৭. যৱপালকৱিমানৱণ্ণনা

উচ্চমিদং মণিথূণং ৱিমানন্তি যৱপালকৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন ৰাজগহে অঞ্ঞতৰো দুগ্গতদাৰকো যৱখেত্তং ৰক্খতি. সো একদিৱসং পাতৰাসত্থায কুম্মাসং লভিত্ৱা ‘‘খেত্তং গন্ত্ৱা ভুঞ্জিস্সামী’’তি তং কুম্মাসং গহেত্ৱা যৱখেত্তং গন্ত্ৱা ৰুক্খমূলে নিসীদি. তস্মিং খণে অঞ্ঞতৰো খীণাসৱত্থেৰো মগ্গপ্পটিপন্নো উপকট্ঠে কালে তং ঠানং পত্ৱা যৱপালকেন নিসিন্নং ৰুক্খমূলং উপসঙ্কমি. যৱপালকো ৱেলং ওলোকেত্ৱা ‘‘কচ্চি, ভন্তে, আহাৰো লদ্ধো’’তি আহ. থেৰো তুণ্হী অহোসি. সো অলদ্ধভাৱং ঞত্ৱা ‘‘ভন্তে, উপকট্ঠা ৱেলা, পিণ্ডায চৰিত্ৱা ভুঞ্জিতুং ন সক্কা, ময্হং অনুকম্পায ইমং কুম্মাসং পৰিভুঞ্জথা’’তি ৱত্ৱা থেৰস্স তং কুম্মাসং অদাসি. থেৰো তং অনুকম্পন্তো তস্স পস্সন্তস্সেৱ তং পৰিভুঞ্জিত্ৱা অনুমোদনং ৱত্ৱা পক্কামি. সোপি দাৰকো ‘‘সুদিন্নং ৱত মযা ঈদিসস্স কুম্মাসদানং দদন্তেনা’’তি চিত্তং পসাদেত্ৱা অপৰভাগে কালং কত্ৱা তাৱতিংসভৱনে ৱুত্তনযেনেৱ ৱিমানে নিব্বত্তি. তং আযস্মা মহামোগ্গল্লানত্থেৰো ইমাহি গাথাহি পটিপুচ্ছি –

১০৮৭. ‘‘উচ্চমিদং মণিথূণং ৱিমানং…পে…

ৱণ্ণো চ তে সব্বদিসা পভাসতী’’তি.

সোপি তস্স ইমাহি গাথাহি ব্যাকাসি –

১০৮৯. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১০৯০. ‘‘অহং মনুস্সেসু মনুস্সভূতো, অহোসিং যৱপালকো;

অদ্দসং ৱিৰজং ভিক্খুং, ৱিপ্পসন্নমনাৱিলং.

১০৯১. ‘‘তস্স অদাসহং ভাগং, পসন্নো সেহি পাণিভি;

কুম্মাসপিণ্ডং দত্ৱান, মোদামি নন্দনে ৱনে.

১০৯২. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি.

তত্থ গাথাসুপি অপুব্বং নত্থি.

যৱপালকৱিমানৱণ্ণনা নিট্ঠিতা.