৭. সুনিক্খিত্তৱিমানৱগ্গো

১. চিত্তলতাৱিমানৱণ্ণনা

যথা ৱনং চিত্তলতং পভাসতীতি চিত্তলতাৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন সাৱত্থিযং অঞ্ঞতৰো উপাসকো দলিদ্দো অপ্পভোগো পৰেসং কম্মং কত্ৱা জীৱতি. সো সদ্ধো পসন্নো জিণ্ণে ৱুড্ঢে মাতাপিতৰো পোসেন্তো ‘‘ইত্থিযো নাম পতিকুলে ঠিতা ইস্সৰিযং কৰোন্তি, সস্সুসসুৰানং মনাপচাৰিনিযো দুল্লভা’’তি মাতাপিতূনং চিত্তদুক্খং পৰিহৰন্তো দাৰপৰিগ্গহং অকত্ৱা সযমেৱ নে উপট্ঠহতি, সীলানি ৰক্খতি, উপোসথং উপৱসতি, যথাৱিভৱং দানানি দেতি. সো অপৰভাগে কালং কত্ৱা তাৱতিংসেসু দ্ৱাদসযোজনিকে ৱিমানে নিব্বত্তি. তং আযস্মা মহামোগ্গল্লানো হেট্ঠা ৱুত্তনযেন গন্ত্ৱা কতকম্মং ইমাহি গাথাহি পটিপুচ্ছি –

১১১৪. ‘‘যথা ৱনং চিত্তলতং পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১১১৫. ‘‘দেৱিদ্ধিপত্তোসি মহানুভাৱো…পে…

ৱণ্ণো চ তে সব্বদিসা পভাসতী’’তি.

১১১৬. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১১১৭. ‘‘অহং মনুস্সেসু মনুস্সভূতো, দলিদ্দো অতাণো কপণো কম্মকৰো অহোসিং;

জিণ্ণে চ মাতাপিতৰো অভাৰিং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১১৮. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

সোপি তস্স ব্যাকাসি. সেসং ৱুত্তনযমেৱ.

চিত্তলতাৱিমানৱণ্ণনা নিট্ঠিতা.

২. নন্দনৱিমানৱণ্ণনা

যথা ৱনং নন্দনং পভাসতীতি নন্দনৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন সাৱত্থিযং অঞ্ঞতৰো উপাসকোতিআদি সব্বং অনন্তৰৱিমানসদিসং. অযং পন দাৰপৰিগ্গহং কত্ৱা মাতাপিতৰো পোসেসীতি অযমেৱ ৱিসেসো.

১১২০. যথা ৱনং নন্দনং পভাসতি, উয্যানসেট্ঠং তিদসানমুত্তমং;

তথূপমং তুয্হমিদং ৱিমানং, ওভাসযং তিট্ঠতি অন্তলিক্খে.

১১২১. ‘‘দেৱিদ্ধিপত্তোসি মহানুভাৱো…পে…ৱণ্ণো চ তে সব্বদিসা পভাসতীতি.

১১২২. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১১২৩. ‘‘অহং মনুস্সেসু মনুস্সভূতো, দলিদ্দো অতাণো কপণো কম্মকৰো অহোসিং;

জিণ্ণে চ মাতাপিতৰো অভাৰিং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১২৪. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি. –

গাথাহি ব্যাকাসি. তত্থ গাথাসুপি অপুব্বং নত্থি.

নন্দনৱিমানৱণ্ণনা নিট্ঠিতা.

৩. মণিথূণৱিমানৱণ্ণনা

উচ্চমিদং মণিথূণং ৱিমানন্তি মণিথূণৱিমানং. তস্স কা উপ্পত্তি? ভগৱা সাৱত্থিযং ৱিহৰতি জেতৱনে. তেন সমযেন সম্বহুলা থেৰা ভিক্খূ অৰঞ্ঞাযতনে ৱিহৰন্তি. তেসং গামং পিণ্ডায গমনমগ্গে একো উপাসকো ৱিসমং সমং কৰোতি, কণ্টকে নীহৰতি, গচ্ছগুম্বে অপনেতি, উদককালে মাতিকাসু সেতুং বন্ধতি, ৱিৱনট্ঠানেসু ছাযাৰুক্খে ৰোপেতি, জলাসযেসু মত্তিকং উদ্ধৰিত্ৱা তে পুথুলগম্ভীৰে কৰোতি, তিত্থে সম্পাদেতি, যথাৱিভৱং দানং দেতি, সীলং ৰক্খতি. সো অপৰভাগে কালং কত্ৱা তাৱতিংসেসু দ্ৱাদসযোজনিকে কনকৱিমানে নিব্বত্তি. তং আযস্মা মহামোগ্গল্লানত্থেৰো উপসঙ্কমিত্ৱা ইমাহি গাথাহি পটিপুচ্ছি –

১১২৬. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১১২৭. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণচ্ছন্না.

