১০. (উত্তৰ) পাযাসিৱিমানৱণ্ণনা

যা দেৱৰাজস্স সভা সুধম্মাতি উত্তৰৱিমানং. তস্স কা উপ্পত্তি? ভগৱতি পৰিনিব্বুতে ধাতুৱিভাগে চ কতে তত্থ তত্থ থূপেসু পতিট্ঠাপিযমানেসু ধম্মৱিনযং সঙ্গাযিতুং উচ্চিনিত্ৱা গহিতেসু মহাকস্সপপ্পমুখেসু মহাথেৰেসু যাৱ ৱস্সূপগমনা অঞ্ঞেসু চ থেৰেসু অত্তনো অত্তনো পৰিসায সদ্ধিং তত্থ তত্থ ৱসন্তেসু আযস্মা কুমাৰকস্সপো পঞ্চহি ভিক্খুসতেহি সদ্ধিং সেতব্যনগৰং গন্ত্ৱা সিংসপাৱনে ৱসি. অথ পাযাসি ৰাজঞ্ঞো থেৰস্স তত্থ ৱসনভাৱং সুত্ৱা মহতা জনকাযেন পৰিৱুতো তং উপসঙ্কমিত্ৱা পটিসন্থাৰং কত্ৱা নিসিন্নো অত্তনো দিট্ঠিগতং পৱেদেসি. অথ নং থেৰো চন্দিমসূৰিযূদাহৰণাদীহি পৰলোকস্স অত্থিভাৱং পকাসেন্তো অনেকৱিহিতহেতূপমালঙ্কতং দিট্ঠিগণ্ঠিৱিনিৱেঠনং নানানযৱিচিত্তং পাযাসিসুত্তং (দী. নি. ২.৪০৬ আদযো) দেসেত্ৱা তং দিট্ঠিসম্পদাযং পতিট্ঠাপেসি.

সো ৱিসুদ্ধদিট্ঠিকো হুত্ৱা সমণব্ৰাহ্মণকপণদ্ধিকাদীনং দানং দেন্তো অনুড়াৰজ্ঝাসযতায লূখং অদাসি ঘাসচ্ছাদনমত্তং কণাজকং বিলঙ্গদুতিযং সাণানি চ ৱত্থানি. এৱং পন অসক্কচ্চদানং দত্ৱা কাযস্স ভেদা হীনকাযং উপপজ্জি চাতুমহাৰাজিকানং সহব্যতং. তস্স পন কিচ্চাকিচ্চেসু যুত্তপ্পযুত্তো উত্তৰো নাম মাণৱো অহোসি দানে ব্যাৱটো. সো সক্কচ্চদানং দত্ৱা তাৱতিংসকাযং উপপন্নো, তস্স দ্ৱাদসযোজনিকং ৱিমানং নিব্বত্তি. সো কতঞ্ঞুতং ৱিভাৱেন্তো সহ ৱিমানেন কুমাৰকস্সপত্থেৰং উপসঙ্কমিত্ৱা ৱিমানতো ওৰুয্হ পঞ্চপতিট্ঠিতেন ৱন্দিত্ৱা অঞ্জলিং পগ্গয্হ অট্ঠাসি. তং থেৰো –

১১০৮. ‘‘যা দেৱৰাজস্স সভা সুধম্মা, যত্থচ্ছতি দেৱসঙ্ঘো সমগ্গো;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১১০৯. ‘‘দেৱিদ্ধিপত্তোসি মহানুভাৱো…পে…

ৱণ্ণো চ তে সব্বদিসা পভাসতী’’তি. – গাথাহি পটিপুচ্ছি;

১১১০. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১১১১. ‘‘অহং মনুস্সেসু মনুস্সভূতো, ৰঞ্ঞো পাযাসিস্স অহোসিং মাণৱো;

লদ্ধা ধনং সংৱিভাগং অকাসিং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১১২. ‘‘তেন মেতাদিসো ৱণ্ণো…পে…

ৱণ্ণো চ মে সব্বদিসা পভাসতী’’তি. –

সো দেৱপুত্তো তস্স ইমাহি গাথাহি ব্যাকাসি.

১১০৮. তত্থ দেৱৰাজস্সাতি সক্কস্স. সভা সুধম্মাতি এৱংনামকং সন্থাগাৰং. যত্থাতি যস্সং সভাযং. অচ্ছতীতি নিসীদতি. দেৱসঙ্ঘোতি তাৱতিংসদেৱকাযো. সমগ্গোতি সহিতো সন্নিপতিতো.

১১১১. পাযাসিস্স অহোসিং মাণৱোতি পাযাসিৰাজঞ্ঞস্স কিচ্চাকিচ্চকৰো দহৰতায মাণৱো, নামেন পন উত্তৰো নাম অহোসিং. সংৱিভাগং অকাসিন্তি অহমেৱ অভুঞ্জিত্ৱা যথালদ্ধং ধনং দানমুখে পৰিচ্চজনৱসেন সংৱিভজনং অকাসিং. অন্নঞ্চ পানঞ্চ পৰিচ্চজন্তোতি ৱচনসেসো. অথ ৱা দানং ৱিপুলং অদাসিং. কথং? সক্কচ্চং. কীদিসং? অন্নঞ্চ পানঞ্চাতি যোজেতব্বং.

(উত্তৰ) পাযাসিৱিমানৱণ্ণনা নিট্ঠিতা.

ইতি পৰমত্থদীপনিযা খুদ্দক-অট্ঠকথায ৱিমানৱত্থুস্মিং

দসৱত্থুপটিমণ্ডিতস্স ছট্ঠস্স পাযাসিৱগ্গস্স

অত্থৱণ্ণনা নিট্ঠিতা.