৩. ফলদাযকৱিমানৱণ্ণনা

উচ্চমিদং মণিথূণন্তি ফলদাযকৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন ৰঞ্ঞো বিম্বিসাৰস্স অকালে অম্বফলানি পৰিভুঞ্জিতুং ইচ্ছা উপ্পজ্জি. সো আৰামপালং আহ – ‘‘ময্হং খো, ভণে, অম্বফলেসু ইচ্ছা উপ্পন্না, তস্মা অম্বানি মে আনেত্ৱা দেহী’’তি. ‘‘দেৱ, নত্থি অম্বেসু অম্বফলং, অপিচাহং তথা কৰোমি, সচে দেৱো কিঞ্চি কালং আগমেতি, যথা অম্বা ন চিৰস্সেৱ ফলং গণ্হন্তী’’তি. ‘‘সাধু, ভণে, তথা কৰোহী’’তি. আৰামপালো আৰামং গন্ত্ৱা অম্বৰুক্খমূলেসু পংসুং অপনেত্ৱা তাদিসং পংসুং আকিৰি, তাদিসঞ্চ উদকং আসিঞ্চি, যথা ন চিৰস্সেৱ অম্বৰুক্খা সচ্ছিন্নপত্তা অহেসুং. অথ নং পংসুং অপনেত্ৱা ফাৰুসককসটমিস্সকং পাকতিকং পংসুং আকিৰিত্ৱা সাধুকং উদকং অদাসি. তদা অম্বৰুক্খা ন চিৰেনেৱ কোৰকিতা পল্লৱিতা কুটমলকজাতা হুত্ৱা পুপ্ফিংসু, অথ সলাটুকজাতা হুত্ৱা ফলানি গণ্হিংসু. তত্থেকস্মিং অম্বৰুক্খে পঠমতৰং চত্তাৰি ফলানি মনোসিলাচুণ্ণপিঞ্জৰৱণ্ণানি সম্পন্নগন্ধৰসানি পৰিণতানি অহেসুং.

সো তানি গহেত্ৱা ‘‘ৰঞ্ঞো দস্সামী’’তি গচ্ছন্তো অন্তৰামগ্গে আযস্মন্তং মহামোগ্গল্লানং পিণ্ডায চৰমানং দিস্ৱা চিন্তেসি ‘‘ইমানি অম্বানি অগ্গফলভূতানি ইমস্স অয্যস্স দস্সামি, কামং মং ৰাজা হনতু ৱা পব্বাজেতু ৱা, ৰঞ্ঞো হি দিন্নে দিট্ঠধম্মে পূজামত্তং অপ্পমত্তকং ফলং, অয্যস্স দিন্নে পন দিট্ঠধম্মিকম্পি সম্পৰাযিকম্পি অপৰিমাণং ফলং ভৱিস্সতী’’তি. এৱং পন চিন্তেত্ৱা তানি ফলানি থেৰস্স দত্ৱা ৰাজানং উপসঙ্কমিত্ৱা ৰঞ্ঞো তমত্থং আৰোচেসি. তং সুত্ৱা ৰাজা ৰাজপুৰিসে আণাপেসি ‘‘ৱীমংসথ তাৱ, ভণে, যথাযং আহা’’তি. থেৰো পন তানি ফলানি ভগৱতো উপনামেসি. ভগৱা তেসু একং সাৰিপুত্তত্থেৰস্স, একং মহামোগ্গল্লানত্থেৰস্স, একং মহাকস্সপত্থেৰস্স দত্ৱা একং অত্তনা পৰিভুঞ্জি. পুৰিসা তং পৱত্তিং ৰঞ্ঞো আৰোচেসুং.