১১২৮. ‘‘কেন তেতাদিসো ৱণ্ণো…পে…ৱণ্ণো চ তে সব্বদিসা পভাসতী’’তি.

সোপি তস্স গাথাহি ব্যাকাসি –

১১৩০. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১১৩১. ‘‘অহং মনুস্সেসু মনুস্সভূতো, ৱিৱনে পথে সঙ্কমনং অকাসিং;

আৰামৰুক্খানি চ ৰোপযিস্সং, পিযা চ মে সীলৱন্তো অহেসুং;

অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং.

১১৩২. ‘‘তেন মেতাদিসো ৱণ্ণো…পে…ৱণ্ণো চ মে সব্বদিসা পভাসতী’’তি.

১১৩১. তত্থ ৱিৱনেতি অৰঞ্ঞে. আৰামৰুক্খানি চা আৰামভূতে ৰুক্খে, আৰামং কত্ৱা তত্থ ৰুক্খে ৰোপেসিন্তি অত্থো. সেসং সব্বং ৱুত্তনযমেৱ.

মণিথূণৱিমানৱণ্ণনা নিট্ঠিতা.

৪. সুৱণ্ণৱিমানৱণ্ণনা

সোৱণ্ণমযে পব্বতস্মিন্তি সুৱণ্ণৱিমানং. তস্স কা উপ্পত্তি? ভগৱা অন্ধকৱিন্দে ৱিহৰতি. তেন সমযেন অঞ্ঞতৰো উপাসকো সদ্ধো পসন্নো ৱিভৱসম্পন্নো তস্স গামস্স অৱিদূৰে অঞ্ঞতৰস্মিং মুণ্ডকপব্বতে সব্বাকাৰসম্পন্নং ভগৱতো ৱসনানুচ্ছৱিকং গন্ধকুটিং কাৰেত্ৱা তত্থ ভগৱন্তং ৱসাপেন্তো সক্কচ্চং উপট্ঠহি, সযঞ্চ নিচ্চসীলে পতিট্ঠিতো সুৱিসুদ্ধসীলসংৱৰো হুত্ৱা কালং কত্ৱা তাৱতিংসভৱনে নিব্বত্তি. তস্স কম্মানুভাৱসংসূচকং নানাৰতনৰংসিজালসমুজ্জলং ৱিচিত্তৱেদিকাপৰিক্খিত্তং ৱিৱিধৱিপুলালঙ্কাৰোপসোভিতং সুৱিভত্তভিত্তিত্থম্ভসোপানং আৰামৰমণীযকং কঞ্চনপব্বতমুদ্ধনি ৱিমানং উপ্পজ্জি. তং আযস্মা মহামোগ্গল্লানো দেৱচাৰিকং চৰন্তো দিস্ৱা ইমাহি গাথাহি পটিপুচ্ছি –

১১৩৪. ‘‘সোৱণ্ণমযে পব্বতস্মিং, ৱিমানং সব্বতোপভং;

হেমজালপটিচ্ছন্নং, কিঙ্কিণিজালকপ্পিতং.

১১৩৫. ‘‘অট্ঠংসা সুকতা থম্ভা, সব্বে ৱেড়ুৰিযামযা;

একমেকায অংসিযা, ৰতনা সত্ত নিম্মিতা.

১১৩৬. ‘‘ৱেড়ূৰিযসুৱণ্ণস্স, ফলিকা ৰূপিযস্স চ;

মসাৰগল্লমুত্তাহি, লোহিতঙ্গমণীহি চ.

১১৩৭. ‘‘চিত্ৰা মনোৰমা ভূমি, ন তত্থুদ্ধংসতী ৰজো;

গোপানসীগণা পীতা, কূটং দাৰেন্তি নিম্মিতা.

১১৩৮. ‘‘সোপানানি চ চত্তাৰি, নিম্মিতা চতুৰো দিসা;

নানাৰতনগব্ভেহি, আদিচ্চোৱ ৱিৰোচতি.

