১৪. লোকৱাদপটিসংযুত্তদিট্ঠিনিদ্দেসৱণ্ণনা

১৪৭. অত্তা চ লোকো চাতি সো এৱ অত্তা চ আলোকনট্ঠেন লোকো চাতি অত্থো. সস্সতোতি সস্সতৱাদানং দিট্ঠি. অসস্সতোতি উচ্ছেদৱাদানং. সস্সতো চ অসস্সতো চাতি একচ্চসস্সতিকানং. নেৱ সস্সতো নাসস্সতোতি অমৰাৱিক্খেপিকানং. অন্তৱাতি পৰিত্তকসিণলাভীনং তক্কিকানঞ্চ নিগণ্ঠাজীৱিকানঞ্চ. অথ ৱা উচ্ছেদৱাদিনো ‘‘সত্তো জাতিযা পুব্বন্তৱা, মৰণেন অপৰন্তৱা’’তি ৱদন্তি. অধিচ্চসমুপ্পন্নিকা ‘‘সত্তো জাতিযা পুব্বন্তৱা’’তি ৱদন্তি. অনন্তৱাতি অপ্পমাণকসিণলাভীনং. সস্সতৱাদিনো পন ‘‘পুব্বন্তাপৰন্তা নত্থি, তেন অনন্তৱা’’তি ৱদন্তি. অধিচ্চসমুপ্পন্নিকা ‘‘অপৰন্তেন অনন্তৱা’’তি ৱদন্তি.

অন্তৱা চ অনন্তৱা চাতি উদ্ধমধো অৱড্ঢিত্ৱা তিৰিযং ৱড্ঢিতকসিণানং. নেৱ অন্তৱা ন অনন্তৱাতি অমৰাৱিক্খেপিকানং.

লোকৱাদপটিসংযুত্তদিট্ঠিনিদ্দেসৱণ্ণনা নিট্ঠিতা.