ধম্মং ইধঞ্ঞায, অচ্ছিদুং ভৱবন্ধন’’ন্তি.

‘‘গম্ভীৰং ভাসসী ৱাচং, দুব্বিজানং সুদুব্বুধং;

কস্স ত্ৱং ধম্মমঞ্ঞায, ৱাচং ভাসসি ঈদিস’’ন্তি.

‘‘কুম্ভকাৰো পুৰে আসিং, ৱেকড়িঙ্গে ঘটীকৰো;

মাতাপেত্তিভৰো আসিং, কস্সপস্স উপাসকো.

‘‘ৱিৰতো মেথুনা ধম্মা, ব্ৰহ্মচাৰী নিৰামিসো;

অহুৱা তে সগামেয্যো, অহুৱা তে পুৰে সখা.

‘‘সোহমেতে পজানামি, ৱিমুত্তে সত্ত ভিক্খৱো;

ৰাগদোসপৰিক্খীণে, তিণ্ণে লোকে ৱিসত্তিক’’ন্তি.

‘‘এৱমেতং তদা আসি, যথা ভাসসি ভগ্গৱ;

কুম্ভকাৰো পুৰে আসি, ৱেকড়িঙ্গে ঘটীকৰো.

‘‘মাতাপেত্তিভৰো আসি, কস্সপস্স উপাসকো;

ৱিৰতো মেথুনা ধম্মা, ব্ৰহ্মচাৰী নিৰামিসো;

অহুৱা মে সগামেয্যো, অহুৱা মে পুৰে সখা’’তি.

‘‘এৱমেতং পুৰাণানং, সহাযানং অহু সঙ্গমো;

উভিন্নং ভাৱিতত্তানং, সৰীৰন্তিমধাৰিন’’ন্তি.