৬. অঞ্ঞতৰব্ৰাহ্মণপব্বজিতৱত্থু

বাহিতপাপোতি ইমং ধম্মদেসনং সত্থা জেতৱনে ৱিহৰন্তো অঞ্ঞতৰং ব্ৰাহ্মণপব্বজিতং আৰব্ভ কথেসি.

একো কিৰ ব্ৰাহ্মণো বাহিৰকপব্বজ্জায পব্বজিত্ৱা ‘‘সমণো গোতমো অত্তনো সাৱকে ‘পব্বজিতা’তি ৱদতি, অহঞ্চম্হি পব্বজিতো, মম্পি খো এৱং ৱত্তুং ৱট্টতী’’তি চিন্তেত্ৱা সত্থাৰং উপসঙ্কমিত্ৱা এতমত্থং পুচ্ছি. সত্থা ‘‘নাহং এত্তকেন ‘পব্বজিতো’তি ৱদামি, কিলেসমলানং পন পব্বাজিতত্তা পব্বজিতো নাম হোতী’’তি ৱত্ৱা ইমং গাথমাহ –

৩৮৮. ‘‘বাহিতপাপোতি ব্ৰাহ্মণো, সমচৰিযা সমণোতি ৱুচ্চতি;

পব্বাজযমত্তনো মলং, তস্মা পব্বজিতোতি ৱুচ্চতী’’তি.

তত্থ সমচৰিযাতি সব্বাকুসলানি সমেত্ৱা চৰণেন. তস্মাতি যস্মা বাহিতপাপতায ব্ৰাহ্মণো, অকুসলানি সমেত্ৱা চৰণেন সমণোতি ৱুচ্চতি, তস্মা যো অত্তনো ৰাগাদিমলং পব্বাজযন্তো ৱিনোদেন্তো চৰতি, সোপি তেন পব্বাজনেন পব্বজিতোতি ৱুচ্চতীতি অত্থো.

দেসনাৱসানে সো ব্ৰাহ্মণপব্বজিতো সোতাপত্তিফলে পতিট্ঠহি, সম্পত্তানম্পি সাত্থিকা ধম্মদেসনা অহোসীতি.

অঞ্ঞতৰব্ৰাহ্মণপব্বজিতৱত্থু ছট্ঠং.