১১৩৯. ‘‘ৱেদিযা চতস্সো তত্থ, ৱিভত্তা ভাগসো মিতা;

দদ্দল্লমানা আভন্তি, সমন্তা চতুৰো দিসা.

১১৪০. ‘‘তস্মিং ৱিমানে পৱৰে, দেৱপুত্তো মহপ্পভো;

অতিৰোচসি ৱণ্ণেন, উদযন্তোৱ ভাণুমা.

১১৪১. ‘‘দানস্স তে ইদং ফলং, অথো সীলস্স ৱা পন;

অথো অঞ্জলিকম্মস্স, তং মে অক্খাহি পুচ্ছিতো’’তি.

সোপিস্স ইমাহি গাথাহি ব্যাকাসি –

১১৪২. ‘‘সো দেৱপুত্তো অত্তমনো…পে… যস্স কম্মস্সিদং ফলং’’.

১১৪৩. ‘‘অহং অন্ধকৱিন্দস্মিং, বুদ্ধস্সাদিচ্চবন্ধুনো;

ৱিহাৰং সত্থু কাৰেসিং, পসন্নো সেহি পাণিভি.

১১৪৪. ‘‘তত্থ গন্ধঞ্চ মালঞ্চ, পচ্চযঞ্চ ৱিলেপনং;

ৱিহাৰং সত্থু অদাসিং, ৱিপ্পসন্নেন চেতসা;

তেন ময্হং ইদং লদ্ধং, ৱসং ৱত্তেমি নন্দনে.

১১৪৫. ‘‘নন্দনে চ ৱনে ৰম্মে, নানাদিজগণাযুতে;

ৰমামি নচ্চগীতেহি, অচ্ছৰাহি পুৰক্খতো’’তি.

১১৩৪. তত্থ সব্বতোপভন্তি সব্বভাগেহি পভাসন্তং পভামুঞ্চনকং. কিঙ্কিণিজালকপ্পিতন্তি কপ্পিতকিঙ্কিণিকজালং.

১১৩৫. সব্বে ৱেড়ুৰিযামযাতি সব্বে থম্ভা ৱেড়ুৰিযমণিমযা. তত্থ পন একমেকায অংসিযাতি অট্ঠংসেসু থম্ভেসু একমেকস্মিং অংসভাগে. ৰতনা সত্ত নিম্মিতাতি সত্তৰতনকম্মনিম্মিতা, একেকো অংসো সত্তৰতনমযোতি অত্থো.

১১৩৬. ‘‘ৱেড়ূৰিযসুৱণ্ণস্সা’’তিআদিনা নানাৰতনানি দস্সেতি. তত্থ ৱেড়ূৰিযসুৱণ্ণস্সাতি ৱেড়ুৰিযেন চ সুৱণ্ণেন চ নিম্মিতা, চিত্ৰাতি ৱা যোজনা. কৰণত্থে হি ইদং সামিৱচনং. ফলিকা ৰূপিযস্স চাতি এত্থাপি এসেৱ নযো. মসাৰগল্লমুত্তাহীতি কবৰমণীহি. লোহিতঙ্গমণীহি চাতি ৰত্তমণীহি.

১১৩৭. ন তত্থুদ্ধংসতী ৰজোতি মণিমযভূমিকত্তা ন তস্মিং ৱিমানে ৰজো উগ্গচ্ছতি. গোপানসীগণাতি গোপানসীসমূহা. পীতাতি পীতৱণ্ণা, সুৱণ্ণমযা চেৱ ফুস্সৰাগাদিমণিমযা চাতি অত্থো. কূটং ধাৰেন্তীতি সত্তৰতনমযং কণ্ণিকং ধাৰেন্তি.

১১৩৮-৯. নানাৰতনগব্ভেহীতি নানাৰতনমযেহি ওৱৰকেহি. ৱেদিযাতি ৱেদিকা. চতস্সোতি চতূসু দিসাসু চতস্সো. তেনাহ ‘‘সমন্তা চতুৰো দিসা’’তি.

১১৪০. মহপ্পভোতি মহাজুতিকো. উদযন্তোতি উগ্গচ্ছন্তো. ভাণুমাতি আদিচ্চো.

