২. নিমোক্খসুত্তং

২. সাৱত্থিনিদানং. অথ খো অঞ্ঞতৰা দেৱতা অভিক্কন্তায ৰত্তিযা অভিক্কন্তৱণ্ণা কেৱলকপ্পং জেতৱনং ওভাসেত্ৱা যেন ভগৱা তেনুপসঙ্কমি; উপসঙ্কমিত্ৱা ভগৱন্তং অভিৱাদেত্ৱা একমন্তং অট্ঠাসি. একমন্তং ঠিতা খো সা দেৱতা ভগৱন্তং এতদৱোচ –

‘‘জানাসি নো ত্ৱং, মাৰিস, সত্তানং নিমোক্খং পমোক্খং ৱিৱেক’’ন্তি?

‘‘জানামি খ্ৱাহং, আৱুসো, সত্তানং নিমোক্খং পমোক্খং ৱিৱেক’’ন্তি.

‘‘যথা কথং পন ত্ৱং, মাৰিস, জানাসি সত্তানং নিমোক্খং পমোক্খং ৱিৱেক’’ন্তি?

‘‘নন্দীভৱপৰিক্খযা [নন্দিভৱপৰিক্খযা (স্যা. কং.)], সঞ্ঞাৱিঞ্ঞাণসঙ্খযা, ৱেদনানং নিৰোধা উপসমা – এৱং খ্ৱাহং, আৱুসো, জানামি সত্তানং নিমোক্খং পমোক্খং ৱিৱেক’’ন্তি.