৭. সাৰিপুত্তত্থেৰৱত্থু

ন ব্ৰাহ্মণস্সাতি ইমং ধম্মদেসনং সত্থা জেতৱনে ৱিহৰন্তো সাৰিপুত্তত্থেৰং আৰব্ভ কথেসি.

একস্মিং কিৰ ঠানে সম্বহুলা মনুস্সা ‘‘অহো অম্হাকং, অয্যো, খন্তিবলেন সমন্নাগতো, অঞ্ঞেসু অক্কোসন্তেসু ৱা পহৰন্তেসু ৱা কোপমত্তম্পি নত্থী’’তি থেৰস্স গুণে কথযিংসু. অথেকো মিচ্ছাদিট্ঠিকো ব্ৰাহ্মণো ‘‘কো এস ন কুজ্ঝতী’’তি পুচ্ছি. ‘‘অম্হাকং থেৰো’’তি. ‘‘নং কুজ্ঝাপেন্তো ন ভৱিস্সতী’’তি? ‘‘নত্থেতং, ব্ৰাহ্মণা’’তি. ‘‘তেন হি অহং নং কুজ্ঝাপেস্সামী’’তি? ‘‘সচে সক্কোসি, কুজ্ঝাপেহী’’তি. সো ‘‘হোতু, জানিস্সামিস্স কত্তব্ব’’ন্তি থেৰং ভিক্খায পৱিট্ঠং দিস্ৱা পচ্ছাভাগেন গন্ত্ৱা পিট্ঠিমজ্ঝে মহন্তং পাণিপ্পহাৰমদাসি. থেৰো ‘‘কিং নামেত’’ন্তি অনোলোকেত্ৱাৱ গতো. ব্ৰাহ্মণস্স সকলসৰীৰে ডাহো উপ্পজ্জি. সো ‘‘অহো গুণসম্পন্নো, অয্যো’’তি থেৰস্স পাদমূলে নিপজ্জিত্ৱা ‘‘খমথ মে, ভন্তে’’তি ৱত্ৱা ‘‘কিং এত’’ন্তি চ ৱুত্তে ‘‘অহং ৱীমংসনত্থায তুম্হে পহৰি’’ন্তি আহ. ‘‘হোতু খমামি তে’’তি. ‘‘সচে মে, ভন্তে, খমথ, মম গেহেযেৱ নিসীদিত্ৱা ভিক্খং গণ্হথা’’তি থেৰস্স পত্তং গণ্হি, থেৰোপি পত্তং অদাসি. ব্ৰাহ্মণো থেৰং গেহং নেত্ৱা পৰিৱিসি.

মনুস্সা কুজ্ঝিত্ৱা ‘‘ইমিনা অম্হাকং নিৰপৰাধো অয্যো পহটো, দণ্ডেনপিস্স মোক্খো নত্থি, এত্থেৱ নং মাৰেস্সামা’’তি লেড্ডুদণ্ডাদিহত্থা ব্ৰাহ্মণস্স গেহদ্ৱাৰে অট্ঠংসু. থেৰো উট্ঠায গচ্ছন্তো ব্ৰাহ্মণস্স হত্থে পত্তং অদাসি. মনুস্সা তং থেৰেন সদ্ধিং গচ্ছন্তং দিস্ৱা, ‘‘ভন্তে, তুম্হাকং পত্তং গহেত্ৱা ব্ৰাহ্মণং নিৱত্তেথা’’তি আহংসু. কিং এতং উপাসকাতি? ব্ৰাহ্মণেন তুম্হে পহটা, মযমস্স কত্তব্বং জানিস্সামাতি. কিং পন তুম্হে ইমিনা পহটা, উদাহু অহন্তি? তুম্হে, ভন্তেতি. ‘‘মং এস পহৰিত্ৱা খমাপেসি, গচ্ছথ তুম্হে’’তি মনুস্সে উয্যোজেত্ৱা ব্ৰাহ্মণং নিৱত্তাপেত্ৱা থেৰো ৱিহাৰমেৱ গতো. ভিক্খূ উজ্ঝাযিংসু ‘‘কিং নামেতং সাৰিপুত্তত্থেৰো যেন ব্ৰাহ্মণেন পহটো, তস্সেৱ গেহে নিসীদিত্ৱা ভিক্খং গহেত্ৱা আগতো. থেৰস্স পহটকালতো পট্ঠায ইদানি সো কস্স লজ্জিস্সতি, অৱসেসে পোথেন্তো ৱিচৰিস্সতী’’তি. সত্থা আগন্ত্ৱা ‘‘কায নুত্থ, ভিক্খৱে, এতৰহি কথায সন্নিসিন্না’’তি পুচ্ছিত্ৱা ‘‘ইমায নামা’’তি ৱুত্তে, ‘‘ভিক্খৱে, ব্ৰাহ্মণো ব্ৰাহ্মণং পহৰন্তো নাম নত্থি, গিহিব্ৰাহ্মণেন পন সমণব্ৰাহ্মণো পহটো ভৱিস্সতি, কোধো নামেস অনাগামিমগ্গেন সমুগ্ঘাতং গচ্ছতী’’তি ৱত্ৱা ধম্মং দেসেন্তো ইমা গাথা অভাসি –

