৬. ভিক্খাদাযকৱিমানৱণ্ণনা

উচ্চমিদং মণিথূণং ৱিমানন্তি ভিক্খাদাযকৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন অঞ্ঞতৰো ভিক্খু অদ্ধানমগ্গপটিপন্নো অঞ্ঞতৰং গামং পিণ্ডায পৱিট্ঠো একস্স ঘৰদ্ধাৰে অট্ঠাসি. তত্থ অঞ্ঞতৰো পুৰিসো ধোতহত্থপাদো ‘‘ভুঞ্জিস্সামী’’তি নিসিন্নো ভোজনং উপনেত্ৱা পাতিযা পক্খিত্তে তং ভিক্খুং দিস্ৱা পাতিযা ভত্তং তস্স ভিক্খুনো পত্তে আকিৰন্তো তেন ‘‘একদেসমেৱ দেহী’’তি ৱুত্তোপি সব্বমেৱ আকিৰি. সো ভিক্খু অনুমোদনং ৱত্ৱা পক্কামি. সো পুৰিসো ‘‘ছাতজ্ঝত্তস্স ভিক্খুনো মযা অভুঞ্জিত্ৱা ভত্তং দিন্ন’’ন্তি অনুস্সৰন্তো উড়াৰং পীতিসোমনস্সং পটিলভি. সো অপৰভাগে কালং কত্ৱা তাৱতিংসেসু দ্ৱাদসযোজনিকে কনকৱিমানে নিব্বত্তি. তং আযস্মা মহামোগ্গল্লানত্থেৰো দেৱচাৰিকং চৰন্তো মহতিযা দেৱিদ্ধিযা ৱিৰোচমানং দিস্ৱা ইমাহি গাথাহি পটিপুচ্ছি –

১০৮১. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১০৮২. ‘‘দেৱিদ্ধিপত্তোসি মহানুভাৱো…পে…

ৱণ্ণো চ তে সব্বদিসা পভাসতী’’তি.

সোপি তস্স ইমাহি গাথাহি ব্যাকাসি –

১০৮৩. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১০৮৪. ‘‘অহং মনুস্সেসু মনুস্সভূতো, দিস্ৱান ভিক্খুং তসিতং কিলন্তং;

একাহং ভিক্খং পটিপাদযিস্সং, সমঙ্গি ভত্তেন তদা অকাসিং.

১০৮৫. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

১০৮৪. তত্থ একাহং ভিক্খন্তি একং অহং ভিক্খামত্তং, একং ভত্তৱড্ঢিতকন্তি অত্থো. পটিপাদযিস্সন্তি পটিপাদেসিং অদাসিং. সমঙ্গি ভত্তেনাতি ভত্তেন সমঙ্গীভূতং, লদ্ধভিক্খন্তি অত্থো. এৱং মহাথেৰো তেন দেৱপুত্তেন অত্তনো সুচৰিতকম্মে পকাসিতে সপৰিৱাৰস্স তস্স ধম্মং দেসেত্ৱা মনুস্সলোকমাগতো, তং পৱত্তিং সম্মাসম্বুদ্ধস্স কথেসি. সত্থা তং অট্ঠুপ্পত্তিং কত্ৱা সম্পত্তমহাজনস্স ধম্মং দেসেসি. সা দেসনা মহাজনস্স সাত্থিকা অহোসীতি.

ভিক্খাদাযকৱিমানৱণ্ণনা নিট্ঠিতা.