৪. পঠমউপস্সযদাযকৱিমানৱণ্ণনা

চন্দো যথা ৱিগতৱলাহকে নভেতি উপস্সযদাযকৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন অঞ্ঞতৰো ভিক্খু গামকাৱাসে ৱস্সং ৱসিত্ৱা ৱুত্থৱস্সো পৱাৰেত্ৱা ভগৱন্তং ৱন্দিতুং ৰাজগহং গচ্ছন্তো অন্তৰামগ্গে সাযং অঞ্ঞতৰং গামং পৱিসিত্ৱা ৱসনট্ঠানং পৰিযেসন্তো অঞ্ঞতৰং উপাসকং দিস্ৱা পুচ্ছি – ‘‘উপাসক, ইমস্মিং গামে অত্থি কিঞ্চি পব্বজিতানং ৱসনযোগ্গট্ঠান’’ন্তি. উপাসকো পসন্নচিত্তো গেহং গন্ত্ৱা ভৰিযায সদ্ধিং মন্তেত্ৱা থেৰস্স ৱসনযোগ্গং ঠানং পৰিচ্ছিন্দিত্ৱা তত্থ আসনং পঞ্ঞাপেত্ৱা পাদোদকং পাদপীঠং উপট্ঠপেত্ৱা থেৰং পৱেসেত্ৱা তস্মিং পাদে ধোৱন্তে পদীপং উজ্জালেত্ৱা মঞ্চে পচ্চত্থৰণানি পঞ্ঞাপেত্ৱা অদাসি. স্ৱাতনায চ নিমন্তেত্ৱা থেৰস্স দুতিযদিৱসে ভোজেত্ৱা পানকত্থায গুড়পিণ্ডঞ্চ দত্ৱা থেৰং গচ্ছন্তং অনুগন্ত্ৱা নিৱত্তি. সো অপৰেন সমযেন সহ ভৰিযায কালং কত্ৱা তাৱতিংসভৱনে দ্ৱাদসযোজনিকে কনকৱিমানে নিব্বত্তি. তং আযস্মা মহামোগ্গল্লানো দ্ৱীহি গাথাহি পটিপুচ্ছি –

১০৬৯. ‘‘চন্দো যথা ৱিগতৱলাহকে নভে, ওভাসযং গচ্ছতি অন্তলিক্খে;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১০৭০. ‘‘দেৱিদ্ধিপত্তোসি মহানুভাৱো, মনুস্সভূতো কিমকাসি পুঞ্ঞং;

কেনাসি এৱং জলিতানুভাৱো, ৱণ্ণো চ তে সব্বদিসা পভাসতী’’তি.

সো দেৱপুত্তো ইমাহি গাথাহি ব্যাকাসি –

১০৭১. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১০৭২. ‘‘অহঞ্চ ভৰিযা চ মনুস্সলোকে, উপস্সযং অৰহতো অদম্হ;

অন্নঞ্চ পানঞ্চ পসন্নচিত্তা, সক্কচ্চ দানং ৱিপুলং অদম্হ.

১০৭৩. ‘‘তেন মেতাদিসো ৱণ্ণো…পে… ৱণ্ণো চ মে সব্বদিসা পভাসতী’’তি.

তত্থ গাথাসু যং ৱত্তব্বং, তং হেট্ঠা ৱুত্তনযমেৱ;

পঠমউপস্সযদাযকৱিমানৱণ্ণনা নিট্ঠিতা.