১১৪৩. সেহি পাণিভীতি কাযসাৰং পুঞ্ঞং পসৱন্তো অত্তনো পাণীহি তং তং কিচ্চং কৰোন্তো ৱিহাৰং সত্থু কাৰেসিন্তি যোজনা. অথ ৱা সেহি পাণিভীতি তত্থ অন্ধকৱিন্দস্মিং গন্ধঞ্চ মালঞ্চ পচ্চযঞ্চ ৱিলেপনঞ্চ পূজাৱসেন. যথা কথং? ৱিহাৰঞ্চ ৱিপ্পসন্নেন চেতসা সত্থুনো অদাসিং পূজেসিং নিয্যাদেসিং চাতি এৱমেত্থ যোজনা ৱেদিতব্বা.

১১৪৪. তেনাতি তেন যথাৱুত্তেন পুঞ্ঞকম্মেন কাৰণভূতেন. ময্হন্তি মযা. ইদন্তি ইদং পুঞ্ঞফলং, ইদং ৱা দিব্বং আধিপতেয্যং. তেনাহ ‘‘ৱসং ৱত্তেমী’’তি.

১১৪৫. নন্দনেতি নন্দিযা দিব্বসমিদ্ধিযা উপ্পজ্জনট্ঠানে ইমস্মিং দেৱলোকে, তত্থাপি ৱিসেসতো নন্দনে ৱনে ৰম্মে, এৱং ৰমণীযে ইমস্মিং নন্দনে ৱনে ৰমামীতি যোজনা. সেসং ৱুত্তনযমেৱ.

এৱং দেৱতায অত্তনো পুঞ্ঞকম্মে আৱিকতে থেৰো সপৰিৱাৰস্স তস্স দেৱপুত্তস্স ধম্মং দেসেত্ৱা ভগৱতো তমত্থং নিৱেদেসি. ভগৱা তং অট্ঠুপ্পত্তিং কত্ৱা সম্পত্তপৰিসায ধম্মং দেসেসি. সা দেসনা মহাজনস্স সাত্থিকা অহোসীতি.

সুৱণ্ণৱিমানৱণ্ণনা নিট্ঠিতা.

৫. অম্বৱিমানৱণ্ণনা

উচ্চমিদং মণিথূণন্তি অম্বৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন ৰাজগহে অঞ্ঞতৰো দুগ্গতপুৰিসো পৰেসং ভত্তৱেতনভতো হুত্ৱা অম্বৱনং ৰক্খতি. সো একদিৱসং আযস্মন্তং সাৰিপুত্তং গিম্হসমযে সূৰিযাতপসন্তত্তে উণ্হৱালিকানিপ্পীড়িতে ৱিপ্ফন্দমানমৰীচিজালৱিত্থতে ভূমিপ্পদেসে তস্স অম্বাৰামস্স অৱিদূৰেন মগ্গেন সেদাগতেন গত্তেন গচ্ছন্তং দিস্ৱা সঞ্জাতগাৰৱবহুমানো উপসঙ্কমিত্ৱা এৱমাহ ‘‘মহা অযং, ভন্তে, ঘম্মপৰিড়াহো, অতিৱিয পৰিস্সন্তৰূপো ৱিয দিস্সতি, সাধু, ভন্তে, অয্যো ইমং অম্বাৰামং পৱিসিত্ৱা মুহুত্তং ৱিস্সমিত্ৱা অদ্ধানপৰিস্সমং পটিৱিনোদেত্ৱা গচ্ছথ অনুকম্পং উপাদাযা’’তি. থেৰো ৱিসেসতো তস্স চিত্তপ্পসাদং পৰিব্ৰূহেতুকামো তং আৰামং পৱিসিত্ৱা অঞ্ঞতৰস্স অম্বৰুক্খস্স মূলে নিসীদি.

পুন সো পুৰিসো আহ ‘‘সচে, ভন্তে, ন্হাযিতুকামত্থ, অহং ইতো কূপতো উদকং উদ্ধৰিত্ৱা তুম্হে ন্হাপেস্সামি, পানীযঞ্চ দস্সামী’’তি. থেৰোপি অধিৱাসেসি তুণ্হীভাৱেন. সো কূপতো উদকং উদ্ধৰিত্ৱা পৰিস্সাৱেত্ৱা থেৰং ন্হাপেসি, ন্হাপেত্ৱা চ হত্থপাদে ধোৱিত্ৱা নিসিন্নস্স পানীযং উপনেসি. থেৰো পানীযং পিৱিত্ৱা পটিপ্পস্সদ্ধদৰথো তস্স পুৰিসস্স উদকদানে চেৱ ন্হাপনে চ অনুমোদনং ৱত্ৱা পক্কামি. অথ সো পুৰিসো ‘‘ঘম্মাভিতত্তস্স ৱত থেৰস্স ঘম্মপৰিড়াহং পটিপ্পস্সম্ভেসিং, বহুং ৱত মযা পুঞ্ঞং পসুত’’ন্তি উড়াৰপীতিসোমনস্সং পটিসংৱেদেসি. সো অপৰভাগে কালং কত্ৱা তাৱতিংসেসু উপ্পজ্জি. তং আযস্মা মহামোগ্গল্লানো উপসঙ্কমিত্ৱা ইমাহি গাথাহি কতপুঞ্ঞং পুচ্ছি.

