৮. মেণ্ডসিৰত্থেৰগাথাৱণ্ণনা

অনেকজাতিসংসাৰন্তি আযস্মতো মেণ্ডসিৰত্থেৰস্স গাথা. কা উপ্পত্তি? সোপি কিৰ পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি কৰোন্তো ইতো একনৱুতে কপ্পে ব্ৰাহ্মণকুলে নিব্বত্তিত্ৱা ৱযপ্পত্তো কামে পহায ইসিপব্বজ্জং পব্বজিত্ৱা মহতা ইসিগণেন সদ্ধিং হিমৱন্তে ৱসন্তো সত্থাৰং দিস্ৱা পসন্নমানসো ইসিগণেন পদুমানি আহৰাপেত্ৱা সত্থু পুপ্ফপূজং কত্ৱা সাৱকে অপ্পমাদপটিপত্তিযং ওৱদিত্ৱা কালং কত্ৱা দেৱলোকে নিব্বত্তো অপৰাপৰং সংসৰন্তো ইমস্মিং বুদ্ধুপ্পাদে সাকেতে গহপতিকুলে নিব্বত্তি, তস্স মেণ্ডসৰিক্খসীসতায মেণ্ডসিৰোত্ৱেৱ সমঞ্ঞা অহোসি. সো ভগৱতি সাকেতে অঞ্জনৱনে ৱিহৰন্তে সত্থাৰং উপসঙ্কমিত্ৱা পটিলদ্ধসদ্ধো পব্বজিত্ৱা সমথৱিপস্সনাসু কম্মং কৰোন্তো ছড়ভিঞ্ঞো অহোসি. তেৱ ৱুত্তং অপদানে (অপ. থেৰ ১.১৩.৯৭-১০৫) –

‘‘হিমৱন্তস্সাৱিদূৰে, গোতমো নাম পব্বতো;

নানাৰুক্খেহি সঞ্ছন্নো, মহাভূতগণালযো.

‘‘ৱেমজ্ঝম্হি চ তস্সাসি, অস্সমো অভিনিম্মিতো;

পুৰক্খতো সসিস্সেহি, ৱসামি অস্সমে অহং.

‘‘আযন্তু মে সিস্সগণা, পদুমং আহৰন্তু মে;

বুদ্ধপূজং কৰিস্সামি, দ্ৱিপদিন্দস্স তাদিনো.

‘‘এৱন্তি তে পটিস্সুত্ৱা, পদুমং আহৰিংসু মে;

তথা নিমিত্তং কত্ৱাহং, বুদ্ধস্স অভিৰোপযিং.

‘‘সিস্সে তদা সমানেত্ৱা, সাধুকং অনুসাসহং;

মা খো তুম্হে পমজ্জিত্থ, অপ্পমাদো সুখাৱহো.

‘‘এৱং সমনুসাসিত্ৱা, তে সিস্সে ৱচনক্খমে;

অপ্পমাদগুণে যুত্তো, তদা কালঙ্কতো অহং.

‘‘একনৱুতিতো কপ্পে, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘একপঞ্ঞাসকপ্পম্হি, ৰাজা আসিং জলুত্তমো;

সত্তৰতনসম্পন্নো, চক্কৱত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

সো অত্তনো পুব্বেনিৱাসং অনুস্সৰন্তো –

৭৮. ‘‘অনেকজাতিসংসাৰং, সন্ধাৱিস্সং অনিব্বিসং;

তস্স মে দুক্খজাতস্স, দুক্খক্খন্ধো অপৰদ্ধো’’তি. – গাথং অভাসি;

তত্থ অনেকজাতিসংসাৰন্তি অনেকজাতিসতসহস্সসঙ্খ্যং ইদং সংসাৰৱট্টং, অদ্ধুনো অধিপ্পেতত্তা অচ্চন্তসংযোগেকৱচনং. সন্ধাৱিস্সন্তি সংসৰিং, অপৰাপৰং চৱনুপ্পজ্জনৱসেন পৰিব্ভমিং. অনিব্বিসন্তি তস্স নিৱত্তকঞাণং অৱিন্দন্তো অলভন্তো. তস্স মেতি এৱং সংসৰন্তস্স মে. দুক্খজাতস্সাতি জাতিআদিৱসেন উপ্পন্নদুক্খস্স, তিস্সন্নং ৱা দুক্খতানং ৱসেন দুক্খসভাৱস্স. দুক্খক্খন্ধোতি কম্মকিলেসৱিপাকৱট্টপ্পকাৰো দুক্খৰাসি. অপৰদ্ধোতি অৰহত্তমগ্গপ্পত্তিতো পট্ঠায পৰিব্ভট্ঠো চুতো ন অভিনিব্বত্তিস্সতি. ‘‘অপৰট্ঠো’’তি ৱা পাঠো, অপগতসমিদ্ধিতো সমুচ্ছিন্নকাৰণত্তা অপগতোতি অত্থো. ইদমেৱ চ থেৰস্স অঞ্ঞাব্যাকৰণং অহোসি.

মেণ্ডসিৰত্থেৰগাথাৱণ্ণনা নিট্ঠিতা.