১০. অজিতত্থেৰগাথাৱণ্ণনা

মৰণে মে ভযং নত্থীতি আযস্মতো অজিতত্থেৰস্স গাথা. কা উপ্পত্তি? সো কিৰ একনৱুতে কপ্পে ৱিপস্সিং ভগৱন্তং পস্সিত্ৱা পসন্নচিত্তো কপিত্থফলং অদাসি. ততো পৰম্পি তং তং পুঞ্ঞং কত্ৱা দেৱমনুস্সেসু সংসৰন্তো ইমস্মিং কপ্পে অনুপ্পন্নে এৱ অম্হাকং সত্থৰি সাৱত্থিযং মহাকোসলৰঞ্ঞো অগ্গাসনিযস্স ব্ৰাহ্মণস্স পুত্তো হুত্ৱা নিব্বত্তি. তস্স অজিতোতি নামং অহোসি. তস্মিঞ্চ সমযে সাৱত্থিৱাসী বাৱৰী নাম ব্ৰাহ্মণো তীহি মহাপুৰিসলক্খণেহি সমন্নাগতো তিণ্ণং ৱেদানং পাৰগূ সাৱত্থিতো নিক্খমিত্ৱা তাপসপব্বজ্জং পব্বজিত্ৱা গোধাৱৰীতীৰে কপিত্থাৰামে ৱসতি. অথ অজিতো তস্স সন্তিকে পব্বজিতো অত্থকামায দেৱতায চোদিতেন বাৱৰিনা সত্থু সন্তিকং পেসিতো তিস্সমেত্তেয্যাদীহি সদ্ধিং ভগৱন্তং উপসঙ্কমিত্ৱা মনসাৱ পঞ্হে পুচ্ছিত্ৱা তেসু ৱিস্সজ্জিতেসু পসন্নচিত্তো সত্থু সন্তিকে পব্বজিত্ৱা কম্মট্ঠানং গহেত্ৱা ৱিপস্সনং ৱড্ঢেত্ৱা অৰহত্তং পাপুণি. তেন ৱুত্তং অপদানে (অপ. থেৰ ২.৫২.৭-১১) –

‘‘সুৱণ্ণৱণ্ণং সম্বুদ্ধং, আহুতীনং পটিগ্গহং;

ৰথিযং পটিপজ্জন্তং, কপিত্থং অদদিং ফলং.

‘‘একনৱুতিতো কপ্পে, যং ফলং অদদিং দদা;

দুগ্গতিং নাভিজানামি, ফলদানস্সিদং ফলং.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্তো সীহনাদং নদন্তো ‘‘মৰণে মে ভযং নত্থী’’তি গাথং অভাসি.

২০. তত্থ মৰণেতি মৰণনিমিত্তং মৰণহেতু. মেতি ময্হং, ভযং নত্থি উচ্ছিন্নভৱমূলতায পৰিক্খীণজাতিকত্তা. অনুচ্ছিন্নভৱমূলানঞ্হি ‘‘কীদিসী নু খো ময্হং আযতিং উপ্পত্তী’’তি মৰণতো ভযং ভৱেয্য. নিকন্তীতি অপেক্খা তণ্হা, সা নত্থি জীৱিতে সুপৰিমদ্দিতসঙ্খাৰতায উপাদানক্খন্ধানং দুক্খাসাৰকাদিভাৱেন সুট্ঠু উপট্ঠহনতো. এৱংভূতো চাহং সন্দেহং সৰীৰং, সকং ৱা দেহং দেহসঙ্খাতং দুক্খভাৰং নিক্খিপিস্সামি ছড্ডেস্সামি, নিক্খিপন্তো চ ‘‘‘ইমিনা সৰীৰকেন সাধেতব্বং সাধিতং, ইদানি তং একংসেন ছড্ডনীযমেৱা’তি পঞ্ঞাৱেপুল্লপ্পত্তিযা সম্পজানো সতিৱেপুল্লপ্পত্তিযা পটিস্সতো নিক্খিপিস্সামী’’তি. ইমং পন গাথং ৱত্ৱা থেৰো ঝানং সমাপজ্জিত্ৱা তদনন্তৰং পৰিনিব্বাযীতি.

অজিতত্থেৰগাথাৱণ্ণনা নিট্ঠিতা.

দুতিযৱগ্গৱণ্ণনা নিট্ঠিতা.