১১৪৬. ‘‘উচ্চমিদং মণিথূণং ৱিমানং, সমন্ততো দ্ৱাদস যোজনানি;

কূটাগাৰা সত্তসতা উড়াৰা, ৱেড়ুৰিযথম্ভা ৰুচকত্থতা সুভা.

১১৪৭. ‘‘তত্থচ্ছসি পিৱসি খাদসি চ, দিব্বা চ ৱীণা পৱদন্তি ৱগ্গুং;

দিব্বা ৰসা কামগুণেত্থ পঞ্চ, নাৰিযো চ নচ্চন্তি সুৱণ্ণছন্না.

১১৪৮. ‘‘কেন তেতাদিসো ৱণ্ণো…পে…

ৱণ্ণো চ তে সব্বদিসা পভাসতী’’তি.

১১৫০. ‘‘সো দেৱপুত্তো অত্তমনো…পে…

যস্স কম্মস্সিদং ফলং’’.

১১৫১. ‘‘গিম্হানং পচ্ছিমে মাসে, পতপন্তে দিৱঙ্কৰে;

পৰেসং ভতকো পোসো, অম্বাৰামমসিঞ্চতি.

১১৫২. ‘‘অথ তেনাগমা ভিক্খু, সাৰিপুত্তোতি ৱিস্সুতো;

কিলন্তৰূপো কাযেন, অকিলন্তোৱ চেতসা.

১১৫৩. ‘‘তঞ্চ দিস্ৱান আযন্তং, অৱোচং অম্বসিঞ্চকো;

সাধু তং ভন্তে ন্হাপেয্যং, যং মমস্স সুখাৱহং.

১১৫৪. ‘‘তস্স মে অনুকম্পায, নিক্খিপি পত্তচীৱৰং;

নিসীদি ৰুক্খমূলস্মিং, ছাযায একচীৱৰো.

১১৫৫. ‘‘তঞ্চ অচ্ছেন ৱাৰিনা, পসন্নমানসো নৰো;

ন্হাপযী ৰুক্খমূলস্মিং, ছাযায একচীৱৰং.

১১৫৬. ‘‘অম্বো চ সিত্তো সমণো চ ন্হাপিতো,

মযা চ পুঞ্ঞং পসুতং অনপ্পকং;

ইতি সো পীতিযা কাযং, সব্বং ফৰতি অত্তনো.

১১৫৭. ‘‘তদেৱ এত্তকং কম্মং, অকাসিং তায জাতিযা;

পহায মানুসং দেহং, উপপন্নোম্হি নন্দনং.

১১৫৮. ‘‘নন্দনে চ ৱনে ৰম্মে, নানাদিজগণাযুতে;

ৰমামি নচ্চগীতেহি, অচ্ছৰাহি পুৰক্খতো’’তি. –

সোপি তস্স ইমাহি গাথাহি ব্যাকাসি.

১১৫১. তত্থ গিম্হানং পচ্ছিমে মাসেতি আসাড়্হিমাসে. পতপন্তেতি অতিৱিয দিপ্পন্তে, সব্বসো উণ্হং ৱিস্সজ্জেন্তেতি অত্থো. দিৱঙ্কৰেতি দিৱাকৰে, অযমেৱ ৱা পাঠো. অসিঞ্চতীতি সিঞ্চতি, -কাৰো নিপাতমত্তং, সিঞ্চতি অম্বৰুক্খমূলেসু ধুৱং জলসেকং কৰোতীতি অত্থো. ‘‘অসিঞ্চথা’’তি চ পাঠো, সিঞ্চিত্থাতি অত্থো. ‘‘অসিঞ্চহ’’ন্তি চ পঠন্তি, পৰেসং ভতকো পোসো হুত্ৱা তদা অম্বাৰামং অসিঞ্চিং অহন্তি অত্থো.

