৮. অভযত্থেৰগাথাৱণ্ণনা

ৰূপং দিস্ৱা সতি মুট্ঠাতি আযস্মতো অভযত্থেৰস্স গাথা. কা উপ্পত্তি? সোপি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযং পুঞ্ঞং উপচিনন্তো সুমেধস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো একদিৱসং সুমেধং ভগৱন্তং দিস্ৱা পসন্নচিত্তো সড়লপুপ্ফেহি পূজমকাসি. সো তেন পুঞ্ঞকম্মেন দেৱেসু নিব্বত্তিত্ৱা অপৰাপৰং পুঞ্ঞানি কত্ৱা সুগতীসুযেৱ সংসৰন্তো ইমস্মিং বুদ্ধুপ্পাদে সাৱত্থিযং ব্ৰাহ্মণকুলে নিব্বত্তিত্ৱা অভযোতি লদ্ধনামো ৱিঞ্ঞুতং পত্তো হেতুসম্পত্তিযা চোদিযমানো একদিৱসং ৱিহাৰং গতো সত্থু ধম্মদেসনং সুত্ৱা পটিলদ্ধসদ্ধো পব্বজিত্ৱা কতপুব্বকিচ্চো ৱিপস্সনায কম্মং কৰোন্তো ৱিহৰতি. অথস্স একদিৱসং গামং পিণ্ডায পৱিট্ঠস্স অলঙ্কতপটিযত্তং মাতুগামং দিস্ৱা অযোনিসোমনসিকাৰৱসেন তস্স ৰূপং আৰব্ভ ছন্দৰাগো উপ্পজ্জি, সো ৱিহাৰং পৱিসিত্ৱা ‘‘সতিং ৱিস্সজ্জিত্ৱা ওলোকেন্তস্স ৰূপাৰম্মণে ময্হং কিলেসো উপ্পন্নো, অযুত্তং মযা কত’’ন্তি অত্তনো চিত্তং নিগ্গণ্হন্তো তাৱদেৱ ৱিপস্সনং ৱড্ঢেত্ৱা অৰহত্তং পাপুণি. তেন ৱুত্তং অপদানে (অপ. থেৰ ১.১৫.৪৩-৪৭) –

‘‘সুমেধো নাম নামেন, সযম্ভূ অপৰাজিতো;

ৱিৱেকমনুব্ৰূহন্তো, অজ্ঝোগহি মহাৱনং.

‘‘সড়লং পুপ্ফিতং দিস্ৱা, গন্থিত্ৱান ৱটংসকং;

বুদ্ধস্স অভিৰোপেসিং, সম্মুখা লোকনাযকং.

‘‘তিংসকপ্পসহস্সম্হি, যং পুপ্ফমভিৰোপযিং;

দুগ্গতিং নাভিজানামি, বুদ্ধপূজাযিদং ফলং.

‘‘ঊনৱীসে কপ্পসতে, সোড়সাসুং সুনিম্মিতা;

সত্তৰতনসম্পন্না, চক্কৱত্তী মহব্বলা.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা অত্তনো কিলেসুপ্পত্তিনিদস্সনেন ‘‘কিলেসে অনুৱত্তেন্তস্স ৱট্টদুক্খতো নত্থেৱ সীসুক্খিপনং. অহং পন তে নানুৱত্তি’’ন্তি দস্সেন্তো –

৯৮. ‘‘ৰূপং দিস্ৱা সতি মুট্ঠা, পিযং নিমিত্তং মনসিকৰোতো;

সাৰত্তচিত্তো ৱেদেতি, তঞ্চ অজ্ঝোস তিট্ঠতি;

তস্স ৱড্ঢন্তি আসৱা, ভৱমূলোপগামিনো’’তি. – গাথং অভাসি;

তত্থ ৰূপন্তি ৰজ্জনীযং ৰূপাযতনং, তং পনেত্থ ইত্থিৰূপং অধিপ্পেতং. দিস্ৱাতি চক্খুনা দিস্ৱা, চক্খুদ্ৱাৰানুসাৰেন নিমিত্তানুব্যঞ্জনসল্লক্খণৱসেন তং গহেত্ৱা, তস্স তথাগহণহেতূতি অত্থো. সতি মুট্ঠাতি অসুভসভাৱে কাযে ‘‘অসুভ’’ন্ত্ৱেৱ পৱত্তনসতি নট্ঠা. যথা পন ৰূপং দিস্ৱা সতি নট্ঠা, তং দস্সেন্তো আহ ‘‘পিযং নিমিত্তং মনসিকৰোতো’’তি. যথাউপট্ঠিতং আৰম্মণং ‘‘সুভং সুখ’’ন্তিআদিনা পিযনিমিত্তং কত্ৱা অযোনিসোমনসিকাৰেন মনসিকৰোতো সতি মুট্ঠাতি যোজনা. তথা ভূতোৱ সাৰত্তচিত্তো ৱেদেতীতি সুট্ঠু ৰত্তচিত্তো হুত্ৱা তং ৰূপাৰম্মণং অনুভৱতি অভিনন্দতি, অভিনন্দন্তো পন তঞ্চ অজ্ঝোস তিট্ঠতি অজ্ঝোসায তং আৰম্মণং গিলিত্ৱা পৰিনিট্ঠপেত্ৱা ৱত্ততি চেৱ, এৱংভূতস্স চ তস্স ৱড্ঢন্তি আসৱা ভৱমূলোপগামিনোতি ভৱস্স সংসাৰস্স মূলভাৱং কাৰণভাৱং উপগমনসভাৱা কামাসৱাদযো চত্তাৰোপি আসৱা তস্স পুগ্গলস্স উপৰূপৰি ৱড্ঢন্তিযেৱ, ন হাযন্তি. ময্হং পন পটিসঙ্খানে ঠত্ৱা ৱিপস্সনং ৱড্ঢেত্ৱা সচ্চানি পটিৱিজ্ঝন্তস্স মগ্গপটিপাটিযা তে চত্তাৰোপি আসৱা অনৱসেসতো পহীনা পৰিক্খীণাতি অধিপ্পাযো.

অভযত্থেৰগাথাৱণ্ণনা নিট্ঠিতা.