৮. পঠমকুণ্ডলীৱিমানৱণ্ণনা

অলঙ্কতো মল্যধৰো সুৱত্থোতি কুণ্ডলীৱিমানং. তস্স কা উপত্তি? ভগৱা সাৱত্থিযং ৱিহৰতি জেতৱনে. তেন সমযেন দ্ৱে অগ্গসাৱকা সপৰিৱাৰা কাসীসু চাৰিকং চৰন্তা সূৰিযত্থঙ্গমনৱেলাযং অঞ্ঞতৰং ৱিহাৰং পাপুণিংসু. তং পৱত্তিং সুত্ৱা তস্স ৱিহাৰস্স গোচৰগামে অঞ্ঞতৰো উপাসকো থেৰে উপসঙ্কমিত্ৱা ৱন্দিত্ৱা পাদধোৱনং পাদব্ভঞ্জনতেলং মঞ্চপীঠং পচ্চত্থৰণং পদীপিযঞ্চ উপনেত্ৱা স্ৱাতনায চ নিমন্তেত্ৱা দুতিযদিৱসে মহাদানং পৱত্তেসি, থেৰা তস্স অনুমোদনং ৱত্ৱা পক্কমিংসু. সো অপৰেন সমযেন কালং কত্ৱা তাৱতিংসেসু দ্ৱাদসযোজনিকে কনকৱিমানে নিব্বত্তি. তং আযস্মা মহামোগ্গল্লানত্থেৰো ইমাহি গাথাহি পটিপুচ্ছি –

১০৯৪. ‘‘অলঙ্কতো মল্যধৰো সুৱত্থো, সুকুণ্ডলী কপ্পিতকেসমস্সু;

আমুত্তহত্থাভৰণো যসস্সী, দিব্বে ৱিমানম্হি যথাপি চন্দিমা.

১০৯৫. ‘‘দিব্বা চ ৱীণা পৱদন্তি ৱগ্গুং, অট্ঠট্ঠকা সিক্খিতা সাধুৰূপা;

দিব্বা চ কঞ্ঞা তিদসচৰা উড়াৰা, নচ্চন্তি গাযন্তি পমোদযন্তি.

১০৯৬. ‘‘দেৱিদ্ধিপত্তোসি মহানুভাৱো…পে…

ৱণ্ণো চ তে সব্বদিসা পভাসতী’’তি.

সোপি তস্স ইমাহি গাথাহি ব্যাকাসি –

১০৯৭. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১০৯৮. ‘‘অহং মনুস্সেসু মনুস্সভূতো, দিস্ৱান সমণে সীলৱন্তে;

সম্পন্নৱিজ্জাচৰণে যসস্সী, বহুস্সুতে তণ্হক্খযূপপন্নে;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১০৯৯. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি.

১০৯৪. তত্থ সুকুণ্ডলীতি সুন্দৰেহি কুণ্ডলেহি অলঙ্কতকণ্ণো. ‘‘সকুণ্ডলী’’তিপি পাঠো, সদিসং কুণ্ডলং সকুণ্ডলং, তং অস্স অত্থীতি সকুণ্ডলী, যুত্তকুণ্ডলী অঞ্ঞমঞ্ঞঞ্চ তুয্হঞ্চ অনুচ্ছৱিককুণ্ডলীতি অত্থো. কপ্পিতকেসমস্সূতি সম্মাকপ্পিতকেসমস্সু. আমুত্তহত্থাভৰণোতি পটিমুক্কঅঙ্গুলিযাদিহত্থাভৰণো.

১০৯৮. তণ্হক্খযূপপন্নেতি তণ্হক্খযং অৰহত্তং, নিব্বানমেৱ ৱা উপগতে, অধিগতৱন্তেতি অত্থো. সেসং ৱুত্তনযমেৱ.

পঠমকুণ্ডলীৱিমানৱণ্ণনা নিট্ঠিতা.