১১৫২. তেনাতি যেন দিসাভাগেন সো অম্বাৰামো, তেন অগমা অগঞ্ছি. অকিলন্তোৱ চেতসাতি চেতোদুক্খস্স মগ্গেনেৱ পহীনত্তা চেতসা অকিলন্তোপি সমানো কিলন্তুৰূপো কাযেন তেন মগ্গেন অগমাতি যোজনা.

১১৫৩-৪. অৱোচং অহং তদা অম্বসিঞ্চকো হুত্ৱাতি যোজনা. একচীৱৰোতি ন্হাযিতুকামোতি অধিপ্পাযো.

১১৫৬. ইতীতি এৱং ‘‘অম্বো চ সিত্তো, সমণো চ ন্হাপিতো, মযা চ পুঞ্ঞং পসুতং অনপ্পকং, একেনেৱ পযোগেন তিৱিধোপি অত্থো সাধিতো’’তি ইমিনাকাৰেন পৱত্তায পীতিযা সো পুৰিসো অত্তনো সব্বং কাযং ফৰতি, নিৰন্তৰং ফুটং কৰোতীতি যোজনা. অতীতত্থে চেতং ৱত্তমানৱচনং, ফৰীতি অত্থো.

১১৫৭. তদেৱ এত্তকং কম্মন্তি তং এত্তকং এৱং পানীযদানমত্তকং কম্মং অকাসিং, তায তস্সং জাতিযং অঞ্ঞং নানুস্সৰামীতি অধিপ্পাযো. তেসং ৱুত্তনযমেৱ.

অম্বৱিমানৱণ্ণনা নিট্ঠিতা.

৬. গোপালৱিমানৱণ্ণনা

দিস্ৱান দেৱং পটিপুচ্ছি ভিক্খূতি গোপালৱিমানং. তস্স কা উপ্পত্তি? ভগৱা ৰাজগহে ৱিহৰতি ৱেড়ুৱনে. তেন সমযেন ৰাজগহৱাসী অঞ্ঞতৰো গোপালকো পাতৰাসত্থায পিলোতিকায পুটবদ্ধং কুম্মাসং গহেত্ৱা নগৰতো নিক্খমিত্ৱা গাৱীনং চৰণট্ঠানভূতং গোচৰভূমিং সম্পাপুণি. তং আযস্মা মহামোগ্গল্লানো ‘‘অযং ইদানেৱ কালং কৰিস্সতি, ময্হঞ্চ কুম্মাসং দত্ৱা তাৱতিংসেসু উপ্পজ্জিস্সতী’’তি চ ঞত্ৱা তস্স সমীপং অগমাসি. সো ৱেলং ওলোকেত্ৱা থেৰস্স কুম্মাসং দাতুকামো অহোসি. তেন চ সমযেন গাৱিযো মাসক্খেত্তং পৱিসন্তি. অথ সো গোপালো চিন্তেসি ‘‘কিং নু খো থেৰস্স কুম্মাসং দদেয্যং, উদাহু গাৱিযো মাসক্খেত্ততো নীহৰেয্য’’ন্তি. অথস্স এতদহোসি ‘‘মাসসামিকা মং যং ইচ্ছন্তি, তং কৰোন্তু, থেৰে পন গতে কুম্মাসদানন্তৰাযো মে সিযা, হন্দাহং পঠমং অয্যস্স কুম্মাসং দস্সামী’’তি তং থেৰস্স উপনেসি. পটিগ্গহেসি থেৰো অনুকম্পং উপাদায.

অথ নং গাৱিযো নিৱত্তেতুং পৰিস্সযং অনোলোকেত্ৱা ৱেগেন উপধাৱন্তং পাদেন ফুট্ঠো আসীৱিসো ডংসি. থেৰোপি তং অনুকম্পমানো তং কুম্মাসং পৰিভুঞ্জিতুং আৰভি. গোপালকোপি গাৱিযো নিৱত্তেত্ৱা আগতো থেৰং কুম্মাসং পৰিভুঞ্জন্তং দিস্ৱা পসন্নচিত্তো উড়াৰং পীতিসোমনস্সং পটিসংৱেদেন্তো নিসীদি. তাৱদেৱস্স সকলসৰীৰং ৱিসং অজ্ঝোত্থৰি. মুহুত্তমেৱ ৱেগে মুদ্ধপত্তে কালমকাসি, কালকতো চ তাৱতিংসেসু দ্ৱাদসযোজনিকে কনকৱিমানে নিব্বত্তি. তং আযস্মা মহামোগ্গল্লানো দিস্ৱা ইমাহি গাথাহি পটিপুচ্ছি –

১১৫৯. ‘‘দিস্ৱান দেৱং পটিপুচ্ছি ভিক্খু, উচ্চে ৱিমানম্হি চিৰট্ঠিতিকে;

আমুত্তহত্থাভৰণং যসস্সিং, দিব্বে ৱিমানম্হি যথাপি চন্দিমা.

