১০. নানাতিত্থিযসাৱকসুত্তং

১১১. এৱং মে সুতং – একং সমযং ভগৱা ৰাজগহে ৱিহৰতি ৱেড়ুৱনে কলন্দকনিৱাপে. অথ খো সম্বহুলা নানাতিত্থিযসাৱকা দেৱপুত্তা অসমো চ সহলি [সহলী (সী. স্যা. কং. পী.)] চ নীকো [নিঙ্কো (সী. পী.), নিকো (স্যা. কং.)] চ আকোটকো চ ৱেগব্ভৰি চ [ৱেটম্বৰী চ (সী. স্যা. কং. পী.)] মাণৱগামিযো চ অভিক্কন্তায ৰত্তিযা অভিক্কন্তৱণ্ণা কেৱলকপ্পং ৱেড়ুৱনং ওভাসেত্ৱা যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠংসু. একমন্তং ঠিতো খো অসমো দেৱপুত্তো পূৰণং কস্সপং আৰব্ভ ভগৱতো সন্তিকে ইমং গাথং অভাসি –

‘‘ইধ ছিন্দিতমাৰিতে, হতজানীসু কস্সপো;

ন পাপং সমনুপস্সতি, পুঞ্ঞং ৱা পন অত্তনো;

স ৱে ৱিস্সাসমাচিক্খি, সত্থা অৰহতি মানন’’ন্তি.

অথ খো সহলি দেৱপুত্তো মক্খলিং গোসালং আৰব্ভ ভগৱতো সন্তিকে ইমং গাথং অভাসি –

‘‘তপোজিগুচ্ছায সুসংৱুতত্তো,

ৱাচং পহায কলহং জনেন;

সমোসৱজ্জা ৱিৰতো সচ্চৱাদী,

ন হি নূন তাদিসং কৰোতি [ন হ নুন তাদী পকৰোতি (সী. স্যা. কং.)] পাপ’’ন্তি.

অথ খো নীকো দেৱপুত্তো নিগণ্ঠং নাটপুত্তং [নাথপুত্তং (সী.)] আৰব্ভ ভগৱতো সন্তিকে ইমং গাথং অভাসি –

‘‘জেগুচ্ছী নিপকো ভিক্খু, চাতুযামসুসংৱুতো;

দিট্ঠং সুতঞ্চ আচিক্খং, ন হি নূন কিব্বিসী সিযা’’তি.

অথ খো আকোটকো দেৱপুত্তো নানাতিত্থিযে আৰব্ভ ভগৱতো সন্তিকে ইমং গাথং অভাসি –

‘‘পকুধকো কাতিযানো নিগণ্ঠো,

যে চাপিমে মক্খলিপূৰণাসে;

গণস্স সত্থাৰো সামঞ্ঞপ্পত্তা,

ন হি নূন তে সপ্পুৰিসেহি দূৰে’’তি.

অথ খো ৱেগব্ভৰি দেৱপুত্তো আকোটকং দেৱপুত্তং গাথায পচ্চভাসি –

‘‘সহাচৰিতেন [সহাৰৱেনাপি (ক. সী.), সগাৰৱেনাপি (পী.)] ছৱো সিগালো [সিঙ্গালো (ক.)],

ন কোত্থুকো সীহসমো কদাচি;

নগ্গো মুসাৱাদী গণস্স সত্থা,

সঙ্কস্সৰাচাৰো ন সতং সৰিক্খো’’তি.

অথ খো মাৰো পাপিমা বেগব্ভৰিং দেৱপুত্তং অন্ৱাৱিসিত্ৱা ভগৱতো সন্তিকে ইমং গাথং অভাসি –

‘‘তপোজিগুচ্ছায আযুত্তা, পালযং পৱিৱেকিযং;

ৰূপে চ যে নিৱিট্ঠাসে, দেৱলোকাভিনন্দিনো;

তে ৱে সম্মানুসাসন্তি, পৰলোকায মাতিযা’’তি.

অথ খো ভগৱা, ‘মাৰো অযং পাপিমা’ ইতি ৱিদিত্ৱা, মাৰং পাপিমন্তং গাথায পচ্চভাসি –

‘‘যে কেচি ৰূপা ইধ ৱা হুৰং ৱা,

যে চন্তলিক্খস্মিং পভাসৱণ্ণা;

সব্বেৱ তে তে নমুচিপ্পসত্থা,

আমিসংৱ মচ্ছানং ৱধায খিত্তা’’তি.

অথ খো মাণৱগামিযো দেৱপুত্তো ভগৱন্তং আৰব্ভ ভগৱতো সন্তিকে ইমা গাথাযো অভাসি –

‘‘ৱিপুলো ৰাজগহীযানং, গিৰিসেট্ঠো পৱুচ্চতি;

সেতো হিমৱতং সেট্ঠো, আদিচ্চো অঘগামিনং.

‘‘সমুদ্দো উদধিনং সেট্ঠো, নক্খত্তানঞ্চ চন্দিমা [নক্খত্তানংৱ চন্দিমা (ক.)];

সদেৱকস্স লোকস্স, বুদ্ধো অগ্গো পৱুচ্চতী’’তি.

নানাতিত্থিযৱগ্গো ততিযো.

তস্সুদ্দানং –

সিৱো খেমো চ সেৰী চ, ঘটী জন্তু চ ৰোহিতো;

নন্দো নন্দিৱিসালো চ, সুসিমো নানাতিত্থিযেন তে দসাতি.

দেৱপুত্তসংযুত্তং সমত্তং.