৮. সকলিকসুত্তং

৩৮. এৱং মে সুতং – একং সমযং ভগৱা ৰাজগহে ৱিহৰতি মদ্দকুচ্ছিস্মিং মিগদাযে. তেন খো পন সমযেন ভগৱতো পাদো সকলিকায [সক্খলিকায (ক.)] খতো হোতি. ভুসা সুদং ভগৱতো ৱেদনা ৱত্তন্তি সাৰীৰিকা ৱেদনা দুক্খা তিব্বা [তিপ্পা (সী. স্যা. কং. পী.)] খৰা কটুকা অসাতা অমনাপা; তা সুদং ভগৱা সতো সম্পজানো অধিৱাসেতি অৱিহঞ্ঞমানো. অথ খো ভগৱা চতুগ্গুণং সঙ্ঘাটিং পঞ্ঞাপেত্ৱা দক্খিণেন পস্সেন সীহসেয্যং কপ্পেতি পাদে পাদং অচ্চাধায সতো সম্পজানো.

অথ খো সত্তসতা সতুল্লপকাযিকা দেৱতাযো অভিক্কন্তায ৰত্তিযা অভিক্কন্তৱণ্ণা কেৱলকপ্পং মদ্দকুচ্ছিং ওভাসেত্ৱা যেন ভগৱা তেনুপসঙ্কমিংসু; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠংসু. একমন্তং ঠিতা খো একা দেৱতা ভগৱতো সন্তিকে ইমং উদানং উদানেসি – ‘‘নাগো ৱত, ভো, সমণো গোতমো; নাগৱতা চ সমুপ্পন্না সাৰীৰিকা ৱেদনা দুক্খা তিব্বা খৰা কটুকা অসাতা অমনাপা সতো সম্পজানো অধিৱাসেতি অৱিহঞ্ঞমানো’’তি.

অথ খো অপৰা দেৱতা ভগৱতো সন্তিকে ইমং উদানং উদানেসি – ‘‘সীহো ৱত, ভো, সমণো গোতমো; সীহৱতা চ সমুপ্পন্না সাৰীৰিকা ৱেদনা দুক্খা তিব্বা খৰা কটুকা অসাতা অমনাপা সতো সম্পজানো অধিৱাসেতি অৱিহঞ্ঞমানো’’তি.

অথ খো অপৰা দেৱতা ভগৱতো সন্তিকে ইমং উদানং উদানেসি – ‘‘আজানীযো ৱত, ভো, সমণো গোতমো; আজানীযৱতা চ সমুপ্পন্না সাৰীৰিকা ৱেদনা দুক্খা তিব্বা খৰা কটুকা অসাতা অমনাপা সতো সম্পজানো অধিৱাসেতি অৱিহঞ্ঞমানো’’তি.

অথ খো অপৰা দেৱতা ভগৱতো সন্তিকে ইমং উদানং উদানেসি – ‘‘নিসভো ৱত, ভো, সমণো গোতমো; নিসভৱতা চ সমুপ্পন্না সাৰীৰিকা ৱেদনা দুক্খা তিব্বা খৰা কটুকা অসাতা অমনাপা সতো সম্পজানো অধিৱাসেতি অৱিহঞ্ঞমানো’’তি.

অথ খো অপৰা দেৱতা ভগৱতো সন্তিকে ইমং উদানং উদানেসি – ‘‘ধোৰয্হো ৱত, ভো, সমণো গোতমো; ধোৰয্হৱতা চ সমুপ্পন্না সাৰীৰিকা ৱেদনা দুক্খা তিব্বা খৰা কটুকা অসাতা অমনাপা সতো সম্পজানো অধিৱাসেতি অৱিহঞ্ঞমানো’’তি.

অথ খো অপৰা দেৱতা ভগৱতো সন্তিকে ইমং উদানং উদানেসি – ‘‘দন্তো ৱত, ভো, সমণো গোতমো; দন্তৱতা চ সমুপ্পন্না সাৰীৰিকা ৱেদনা দুক্খা তিব্বা খৰা কটুকা অসাতা অমনাপা সতো সম্পজানো অধিৱাসেতি অৱিহঞ্ঞমানো’’তি.

অথ খো অপৰা দেৱতা ভগৱতো সন্তিকে ইমং উদানং উদানেসি – ‘‘পস্স সমাধিং সুভাৱিতং চিত্তঞ্চ সুৱিমুত্তং, ন চাভিনতং ন চাপনতং ন চ সসঙ্খাৰনিগ্গয্হৱাৰিতগতং [সসঙ্খাৰনিগ্গয্হৱাৰিতৱতং (সী. স্যা. কং. পী.), সসঙ্খাৰনিগ্গয্হৱাৰিৱাৱতং (ক.)]. যো এৱৰূপং পুৰিসনাগং পুৰিসসীহং পুৰিসআজানীযং পুৰিসনিসভং পুৰিসধোৰয্হং পুৰিসদন্তং অতিক্কমিতব্বং মঞ্ঞেয্য কিমঞ্ঞত্ৰ অদস্সনা’’তি.

‘‘পঞ্চৱেদা সতং সমং, তপস্সী ব্ৰাহ্মণা চৰং;

চিত্তঞ্চ নেসং ন সম্মা ৱিমুত্তং, হীনত্থৰূপা ন পাৰঙ্গমা তে.

‘‘তণ্হাধিপন্না ৱতসীলবদ্ধা, লূখং তপং ৱস্সসতং চৰন্তা;

চিত্তঞ্চ নেসং ন সম্মা ৱিমুত্তং, হীনত্থৰূপা ন পাৰঙ্গমা তে.

‘‘ন মানকামস্স দমো ইধত্থি, ন মোনমত্থি অসমাহিতস্স;

একো অৰঞ্ঞে ৱিহৰং পমত্তো, ন মচ্চুধেয্যস্স তৰেয্য পাৰ’’ন্তি.

‘‘মানং পহায সুসমাহিতত্তো, সুচেতসো সব্বধি ৱিপ্পমুত্তো;

একো অৰঞ্ঞে ৱিহৰমপ্পমত্তো, স মচ্চুধেয্যস্স তৰেয্য পাৰ’’ন্তি.