২৬. অঞ্ঞতৰত্থেৰৱত্থু

যোধ দীঘন্তি ইমং ধম্মদেসনং সত্থা জেতৱনে ৱিহৰন্তো অঞ্ঞতৰত্থেৰং আৰব্ভ কথেসি.

সাৱত্থিযং কিৰেকো মিচ্ছাদিট্ঠিকো ব্ৰাহ্মণো সৰীৰগন্ধগহণভযেন উত্তৰসাটকং অপনেত্ৱা একমন্তে ঠপেত্ৱা গেহদ্ৱাৰাভিমুখো নিসীদি. অথেকো খীণাসৱো ভত্তকিচ্চং কত্ৱা ৱিহাৰং গচ্ছন্তো তং সাটকং দিস্ৱা ইতো চিতো চ ওলোকেত্ৱা কঞ্চি অপস্সন্তো ‘‘নিস্সামিকো অয’’ন্তি পংসুকূলং অধিট্ঠহিত্ৱা গণ্হি. অথ নং ব্ৰাহ্মণো দিস্ৱা অক্কোসন্তো উপসঙ্কমিত্ৱা ‘‘মুণ্ডক, সমণ, মম সাটকং গণ্হসী’’তি আহ. তৱেসো, ব্ৰাহ্মণাতি. আম, সমণাতি. ‘‘মযা কঞ্চি অপস্সন্তেন পংসুকূলসঞ্ঞায গহিতো, গণ্হ ন’’ন্তি তস্স দত্ৱা ৱিহাৰং গন্ত্ৱা ভিক্খূনং তমত্থং আৰোচেসি. অথস্স ৱচনং সুত্ৱা ভিক্খূ তেন সদ্ধিং কেড়িং কৰোন্তা ‘‘কিং নু খো, আৱুসো, সাটকো দীঘো ৰস্সো থূলো সণ্হো’’তি. আৱুসো, দীঘো ৱা হোতু ৰস্সো ৱা থূলো ৱা সণ্হো ৱা, নত্থি ময্হং তস্মিং আলযো, পংসুকূলসঞ্ঞায নং গণ্হিন্তি. তং সুত্ৱা ভিক্খূ তথাগতস্স আৰোচেসুং – ‘‘এস, ভন্তে, ভিক্খু অভূতং ৱত্ৱা অঞ্ঞং ব্যাকৰোতী’’তি. সত্থা ‘‘ভূতং, ভিক্খৱে, এস কথেতি, খীণাসৱা নাম পৰেসং সন্তকং ন গণ্হন্তী’’তি ৱত্ৱা ইমং গাথমাহ –

৪০৯. ‘‘যোধ দীঘং ৱ ৰস্সং ৱা, অণুং থূলং সুভাসুভং;

লোকে অদিন্নং নাদিযতি, তমহং ব্ৰূমি ব্ৰাহ্মণ’’ন্তি.

তস্সত্থো – সাটকাভৰণাদীসু দীঘং ৱা ৰস্সং ৱা মণিমুত্তাদীসু অণুং ৱা থূলং ৱা মহগ্ঘঅপ্পগ্ঘৱসেন সুভং ৱা অসুভং ৱা যো পুগ্গলো ইমস্মিং লোকে পৰপৰিগ্গহিতং নাদিযতি, তমহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

অঞ্ঞতৰত্থেৰৱত্থু ছব্বীসতিমং.