ৰাজা তং সুত্ৱা ‘‘ধীৰো ৱতাযং পুৰিসো, যো অত্তনো জীৱিতম্পি পৰিচ্চজিত্ৱা পুঞ্ঞপসুতো অহোসি, অত্তনো পৰিস্সমঞ্চ ঠানগতমেৱ অকাসী’’তি তুট্ঠচিত্তো তস্স একং গামৱৰং ৱত্থালঙ্কাৰাদীনি চ দত্ৱা ‘‘যং তযা ভণে অম্বফলদানেন পুঞ্ঞং পসুতং, ততো মে পত্তিং দেহী’’তি আহ. সো ‘‘দেমি, দেৱ, যথাসুখং পত্তিং গণ্হাহী’’তি অৱোচ. আৰামপালো অপৰভাগে কালং কত্ৱা তাৱতিংসেসু উপ্পজ্জি, তস্স সোড়সযোজনিকং কনকৱিমানং নিব্বত্তি সত্তসতকূটাগাৰপটিমণ্ডিতং. তং দিস্ৱা আযস্মা মহামোগ্গল্লানো পুচ্ছি –

১০৬০. ‘‘উচ্চমিদং মণিথূণং ৱিমানং, সমন্ততো সোড়স যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১০৬১. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

অট্ঠট্ঠকা সিক্খিতা সাধুৰূপা, দিব্বা চ কঞ্ঞা তিদসচৰা উড়াৰা;

নচ্চন্তি গাযন্তি পমোদযন্তি.

১০৬২. ‘‘দেৱিদ্ধিপত্তোসি মহানুভাৱো…পে…

ৱণ্ণো চ তে সব্বদিসা পভাসতী’’তি.

১০৬৩. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১০৬৪. ‘‘ফলদাযী ফলং ৱিপুলং লভতি, দদমুজুগতেসু পসন্নমানসো;

সো হি পমোদতি সগ্গগতো তিদিৱে, অনুভোতি চ পুঞ্ঞফলং ৱিপুলং.

১০৬৫. ‘‘তৱেৱাহং মহামুনি, অদাসিং চতুৰো ফলে.

১০৬৬. ‘‘তস্মা হি ফলং অলমেৱ দাতুং, নিচ্চং মনুস্সেন সুখত্থিকেন;

দিব্বানি ৱা পত্থযতা সুখানি, মনুস্সসোভগ্গতমিচ্ছতা ৱা.

১০৬৭. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি. – সোপিস্স ব্যাকাসি;

১০৬১. তত্থ অট্ঠট্ঠকাতি একেকস্মিং কূটাগাৰে অট্ঠট্ঠকা চতুসট্ঠিপৰিমাণা. সাধুৰূপাতি ৰূপসম্পত্তিযা চ সীলাচাৰসম্পত্তিযা চ সিক্খাসম্পত্তিযা চ সুন্দৰসভাৱা. দিব্বা চ কঞ্ঞাতি দেৱচ্ছৰাযো. তিদসচৰাতি তিদসেসু সুখাচাৰা সুখৱিহাৰিনিযো. উড়াৰাতি উড়াৰৱিভৱা.

১০৬৪. ফলদাযীতি অত্তনা অম্বফলস্স দিন্নত্তা অত্তানং সন্ধায ৱদতি. ফলন্তি পুঞ্ঞফলং. ৱিপুলন্তি মহন্তং লভতি মনুস্সলোকে পতিট্ঠিতোতি অধিপ্পাযো. দদন্তি দদন্তো দানহেতু. উজুগতেসূতি উজুপটিপন্নেসু. সগ্গগতোতি উপ্পজ্জনৱসেন সগ্গং গতো, তত্থাপি তিদিৱে তাৱতিংসভৱনে অনুভোতি চ পুঞ্ঞফলং ৱিপুলং যথাহং, এৱং অঞ্ঞোপীতি অত্থো.

১০৬৬. তস্মাতি যস্মা চতুন্নং ফলানং দানমত্তেন ঈদিসী সম্পত্তি অধিগতা, তস্মা. অলমেৱ যুত্তমেৱ. নিচ্চন্তি সব্বকালং. দিব্বানীতি দেৱলোকপৰিযাপন্নানি. মনুস্সসোভগ্গতন্তি মনুস্সেসু সুভগভাৱং. সেসং ৱুত্তনযমেৱ.

ফলদাযকৱিমানৱণ্ণনা নিট্ঠিতা.