৭. সমযসুত্তং

৩৭. এৱং মে সুতং – একং সমযং ভগৱা সক্কেসু ৱিহৰতি কপিলৱত্থুস্মিং মহাৱনে মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সব্বেহেৱ অৰহন্তেহি; দসহি চ লোকধাতূহি দেৱতা যেভুয্যেন সন্নিপতিতা হোন্তি ভগৱন্তং দস্সনায ভিক্খুসঙ্ঘঞ্চ. অথ খো চতুন্নং সুদ্ধাৱাসকাযিকানং দেৱতানং এতদহোসি – ‘‘অযং খো ভগৱা সক্কেসু ৱিহৰতি কপিলৱত্থুস্মিং মহাৱনে মহতা ভিক্খুসঙ্ঘেন সদ্ধিং পঞ্চমত্তেহি ভিক্খুসতেহি সব্বেহেৱ অৰহন্তেহি; দসহি চ লোকধাতূহি দেৱতা যেভুয্যেন সন্নিপতিতা হোন্তি ভগৱন্তং দস্সনায ভিক্খুসঙ্ঘঞ্চ. যংনূন মযম্পি যেন ভগৱা তেনুপসঙ্কমেয্যাম; উপসঙ্কমিত্ৱা ভগৱতো সন্তিকে পচ্চেকং গাথং [পচ্চেকগাথং (সী. স্যা. কং. পী.)] ভাসেয্যামা’’তি.

অথ খো তা দেৱতা – সেয্যথাপি নাম বলৱা পুৰিসো সমিঞ্জিতং ৱা বাহং পসাৰেয্য পসাৰিতং ৱা বাহং সমিঞ্জেয্য. এৱমেৱ – সুদ্ধাৱাসেসু দেৱেসু অন্তৰহিতা ভগৱতো পুৰতো পাতুৰহেসুং. অথ খো তা দেৱতা ভগৱন্তং অভিৱাদেত্ৱা একমন্তং অট্ঠংসু. একমন্তং ঠিতা খো একা দেৱতা ভগৱতো সন্তিকে ইমং গাথং অভাসি –

‘‘মহাসমযো পৱনস্মিং, দেৱকাযা সমাগতা;

আগতম্হ ইমং ধম্মসমযং, দক্খিতাযে অপৰাজিতসঙ্ঘ’’ন্তি.

অথ খো অপৰা দেৱতা ভগৱতো সন্তিকে ইমং গাথং অভাসি –

‘‘তত্ৰ ভিক্খৱো সমাদহংসু, চিত্তমত্তনো উজুকং অকংসু [উজুকমকংসু (সী. স্যা. কং. পী.)];

সাৰথীৱ নেত্তানি গহেত্ৱা, ইন্দ্ৰিযানি ৰক্খন্তি পণ্ডিতা’’তি.

অথ খো অপৰা দেৱতা ভগৱতো সন্তিকে ইমং গাথং অভাসি –

‘‘ছেত্ৱা খীলং ছেত্ৱা পলিঘং, ইন্দখীলং ঊহচ্চ মনেজা;

তে চৰন্তি সুদ্ধা ৱিমলা, চক্খুমতা সুদন্তা সুসুনাগা’’তি.

অথ খো অপৰা দেৱতা ভগৱতো সন্তিকে ইমং গাথং অভাসি –

‘‘যে কেচি বুদ্ধং সৰণং গতাসে, ন তে গমিস্সন্তি অপাযভূমিং;

পহায মানুসং দেহং, দেৱকাযং পৰিপূৰেস্সন্তী’’তি.