১০. ৱড্ঢমানত্থেৰগাথাৱণ্ণনা

সত্তিযা ৱিয ওমট্ঠোতি আযস্মতো ৱড্ঢমানত্থেৰস্স গাথা. কা উপ্পত্তি? অযম্পি কিৰ পুৰিমবুদ্ধেসু কতাধিকাৰো ইতো দ্ৱেনৱুতে কপ্পে তিস্সস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো তিস্সং ভগৱন্তং পিণ্ডায চৰন্তং দিস্ৱা পসন্নমানসো সুপৰিপক্কানি ৱণ্টতো মুত্তানি অম্বফলানি অদাসি. সো তেন পুঞ্ঞকম্মেন দেৱলোকে নিব্বত্তো অপৰাপৰং পুঞ্ঞকম্মানি উপচিনন্তো ইমস্মিং বুদ্ধুপ্পাদে ৱেসালিযং লিচ্ছৱিৰাজকুলে নিব্বত্তি, ৱড্ঢমানোতিস্স নামং অহোসি. সো ৱযপ্পত্তো সদ্ধো পসন্নো দাযকো দানৰতো কাৰকো সঙ্ঘুপট্ঠাকো হুত্ৱা তথাৰূপে অপৰাধে সত্থাৰা পত্তনিক্কুজ্জনকম্মে কাৰাপিতে অগ্গিং অক্কন্তো ৱিয সঙ্ঘং খমাপেত্ৱা কম্মং পটিপ্পস্সম্ভেত্ৱা সঞ্জাতসংৱেগো পব্বজি, পব্বজিত্ৱা পন থিনমিদ্ধাভিভূতো ৱিহাসি. তং সত্থা সংৱেজেন্তো ‘‘সত্তিযা ৱিয ওমট্ঠো’’তি গাথং অভাসি.

৪০. তত্থ ভৱৰাগপ্পহানাযাতি ভৱৰাগস্স ৰূপৰাগস্স অৰূপৰাগস্স চ পজহনত্থায. যদিপি অজ্ঝত্তসংযোজনানি অপ্পহায বহিদ্ধসংযোজনানং পহানং নাম নত্থি, নানন্তৰিকভাৱতো পন উদ্ধম্ভাগিযসংযোজনপ্পহানৱচনেন ওৰম্ভাগিযসংযোজনপ্পহানম্পি ৱুত্তমেৱ হোতি. যস্মা ৱা সমুচ্ছিন্নোৰম্ভাগিযসংযোজনানম্পি কেসঞ্চি অৰিযানং উদ্ধম্ভাগিযসংযোজনানি দুপ্পহেয্যানি হোন্তি, তস্মা সুপ্পহেয্যতো দুপ্পহেয্যমেৱ দস্সেন্তো ভগৱা ভৱৰাগপ্পহানসীসেন সব্বস্সাপি উদ্ধম্ভাগিযসংযোজনস্স পহানমাহ. থেৰস্স এৱ ৱা অজ্ঝাসযৱসেনেৱং ৱুত্তং. সেসং ৱুত্তনযমেৱ.

ৱড্ঢমানত্থেৰগাথাৱণ্ণনা নিট্ঠিতা.

চতুত্থৱগ্গৱণ্ণনা নিট্ঠিতা.