৯. কোসলৱিহাৰিত্থেৰগাথাৱণ্ণনা

সদ্ধাযাহং পব্বজিতোতি আযস্মতো কোসলৱিহাৰিত্থেৰস্স গাথা. কা উপ্পত্তি? অযম্পি কিৰ পদুমুত্তৰস্স ভগৱতো কালে কুসলবীজং ৰোপেত্ৱা তং তং পুঞ্ঞং অকাসি. সেসং অঞ্জনৱনিযত্থেৰৱত্থুসদিসমেৱ. অযং পন ৱিসেসো – অযং কিৰ ৱুত্তনযেন পব্বজিত্ৱা কতপুব্বকিচ্চো কোসলৰট্ঠে অঞ্ঞতৰস্মিং গামে একং উপাসককুলং নিস্সায অৰঞ্ঞে ৱিহৰতি, তং সো উপাসকো ৰুক্খমূলে ৱসন্তং দিস্ৱা কুটিকং কাৰেত্ৱা অদাসি. থেৰো কুটিকাযং ৱিহৰন্তো আৱাসসপ্পাযেন সমাধানং লভিত্ৱা ৱিপস্সনং উস্সুক্কাপেত্ৱা নচিৰস্সেৱ অৰহত্তং পাপুণি. তেন ৱুত্তং অপদানে (অপ. থেৰ ১.১১.৫৩-৬১) –

‘‘হিমৱন্তস্সাৱিদূৰে, ৱসামি পণ্ণসন্থৰে;

ঘাসেসু গেধমাপন্নো, সেয্যসীলো চহং তদা.

‘‘খণন্তালুকলম্বানি, বিড়ালিতক্কলানি চ;

কোলং ভল্লাতকং বিল্লং, আহত্ৱা পটিযাদিতং.

‘‘পদুমুত্তৰো লোকৱিদূ, আহুতীনং পটিগ্গহো;

মম সঙ্কপ্পমঞ্ঞায, আগচ্ছি মম সন্তিকং.

‘‘উপাগতং মহানাগং, দেৱদেৱং নৰাসভং;

বিড়ালিং পগ্গহেত্ৱান, পত্তম্হি ওকিৰিং অহং.

‘‘পৰিভুঞ্জি মহাৱীৰো, তোসযন্তো মমং তদা;

পৰিভুঞ্জিত্ৱান সব্বঞ্ঞূ, ইমং গাথং অভাসথ.

‘‘সকং চিত্তং পসাদেত্ৱা, বিড়ালিং মে অদা তুৱং;

কপ্পানং সতসহস্সং, দুগ্গতিং নুপপজ্জসি.

‘‘চৰিমং ৱত্ততে ময্হং, ভৱা সব্বে সমূহতা;

ধাৰেমি অন্তিমং দেহং, সম্মাসম্বুদ্ধসাসনে.

‘‘চতুপঞ্ঞাসিতো কপ্পে, সুমেখলিয সৱ্হযো;

সত্তৰতনসম্পন্নো, চক্কৱত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা ৱিমুত্তিসুখপ্পটিসংৱেদনেন উপ্পন্নপীতিৱেগেন উদানেন্তো ‘‘সদ্ধাযাহং পব্বজিতো’’তি গাথং অভাসি.

৫৯. তত্থ সদ্ধাযাতি ভগৱতো ৱেসালিং উপগমনে আনুভাৱং দিস্ৱা, ‘‘একন্তনিয্যানিকং ইদং সাসনং, তস্মা অদ্ধা ইমায পটিপত্তিযা জৰামৰণতো মুচ্চিস্সামী’’তি উপ্পন্নসদ্ধাৱসেন পব্বজিতো পব্বজ্জং উপগতো. অৰঞ্ঞে মে কুটিকা কতাতি তস্সা পব্বজ্জায অনুৰূপৱসেন অৰঞ্ঞে ৱসতো মে কুটিকা কতা, পব্বজ্জানুৰূপং আৰঞ্ঞকো হুত্ৱা ৱূপকট্ঠো ৱিহৰামীতি দস্সেতি. তেনাহ ‘‘অপ্পমত্তো চ আতাপী, সম্পজানো পতিস্সতো’’তি. অৰঞ্ঞৱাসলদ্ধেন কাযৱিৱেকেন জাগৰিযং অনুযুঞ্জন্তো তত্থ সতিযা অৱিপ্পৱাসেন অপ্পমত্তো, আৰদ্ধৱীৰিযতায আতাপী, পুব্বভাগিযসতিসম্পজঞ্ঞপাৰিপূৰিযা ৱিপস্সনং ৱড্ঢেত্ৱা অৰহত্তাধিগমেন পঞ্ঞাসতিৱেপুল্লপ্পত্তিযা অচ্চন্তমেৱ সম্পজানো পতিস্সতো ৱিহৰামীতি অত্থো. অপ্পমত্তভাৱাদিকিত্তনে চস্স ইদমেৱ অঞ্ঞাব্যাকৰণং অহোসি কোসলৰট্ঠে চিৰনিৱাসিভাৱেন পন কোসলৱিহাৰীতি সমঞ্ঞা জাতাতি.

কোসলৱিহাৰিত্থেৰগাথাৱণ্ণনা নিট্ঠিতা.