১১৬০. ‘‘অলঙ্কতো মল্যধৰো সুৱত্থো, সুকুণ্ডলী কপ্পিতকেসমস্সু;

আমুত্তহত্থাভৰণো যসস্সী, দিব্বে ৱিমানম্হি যথাপি চন্দিমা.

১১৬১. ‘‘দিব্বা চ ৱীণা পৱদন্তি ৱগ্গুং; অট্ঠট্ঠকা সিক্খিতা সাধুৰূপা;

দিব্বা চ কঞ্ঞা তিদসচৰা উড়াৰা, নচ্চন্তি গাযন্তি পমোদযন্তি.

১১৬২. ‘‘দেৱিদ্ধিপত্তোসি মহানুভাৱো…পে…

ৱণ্ণো চ তে সব্বদিসা পভাসতী’’তি.

সোপি তস্স ব্যাকাসি –

১১৬৩. ‘‘সো দেৱপুত্তো অত্তমনো…পে…যস্স কম্মস্সিদং ফলং’’.

১১৬৪. ‘‘অহং মনুস্সেসু মনুস্সভূতো, সঙ্গম্ম ৰক্খিস্সং পৰেসং ধেনুযো;

ততো চ আগা সমণো মমন্তিকে, গাৱো চ মাসে অগমংসু খাদিতুং.

১১৬৫. ‘‘দ্ৱযজ্জ কিচ্চং উভযঞ্চ কাৰিযং, ইচ্চেৱহং ভন্তে তদা ৱিচিন্তযিং;

ততো চ সঞ্ঞং পটিলদ্ধ যোনিসো, ‘দদামি ভন্তে’তি খিপিং অনন্তকং.

১১৬৬. ‘‘সো মাসখেত্তং তুৰিতো অৱাসৰিং, পুৰা অযং ভঞ্জতি যস্সিদং ধনং;

ততো চ কণ্হো উৰগো মহাৱিসো, অডংসি পাদে তুৰিতস্স মে সতো.

১১৬৭. ‘‘স্ৱাহং অট্টোম্হি দুক্খেন পীড়িতো, ভিক্খু চ তং সামং মুঞ্চিত্ৱানন্তকং;

অহাসি কুম্মাসং মমানুকম্পযা, ততো চুতো কালকতোম্হি দেৱতা.

১১৬৮. ‘‘তদেৱ কম্মং কুসলং কতং মযা, সুখঞ্চ কম্মং অনুভোমি অত্তনা;

তযা হি ভন্তে অনুকম্পিতো ভুসং, কতঞ্ঞুতায অভিৱাদযামি তং.

১১৬৯. ‘‘সদেৱকে লোকে সমাৰকে চ, অঞ্ঞো মুনি নত্থি তযানুকম্পকো;

তযা হি ভন্তে অনুকম্পিতো ভুসং, কতঞ্ঞুতায অভিৱাদযামি তং.

১১৭০. ‘‘ইমস্মিং লোকে পৰস্মিং ৱা পন, অঞ্ঞো মুনী নত্থি তযানুকম্পকো;

তযা হি ভন্তে অনুকম্পিতো ভুসং, কতঞ্ঞুতায অভিৱাদযামি ত’’ন্তি.

অথাযস্মা মহামোগ্গল্লানো অত্তনা চ দেৱতায চ কথিতনিযামেনেৱ তং ভগৱতো আৰোচেসি. সত্থা তমত্থং পচ্চনুভাসিত্ৱা তং অট্ঠুপ্পত্তিং কত্ৱা সম্পত্তপৰিসায ধম্মং দেসেতুং ‘‘দিস্ৱান দেৱং পটিপুচ্ছি ভিক্খূ’’তিআদিমাহ.

