১০. ৱিমলত্থেৰগাথাৱণ্ণনা

ধৰণী চ সিঞ্চতি ৱাতি আযস্মতো ৱিমলত্থেৰস্স গাথা. কা উপ্পত্তি? সোপি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযং কুসলং উপচিনন্তো ৱিপস্সিস্স ভগৱতো কালে সঙ্খধমনকুলে নিব্বত্তিত্ৱা ৱিঞ্ঞুতং পত্তো তস্মিং সিপ্পে নিপ্ফত্তিং গতো একদিৱসং ৱিপস্সিং ভগৱন্তং পস্সিত্ৱা পসন্নমানসো সঙ্খধমনেন পূজং কত্ৱা ততো পট্ঠায কালেন কালং সত্থু উপট্ঠানং অকাসি. সো তেন পুঞ্ঞকম্মেন দেৱলোকে নিব্বত্তিত্ৱা অপৰাপৰং পুঞ্ঞানি কত্ৱা দেৱমনুস্সেসু সংসৰন্তো কস্সপস্স ভগৱতো কালে ‘‘অনাগতে মে ৱিমলো ৱিসুদ্ধো কাযো হোতূ’’তি বোধিৰুক্খং গন্ধোদকেহি ন্হাপেসি, চেতিযঙ্গণবোধিযঙ্গণেসু আসনানি ধোৱাপেসি, ভিক্খূনম্পি কিলিট্ঠে সমণপৰিক্খাৰে ধোৱাপেসি.

সো ততো চৱিত্ৱা দেৱেসু চ মনুস্সেসু চ পৰিৱত্তেন্তো ইমস্মিং বুদ্ধুপ্পাদে ৰাজগহে ইব্ভকুলে নিব্বত্তি. তস্স মাতুকুচ্ছিযং ৱসন্তস্স নিক্খমন্তস্স চ কাযো পিত্তসেম্হাদীহি অসংকিলিট্ঠো পদুমপলাসে উদকবিন্দু ৱিয অলগ্গো পচ্ছিমভৱিকবোধিসত্তস্স ৱিয সুৱিসুদ্ধো অহোসি, তেনস্স ৱিমলোত্ৱেৱ নামং অকংসু. সো ৱযপ্পত্তো ৰাজগহপ্পৱেসনে বুদ্ধানুভাৱং দিস্ৱা পটিলদ্ধসদ্ধো পব্বজিত্ৱা কম্মট্ঠানং গহেত্ৱা কোসলৰট্ঠে পব্বতগুহাযং ৱিহৰতি. অথেকদিৱসং চাতুদ্দীপিকমহামেঘো সকলং চক্কৱাড়গব্ভং পত্থৰিত্ৱা পাৱস্সি. ৱিৱট্টট্ঠাযিম্হি বুদ্ধানং চক্কৱত্তীনঞ্চ ধৰমানকালে এৱ কিৰ এৱং ৱস্সতি. ঘম্মপৰিড়াহৱূপসমতো উতুসপ্পাযলাভেন থেৰস্স চিত্তং সমাহিতং অহোসি একগ্গং. সো সমাহিতচিত্তো তাৱদেৱ ৱিপস্সনং উস্সুক্কাপেত্ৱা মগ্গপটিপাটিযা অৰহত্তং পাপুণি. তেন ৱুত্তং অপদানে (অপ. থেৰ ১.১০.৫৬-৬০) –

‘‘ৱিপস্সিস্স ভগৱতো, অহোসিং সঙ্খধম্মকো;

নিচ্চুপট্ঠানযুত্তোম্হি, সুগতস্স মহেসিনো.

‘‘উপট্ঠানফলং পস্স, লোকনাথস্স তাদিনো;

সট্ঠি তূৰিযসহস্সানি, পৰিৱাৰেন্তি মং সদা.

‘‘একনৱুতিতো কপ্পে, উপট্ঠহিং মহাইসিং;

দুগ্গতিং নাভিজানামি, উপট্ঠানস্সিদং ফলং.

‘‘চতুৱীসে ইতো কপ্পে, মহানিগ্ঘোসনামকা;

সোড়সাসিংসু ৰাজানো, চক্কৱত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা কতকিচ্চতায তুট্ঠমানসো উদানং উদানেন্তো ‘‘ধৰণী চ সিঞ্চতি ৱাতি মালুতো’’তি গাথং অভাসি.

৫০. তত্থ ধৰণীতি পথৱী, সা হি সকলং ধৰাধৰং ধাৰেতীতি ‘‘ধৰণী’’তি ৱুচ্চতি. সিঞ্চতীতি সমন্ততো নভং পূৰেত্ৱা অভিপ্পৱস্সতো মহামেঘস্স ৱুট্ঠিধাৰাহি সিঞ্চতি. ৱাতি মালুতোতি উদকফুসিতসম্মিস্সতায সীতলো ৱাতো ৱাযতি. ৱিজ্জুতা চৰতি নভেতি তত্থ তত্থ গজ্জতা গড়গড়াযতা মহামেঘতো নিচ্ছৰন্তিযো সতেৰতা আকাসে ইতো চিতো চ ৱিচৰন্তি. উপসমন্তি ৱিতক্কাতি উতুসপ্পাযসিদ্ধেন সমথৱিপস্সনাধিগমেন পুব্বভাগে তদঙ্গাদিৱসেন ৱূপসন্তা হুত্ৱা কামৱিতক্কাদযো সব্বেপি নৱ মহাৱিতক্কা অৰিযমগ্গাধিগমেন উপসমন্তি. অনৱসেসতো সমুচ্ছিজ্জন্তীতি. ৱত্তমানসমীপতায অৰিযমগ্গক্খণং ৱত্তমানং কত্ৱা ৱদতি. অতীতত্থে ৱা এতং পচ্চুপ্পন্নৱচনং. চিত্তং সুসমাহিতং মমাতি ততো এৱ লোকুত্তৰসমাধিনা মম চিত্তং সুট্ঠু সমাহিতং, ন দানি তস্স সমাধানে কিঞ্চি কাতব্বং অত্থীতি থেৰো অঞ্ঞং ব্যাকাসি.

ৱিমলত্থেৰগাথাৱণ্ণনা নিট্ঠিতা.

পঞ্চমৱগ্গৱণ্ণনা নিট্ঠিতা.