৩১. সীৱলিত্থেৰৱত্থু

যো ইমন্তি ইমং ধম্মদেসনং সত্থা কুণ্ডকোলিযং নিস্সায কুণ্ডধানৱনে ৱিহৰন্তো সীৱলিত্থেৰং আৰব্ভ কথেসি.

একস্মিঞ্হি সমযে সুপ্পৱাসা নাম কোলিযধীতা সত্তৱস্সানি গব্ভং ধাৰেত্ৱা সত্তাহং মূড়্হগব্ভা দুক্খাহি তিব্বাহি কটুকাহি ৱেদনাহি ফুট্ঠা ‘‘সম্মাসম্বুদ্ধো ৱত সো ভগৱা, যো ইমস্স এৱৰূপস্স দুক্খস্স পহানায ধম্মং দেসেতি. সুপ্পটিপন্নো ৱত তস্স ভগৱতো সাৱকসঙ্ঘো, যো ইমস্স এৱৰূপস্স দুক্খস্স পহানায পটিপন্নো. সুসুখং ৱত তং নিব্বানং, যথিদং এৱৰূপং দুক্খং ন সংৱিজ্জতী’’তি (উদা. ১৮) ইমেহি তীহি ৱিতক্কেহি তং দুক্খং অধিৱাসেন্তী সামিকং সত্থু সন্তিকং পেসেত্ৱা তেন তস্সা ৱচনেন সত্থু ৱন্দনায আৰোচিতায ‘‘সুখিনী হোতু সুপ্পৱাসা কোলিযধীতা, অৰোগা অৰোগং পুত্তং ৱিজাযতূ’’তি সত্থাৰা ৱুত্তক্খণেযেৱ সুখিনী অৰোগা অৰোগং পুত্তং ৱিজাযিত্ৱা বুদ্ধপ্পমুখং ভিক্খুসঙ্ঘং নিমন্তেত্ৱা সত্তাহং মহাদানং অদাসি. পুত্তোপিস্সা জাতদিৱসতো পট্ঠায ধম্মকৰণং আদায সঙ্ঘস্স উদকং পৰিস্সাৱেসি. সো অপৰভাগে নিক্খমিত্ৱা পব্বজিতো অৰহত্তং পাপুণি.

অথেকদিৱসং ভিক্খূ ধম্মসভাযং কথং সমুট্ঠাপেসুং ‘‘পস্সথাৱুসো, এৱৰূপো নাম অৰহত্তস্স উপনিস্সযসম্পন্নো ভিক্খু এত্তকং কালং মাতুকুচ্ছিস্মিং দুক্খং অনুভোসি, কিমঙ্গং পন অঞ্ঞে, বহুং ৱত ইমিনা দুক্খং নিত্থিণ্ণ’’ন্তি. সত্থা আগন্ত্ৱা ‘‘কায নুত্থ, ভিক্খৱে, এতৰহি কথায সন্নিসিন্না’’তি পুচ্ছিত্ৱা ‘‘ইমায নামা’’তি ৱুত্তে ‘‘আম, ভিক্খৱে, মম পুত্তো এত্তকা দুক্খা মুচ্চিত্ৱা ইদানি নিব্বানং সচ্ছিকত্ৱা ৱিহৰতী’’তি ৱত্ৱা ইমং গাথমাহ –

৪১৪. ‘‘যোমং পলিপথং দুগ্গং, সংসাৰং মোহমচ্চগা;

তিণ্ণো পাৰঙ্গতো ঝাযী, অনেজো অকথংকথী;

অনুপাদায নিব্বুতো, তমহং ব্ৰূমি ব্ৰাহ্মণ’’ন্তি.

তস্সত্থো – যো ভিক্খু ইমং ৰাগপলিপথঞ্চেৱ কিলেসদুগ্গঞ্চ সংসাৰৱট্টঞ্চ চতুন্নং অৰিযসচ্চানং অপ্পটিৱিজ্ঝনকমোহঞ্চ অতীতো, চত্তাৰো ওঘে তিণ্ণো হুত্ৱা পাৰং অনুপ্পত্তো, দুৱিধেন ঝানেন ঝাযী, তণ্হায অভাৱেন অনেজো, কথংকথায অভাৱেন অকথংকথী, উপাদানানং অভাৱেন অনুপাদিযিত্ৱা কিলেসনিব্বানেন নিব্বুতো, তমহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

সীৱলিত্থেৰৱত্থু একতিংসতিমং.