১১৫৯. তত্থ দেৱন্তি গোপালদেৱপুত্তং. ভিক্খূতি আযস্মন্তং মহামোগ্গল্লানং সন্ধায সত্থা ৱদতি. সো হি সব্বসো ভিন্নকিলেসতায ভিক্খু. ৱিমানস্স বহুকালাৱট্ঠাযিতায কপ্পট্ঠিতিকতায এৱ ৱা ‘‘চিৰট্ঠিতিকে’’তি ৱুত্তং, ‘‘চিৰট্ঠিতিক’’ন্তিপি কেচি পঠন্তি. তঞ্হি ‘‘দেৱ’’ন্তি ইমিনা সম্বন্ধিতব্বং. সোপি হি সট্ঠিসতসহস্সাধিকা তিস্সো ৱস্সকোটিযো তত্থ অৱট্ঠানতো ‘‘চিৰট্ঠিতিকে’’তি ৱত্তব্বতং লভতি. যথাপি চন্দিমাতি যথা চন্দিমা দেৱপুত্তো কন্তসীতলমনোহৰকিৰণজালসমুজ্জলে অত্তনো দিব্বে ৱিমানম্হি ৱিৰোচতি, এৱং ৱিৰোচমানন্তি ৱচনসেসা.

১১৬০. অলঙ্কতোতিআদি তস্স দেৱপুত্তস্স থেৰেন পুচ্ছিতাকাৰদস্সনং, তং হেট্ঠা ৱুত্তত্থমেৱ.

১১৬৪. সঙ্গম্মাতি সঙ্গমেত্ৱা, সঙ্গম্মাতি ৱা সঙ্গহেত্ৱা. হেত্ৱত্থোপি হি ইধ অন্তোনীতো, বহূ একতো হুত্ৱাতি অত্থো. আগাতি আগঞ্ছি. মাসেতি মাসসস্সানি.

১১৬৫. দ্ৱযজ্জাতি দ্ৱযং অজ্জ এতৰহি কিচ্চং কাতব্বং. উভযঞ্চ কাৰিযন্তি ৱুত্তস্সেৱত্থস্স পৰিযাযৱচনং. সঞ্ঞন্তি ধম্মসঞ্ঞং. তেনাহ ‘‘যোনিসো’’তি পটিলদ্ধাতি পটিলভিত্ৱা. খিপিন্তি পনিগ্গাহাপনৱসেন হত্থে খিপিং. অনন্তকন্তি নন্তকং কুম্মাসং পক্খিপিত্ৱা বন্ধিত্ৱা ঠপিতং পিলোতিকং. অ-কাৰো চেত্থ নিপাতমত্তং.

১১৬৬. সোতি সো অহং. তুৰিতোতি তুৰিতো সম্ভমন্তো. অৱাসৰিন্তি উপগচ্ছি, পাৱিসিং ৱা. পুৰা অযং ভঞ্জতি যস্সিদং ধনন্তি যস্স খেত্তসামিকস্স ইদং মাসসস্সং ধনং, তং অযং গোগণো ভঞ্জতি পুৰা তস্স ভঞ্জনতো, আমদ্দনতো পুৰেতৰমেৱাতি অত্থো. ততোতি তত্থ. তুৰিতস্স মে সতোতি সম্ভমন্তস্স মে সমানস্স, সহসা গমনেন মগ্গে কণ্হসপ্পং অনোলোকেত্ৱা গতস্সাতি অধিপ্পাযো.

১১৬৭. অট্টোম্হি দুক্খেন পীড়িতোতি তেন আসীৱিসডংসনেন অট্টো অট্টিতো উপদ্দুতো মৰণদুক্খেন বাধিতো ভৱামি. অহাসীতি অজ্ঝোহৰি, পৰিভুঞ্জীতি অত্থো. ততো চুতো কালকতোম্হি দেৱতাতি ততো মনুস্সত্তভাৱতো চুতো মৰণকালপ্পত্তিযা, তত্থ ৱা আযুসঙ্খাৰস্স খেপনসঙ্খাতস্স কালস্স কতত্তা কালকতো, তদনন্তৰমেৱ চ অম্হি দেৱতা দেৱত্তভাৱপ্পত্তিযা দেৱতা হোমীতি অত্থো.

১১৬৯. তযাতি তযা সদিসো অঞ্ঞো মুনি মোনেয্যগুণযুত্তো ইসি নত্থি. তযাতি ৱা নিস্সক্কে ইদং কৰণৱচনং. সেসং ৱুত্তনযমেৱ.

গোপালৱিমানৱণ্ণনা নিট্ঠিতা.