৯. উত্তিযত্থেৰগাথাৱণ্ণনা

সদ্দং সুত্ৱা সতি মুট্ঠাতি আযস্মতো উত্তিযত্থেৰস্স গাথা. কা উপ্পত্তি? অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযং পুঞ্ঞং উপচিনন্তো সুমেধস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো একদিৱসং সত্থাৰং দিস্ৱা পসন্নচিত্তো গোনকাদিঅত্থতং সউত্তৰচ্ছদং বুদ্ধাৰহং পল্লঙ্কং গন্ধকুটিযং পঞ্ঞাপেত্ৱা অদাসি. সো তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে কপিলৱত্থুস্মিং সক্যৰাজকুলে নিব্বত্তি, তস্স উত্তিযোতি নামং অহোসি. সো ৱযপ্পত্তো সত্থু ঞাতিসমাগমে বুদ্ধানুভাৱং দিস্ৱা পটিলদ্ধসদ্ধো পব্বজিত্ৱা সমণধম্মং কৰোন্তো একদিৱসং নামং পিণ্ডায পৱিট্ঠো অন্তৰামগ্গে মাতুগামস্স গীতসদ্দং সুত্ৱা অযোনিসোমনসিকাৰৱসেন তত্থ ছন্দৰাগে উপ্পন্নে পটিসঙ্খানবলেন তং ৱিক্খম্ভেত্ৱা ৱিহাৰং পৱিসিত্ৱা সঞ্জাতসংৱেগো দিৱাট্ঠানে নিসীদিত্ৱা তাৱদেৱ ৱিপস্সনং ৱড্ঢেত্ৱা অৰহত্তং পাপুণি. তেন ৱুত্তং অপদানে (অপ. থেৰ ১.১৫.৪৮-৫২) –

‘‘সুমেধস্স ভগৱতো, লোকজেট্ঠস্স তাদিনো;

পল্লঙ্কো হি মযা দিন্নো, সউত্তৰসপচ্ছদো.

‘‘সত্তৰতনসম্পন্নো, পল্লঙ্কো আসি সো তদা;

মম সঙ্কপ্পমঞ্ঞায, নিব্বত্ততি সদা মম.

‘‘তিংসকপ্পসহস্সম্হি, পল্লঙ্কমদদিং তদা;

দুগ্গতিং নাভিজানামি, পল্লঙ্কস্স ইদং ফলং.

‘‘ৱীসকপ্পসহস্সম্হি, সুৱণ্ণাভা তযো জনা;

সত্তৰতনসম্পন্না, চক্কৱত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা অত্তনো কিলেসুপ্পত্তিনিদস্সনেন ‘‘কিলেসে অজিগুচ্ছন্তস্স নত্থি ৱট্টদুক্খতো সীসুক্খিপনং, অহং পন তে জিগুচ্ছিমেৱা’’তি দস্সেন্তো –

৯৯. ‘‘সদ্দং সুত্ৱা সতি মুট্ঠা, পিযং নিমিত্তং মনসিকৰোতো;

সাৰত্তচিত্তো ৱেদেতি, তঞ্চ অজ্ঝোস তিট্ঠতি;

তস্স ৱড্ঢন্তি আসৱা, সংসাৰ উপগামিনো’’তি. – গাথং অভাসি;

তত্থ সদ্দন্তি ৰজ্জনীযং সদ্দাৰম্মণং, সংসাৰউপগামিনোতি –

‘‘খন্ধানঞ্চ পটিপাটি, ধাতুআযতনান চ;

অব্বোচ্ছিন্নং ৱত্তমানা, সংসাৰোতি পৱুচ্চতী’’তি. –

এৱং ৱুত্তসংসাৰৱট্টকাৰণং হুত্ৱা উপগমেন্তীতি সংসাৰউপগামিনো, ‘‘সংসাৰূপগামিনো’’তি ৱা পাঠো. সেসং অনন্তৰগাথায ৱুত্তনযমেৱ.

উত্তিযত্থেৰগাথাৱণ্ণনা নিট্ঠিতা.