৩৮৯. ‘‘ন ব্ৰাহ্মণস্স পহৰেয্য, নাস্স মুঞ্চেথ ব্ৰাহ্মণো;

ধী ব্ৰাহ্মণস্স হন্তাৰং, ততো ধী যস্স মুঞ্চতি.

৩৯০. ‘‘ন ব্ৰাহ্মণস্সেতদকিঞ্চি সেয্যো, যদা নিসেধো মনসো পিযেহি;

যতো যতো হিংসমনো নিৱত্ততি, ততো ততো সম্মতিমেৱ দুক্খ’’ন্তি.

তত্থ পহৰেয্যাতি ‘‘খীণাসৱব্ৰাহ্মণোহমস্মী’’তি জানন্তো খীণাসৱস্স ৱা অঞ্ঞতৰস্স ৱা জাতিব্ৰাহ্মণস্স ন পহৰেয্য. নাস্স মুঞ্চেথাতি সোপি পহটো খীণাসৱব্ৰাহ্মণো অস্স পহৰিত্ৱা ঠিতস্স ৱেৰং ন মুঞ্চেথ, তস্মিং কোপং ন কৰেয্যাতি অত্থো. ধী ব্ৰাহ্মণস্সাতি খীণাসৱব্ৰাহ্মণস্স হন্তাৰং গৰহামি. ততো ধীতি যো পন তং পহৰন্তং পটিপহৰন্তো তস্স উপৰি ৱেৰং মুঞ্চতি, তং ততোপি গৰহামিযেৱ.

এতদকিঞ্চি সেয্যোতি যং খীণাসৱস্স অক্কোসন্তং ৱা অপচ্চক্কোসনং, পহৰন্তং ৱা অপ্পটিপহৰণং, এতং তস্স খীণাসৱব্ৰাহ্মণস্স ন কিঞ্চি সেয্যো, অপ্পমত্তকং সেয্যো ন হোতি, অধিমত্তমেৱ সেয্যোতি অত্থো. যদা নিসেধো মনসো পিযেহীতি কোধনস্স হি কোধুপ্পাদোৱ মনসো পিযো নাম. কোধো হি পনেস মাতাপিতূসুপি বুদ্ধাদীসুপি অপৰজ্ঝতি. তস্মা যো অস্স তেহি মনসো নিসেধো কোধৱসেন উপ্পজ্জমানস্স চিত্তস্স নিগ্গহো, এতং ন কিঞ্চি সেয্যোতি অত্থো. হিংসমনোতি কোধমনো. সো তস্স যতো যতো ৱত্থুতো অনাগামিমগ্গেন সমুগ্ঘাতং গচ্ছন্তো নিৱত্ততি. ততো ততোতি ততো ততো ৱত্থুতো সকলম্পি ৱট্টদুক্খং নিৱত্ততিযেৱাতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

সাৰিপুত্তত্থেৰৱত্থু সত্তমং.