৮. ৰমণীযকুটিকত্থেৰগাথাৱণ্ণনা

ৰমণীযা মে কুটিকাতি আযস্মতো ৰমণীযকুটিকত্থেৰস্স গাথা. কা উপ্পত্তি? সোপি কিৰ পদুমুত্তৰস্স ভগৱতো কালে কুসলবীজৰোপনং কত্ৱা দেৱমনুস্সেসু সংসৰন্তো ইতো অট্ঠাৰসকপ্পসতমত্থকে অত্থদস্সিস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো বুদ্ধাৰহং আসনং ভগৱতো অদাসি. পুপ্ফেহি চ ভগৱন্তং পূজেত্ৱা পঞ্চপতিট্ঠিতেন ৱন্দিত্ৱা পদক্খিণং কত্ৱা পক্কামি. সেসং অঞ্জনৱনিযত্থেৰস্স ৱত্থুম্হি ৱুত্তসদিসমেৱ. অযং পন ৱিসেসো – অযং কিৰ ৱুত্তনযেন পব্বজিত্ৱা কতপুব্বকিচ্চো ৱজ্জিৰট্ঠে অঞ্ঞতৰস্মিং গামকাৱাসে কুটিকাযং ৱিহৰতি, সা হোতি কুটিকা অভিৰূপা দস্সনীযা পাসাদিকা সুপৰিকম্মকতভিত্তিভূমিকা আৰামপোক্খৰণিৰামণেয্যাদিসম্পন্না মুত্তাজালসদিসৱালিকাকিণ্ণভূমিভাগা থেৰস্স চ ৱত্তসম্পন্নতায সুসম্মট্ঠঙ্গণতাদিনা ভিয্যোসোমত্তায ৰমণীযতৰা হুত্ৱা তিট্ঠতি. সো তত্থ ৱিহৰন্তো ৱিপস্সনং পট্ঠপেত্ৱা নচিৰস্সেৱ অৰহত্তে পতিট্ঠাসি. তেন ৱুত্তং অপদানে (অপ. থেৰ ১.১১.৪৭-৫২) –

‘‘কাননং ৱনমোগ্গয্হ, অপ্পসদ্দং নিৰাকুলং;

সীহাসনং মযা দিন্নং, অত্থদস্সিস্স তাদিনো.

‘‘মালাহত্থং গহেত্ৱান, কত্ৱা চ নং পদক্খিণং;

সত্থাৰং পযিৰুপাসিত্ৱা, পক্কামিং উত্তৰামুখো.

‘‘তেন কম্মেন দ্ৱিপদিন্দ, লোকজেট্ঠ নৰাসভ;

সন্নিব্বাপেমি অত্তানং, ভৱা সব্বে সমূহতা.

‘‘অট্ঠাৰসকপ্পসতে, যং দানমদদিং তদা;

দুগ্গতিং নাভিজানামি, সীহাসনস্সিদং ফলং.

‘‘ইতো সত্তকপ্পসতে, সন্নিব্বাপকখত্তিযো;

সত্তৰতনসম্পন্নো, চক্কৱত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা থেৰে তত্থ ৱিহৰন্তে কুটিকায ৰমণীযভাৱতো ৱিহাৰপেক্খকা মনুস্সা ততো ততো আগন্ত্ৱা কুটিং পস্সন্তি. অথেকদিৱসং কতিপযা ধুত্তজাতিকা ইত্থিযো তত্থ গতা কুটিকায ৰমণীযভাৱং দিস্ৱা, ‘‘এত্থ ৱসন্তো অযং সমণো সিযা অম্হেহি আকড্ঢনীযহদযো’’তি অধিপ্পাযেন – ‘‘ৰমণীযং ৱো, ভন্তে, ৱসনট্ঠানং. মযম্পি ৰমণীযৰূপা পঠমযোব্বনে ঠিতা’’তি ৱত্ৱা ইত্থিকুত্তাদীনি দস্সেতুং আৰভিংসু. থেৰো অত্তনো ৱীতৰাগভাৱং পকাসেন্তো ‘‘ৰমণীযা মে কুটিকা, সদ্ধাদেয্যা মনোৰমা’’তি গাথং অভাসি.

৫৮. তত্থ ৰমণীযা মে কুটিকাতি ‘‘ৰমণীযা তে, ভন্তে, কুটিকা’’তি যং তুম্হেহি ৱুত্তং, তং সচ্চং. অযং মম ৱসনকুটিকা ৰমণীযা মনুঞ্ঞৰূপা, সা চ খো সদ্ধাদেয্যা, ‘‘এৱৰূপায মনাপং কত্ৱা পব্বজিতানং দিন্নায ইদং নাম ফলং হোতী’’তি কম্মফলানি সদ্দহিত্ৱা সদ্ধায ধম্মচ্ছন্দেন দাতব্বত্তা সদ্ধাদেয্যা, ন ধনেন নিব্বত্তিতা. সযঞ্চ তথাদিন্নানি সদ্ধাদেয্যানি পস্সন্তানং পৰিভুঞ্জন্তানঞ্চ মনো ৰমেতীতি মনোৰমা. সদ্ধাদেয্যত্তা এৱ হি মনোৰমা, সদ্ধাদীহি দেয্যধম্মং সক্কচ্চং অভিসঙ্খৰিত্ৱা দেন্তি, সদ্ধাদেয্যঞ্চ পৰিভুঞ্জন্তা সপ্পুৰিসা দাযকস্স অৱিসংৱাদনত্থম্পি পযোগাসযসম্পন্না হোন্তি, ন তুম্হেহি চিন্তিতাকাৰেন পযোগাসযৱিপন্নাতি অধিপ্পাযো. ন মে অত্থো কুমাৰীহীতি যস্মা সব্বসো কামেহি ৱিনিৱত্তিতমানসো অহং, তস্মা ন মে অত্থো কুমাৰীহি. কপ্পিযকাৰককম্মৱসেনপি হি মাদিসানং ইত্থীহি পযোজনং নাম নত্থি, পগেৱ ৰাগৱসেন, তস্মা ন মে অত্থো কুমাৰীহীতি. কুমাৰিগ্গহণঞ্চেত্থ উপলক্খণং দট্ঠব্বং. মাদিসস্স নাম সন্তিকে এৱং পটিপজ্জাহীতি অযুত্তকাৰিনীহি যাৱ অপৰদ্ধঞ্চ তুম্হেহি সমানজ্ঝাসযানং পুৰতো অযং কিৰিযা সোভেয্যাতি দস্সেন্তো আহ ‘‘যেসং অত্থো তহিং গচ্ছথ নাৰিযো’’তি. তত্থ যেসন্তি কামেসু অৱীতৰাগানং. অত্থোতি পযোজনং. তহিন্তি তত্থ তেসং সন্তিকং. নাৰিযোতি আলপনং. তং সুত্ৱা ইত্থিযো মঙ্কুভূতা পত্তক্খন্ধা আগতমগ্গেনেৱ গতা. এত্থ চ ‘‘ন মে অত্থো কুমাৰীহী’’তি কামেহি অনত্থিকভাৱৱচনেনেৱ থেৰেন অৰহত্তং ব্যাকতন্তি দট্ঠব্বং.

ৰমণীযকুটিকত্থেৰগাথাৱণ্ণনা নিট্ঠিতা.