৪. মেত্তজিত্থেৰগাথাৱণ্ণনা

নমো হি তস্স ভগৱতোতি আযস্মতো মেত্তজিত্থেৰস্স গাথা. কা উপ্পত্তি? সো কিৰ অনোমদস্সিস্স ভগৱতো কালে কুলগেহে নিব্বত্তিত্ৱা ৱিঞ্ঞুতং পত্তো সাসনে অভিপ্পসন্নো হুত্ৱা বোধিৰুক্খস্স ইট্ঠকাহি ৱেদিকং চিনিত্ৱা সুধাপৰিকম্মং কাৰেসি. সত্থা তস্স অনুমোদনং অকাসি. সো তেন পুঞ্ঞকম্মেন দেৱলোকে নিব্বত্তিত্ৱা অপৰাপৰং পুঞ্ঞানি কত্ৱা দেৱমনুস্সেসু সংসৰন্তো ইমস্মিং বুদ্ধুপ্পাদে মগধৰট্ঠে অঞ্ঞতৰস্স ব্ৰাহ্মণস্স পুত্তো হুত্ৱা নিব্বত্তি, মেত্তজীতিস্স নামং অহোসি. সো ৱযপ্পত্তো কামেসু আদীনৱং দিস্ৱা তাপসপব্বজ্জং পব্বজিত্ৱা অৰঞ্ঞে ৱিহৰন্তো বুদ্ধুপ্পাদং সুত্ৱা পুব্বহেতুনা চোদিযমানো সত্থু সন্তিকং গন্ত্ৱা পৱত্তিনিৱত্তিযো আৰব্ভ পঞ্হং পুচ্ছিত্ৱা সত্থাৰা পঞ্হে ৱিস্সজ্জিতে পটিলদ্ধসদ্ধো পব্বজিত্ৱা ৱিপস্সনং পট্ঠপেত্ৱা অৰহত্তং পাপুণি. তেন ৱুত্তং অপদানে (অপ. থেৰ ১.১৫.২৬-৩১) –

‘‘অনোমদস্সীমুনিনো, বোধিৱেদিমকাসহং;

সুধায পিণ্ডং দত্ৱান, পাণিকম্মং অকাসহং.

‘‘দিস্ৱা তং সুকতং কম্মং, অনোমদস্সী নৰুত্তমো;

ভিক্খুসঙ্ঘে ঠিতো সত্থা, ইমা গাথা অভাসথ.

‘‘ইমিনা সুধকম্মেন, চেতনাপণিধীহি চ;

সম্পত্তিং অনুভোত্ৱান, দুক্খস্সন্তং কৰিস্সতি.

‘‘পসন্নমুখৱণ্ণোম্হি, একগ্গো সুসমাহিতো;

ধাৰেমি অন্তিমং দেহং, সম্মাসম্বুদ্ধসাসনে.

‘‘ইতো কপ্পসতে আসিং, পৰিপুণ্ণে অনূনকে;

ৰাজা সব্বঘনো নাম, চক্কৱত্তী মহব্বলো.

‘‘কিলেসা ঝাপিতা ময্হং…পে… কতং বুদ্ধস্স সাসন’’ন্তি.

অৰহত্তং পন পত্ৱা সত্থাৰং থোমেন্তো –

৯৪. ‘‘নমো হি তস্স ভগৱতো, সক্যপুত্তস্স সিৰীমতো;

তেনাযং অগ্গপ্পত্তেন, অগ্গধম্মো সুদেসিতো’’তি. – গাথং অভাসি;

তত্থ নমোতি নমক্কাৰো. হীতি নিপাতমত্তং. তস্সাতি যো সো ভগৱা সমত্তিংসপাৰমিযো পূৰেত্ৱা সব্বকিলেসে ভঞ্জিত্ৱা অনুত্তৰং সম্মাসম্বোধিং অভিসম্বুদ্ধো, সক্যৰাজস্স পুত্তোতি সক্যপুত্তো. অনঞ্ঞসাধাৰণায পুঞ্ঞসম্পত্তিযা চ সম্ভাৱিতো উত্তমায ৰূপকাযসিৰিযা ধম্মকাযসিৰিযা চ সমন্নাগতত্তা সিৰীমা, তস্স ভগৱতো সক্যপুত্তস্স সিৰীমতো নমো অত্থু, তং নমামীতি অত্থো. তেনাতি তেন ভগৱতা. অযন্তি তস্স ধম্মস্স অত্তনো পচ্চক্খতায ৱদতি. অগ্গপ্পত্তেনাতি অগ্গং সব্বঞ্ঞুতং, সব্বেহি ৱা গুণেহি অগ্গভাৱং সেট্ঠভাৱং পত্তেন. অগ্গধম্মোতি অগ্গো উত্তমো নৱৱিধলোকুত্তৰো ধম্মো সুট্ঠু অৱিপৰীতং দেসিতো পৱেদিতোতি.

মেত্তজিত্থেৰগাথাৱণ্ণনা নিট্ঠিতা.