৮. কিমিলত্থেৰগাথাৱণ্ণনা

পাচীনৱংসদাযম্হীতিআদিকা আযস্মতো কিমিলত্থেৰস্স গাথা. কা উপ্পত্তি? তস্স পুব্বযোগো সংৱেগুপ্পত্তি পব্বজ্জা চ এককনিপাতে ‘‘অভিসত্তো’’তি গাথায সংৱণ্ণনাযং ৱুত্তাযেৱ. তায চ গাথায থেৰেন অত্তনো ৱিসেসাধিগমস্স কাৰণং দস্সিতং. ইধ পন অধিগতৱিসেসস্স অত্তনো আযস্মতা চ অনুৰুদ্ধেন আযস্মতা চ নন্দিযেন সহ সমগ্গৱাসো দস্সিতোতি ৱেদিতব্বং. সমগ্গৱাসং পন ৱসন্তা তে যথা চ ৱসিংসু, তং দস্সেন্তো –

১৫৫. ‘‘পাচীনৱংসদাযম্হি, সক্যপুত্তা সহাযকা;

পহাযানপ্পকে ভোগে, উঞ্ছে পত্তাগতে ৰতা.

১৫৬. ‘‘আৰদ্ধৱীৰিযা পহিতত্তা, নিচ্চং দড়্হপৰক্কমা;

ৰমন্তি ধম্মৰতিযা, হিত্ৱান লোকিযং ৰতি’’ন্তি. – গাথাদ্ৱযং অভাসি;

তত্থ পাচীনৱংসদাযম্হীতি পাচীনৱংসনামকে ৰক্খিতগোপিতে সহপৰিচ্ছেদে ৱনে. তঞ্হি ৱনং গামস্স পাচীনদিসাযং ঠিতত্তা ৱংসগুম্বপৰিক্খিত্তত্তা চ ‘‘পাচীনৱংসদাযো’’তি ৱুত্তো, ৱংসৱনভাৱেন ৱাতি. সক্যপুত্তাতি অনুৰুদ্ধত্থেৰাদযো সক্যৰাজকুমাৰা. সহাযকাতি সংৱেগুপ্পত্তিপব্বজ্জাসমণধম্মকৰণসংৱাসেহি সহ অযনতো পৱত্তনতো সহাযকা. পহাযানপ্পকে ভোগেতি উড়াৰেন পুঞ্ঞানুভাৱেন অধিগতে কুলপৰম্পৰাগতে চ মহন্তে ভোগক্খন্ধে ছড্ডেত্ৱা. ‘‘সহাযানপ্পকে’’তিপি পাড়ি. উঞ্ছে পত্তাগতে ৰতাতি উঞ্ছাচৰিযায আভতত্তা উঞ্ছে পত্তে আগতত্তা পত্তাগতে পত্তপৰিযাপন্নে ৰতা অভিৰতা, সঙ্ঘভত্তাদিঅতিৰেকলাভং পটিক্খিপিত্ৱা জঙ্ঘবলং নিস্সায ভিক্খাচৰিযায লদ্ধেন মিস্সকভত্তেনেৱ সন্তুট্ঠাতি অত্থো.

আৰদ্ধৱীৰিযাতি উত্তমত্থস্স অধিগমায আদিতোৱ পগেৱ সম্পাদিতৱীৰিযা. পহিতত্তাতি নিন্নপোণপব্ভাৰভাৱেন কালেন কালং সমাপজ্জনেন চ নিব্বানং পতিপেসিতচিত্তা. নিচ্চং দড়্হপৰক্কমাতি ৱত্তপটিপত্তীসু দিট্ঠধম্মসুখৱিহাৰানুযোগেন সব্বকালং অসিথিলপৰক্কমা. ৰমন্তি ধম্মৰতিযা, হিত্ৱান লোকিযং ৰতিন্তি লোকে ৱিদিততায লোকপৰিযাপন্নতায চ লোকিযং ৰূপাৰম্মণাদিৰতিং পহায মগ্গপঞ্ঞায পজহিত্ৱা লোকুত্তৰধম্মৰতিযা অগ্গফলনিব্বানাভিৰতিযা চ ৰমন্তি অভিৰমন্তীতি.

কিমিলত্থেৰগাথাৱণ্ণনা নিট্ঠিতা.