২৫. পিলিন্দৱচ্ছত্থেৰৱত্থু

অকক্কসন্তি ইমং ধম্মদেসনং সত্থা ৱেড়ুৱনে ৱিহৰন্তো পিলিন্দৱচ্ছত্থেৰং আৰব্ভ কথেসি.

সো কিৰাযস্মা ‘‘এহি, ৱসলি, যাহি, ৱসলী’’তিআদীনি ৱদন্তো গিহীপি পব্বজিতেপি ৱসলিৱাদেনেৱ সমুদাচৰতি. অথেকদিৱসং সম্বহুলা ভিক্খূ সত্থু আৰোচেসুং – ‘‘আযস্মা, ভন্তে, পিলিন্দৱচ্ছো ভিক্খূ ৱসলিৱাদেন সমুদাচৰতী’’তি. সত্থা তং পক্কোসাপেত্ৱা ‘‘সচ্চং কিৰ ত্ৱং পিলিন্দৱচ্ছ ভিক্খূ ৱসলিৱাদেন সমুদাচৰসী’’তি পুচ্ছিত্ৱা ‘‘এৱং, ভন্তে’’তি ৱুত্তে তস্সাযস্মতো পুব্বেনিৱাসং মনসিকৰিত্ৱা ‘‘মা খো তুম্হে, ভিক্খৱে, ৱচ্ছস্স ভিক্খুনো উজ্ঝাযিত্থ, ন, ভিক্খৱে, ৱচ্ছো দোসন্তৰো ভিক্খূ ৱসলিৱাদেন সমুদাচৰতি, ৱচ্ছস্স, ভিক্খৱে, ভিক্খুনো পঞ্চ জাতিসতানি অব্বোকিণ্ণানি সব্বানি তানি ব্ৰাহ্মণকুলে পচ্চাজাতানি, সো তস্স দীঘৰত্তং ৱসলিৱাদো সমুদাচিণ্ণো, খীণাসৱস্স নাম কক্কসং ফৰুসং পৰেসং মম্মঘট্টনৱচনমেৱ নত্থি. আচিণ্ণৱসেন হি মম পুত্তো এৱং কথেতী’’তি ৱত্ৱা ইমং গাথমাহ –

৪০৮. ‘‘অকক্কসং ৱিঞ্ঞাপনিং, গিৰং সচ্চমুদীৰযে;

যায নাভিসজে কঞ্চি, তমহং ব্ৰূমি ব্ৰাহ্মণ’’ন্তি.

তত্থ অকক্কসন্তি অফৰুসং. ৱিঞ্ঞাপনিন্তি অত্থৱিঞ্ঞাপনিং. সচ্চন্তি ভূতত্থং. নাভিসজেতি যায গিৰায অঞ্ঞং কুজ্ঝাপনৱসেন ন লগ্গাপেয্য, খীণাসৱো নাম এৱৰূপমেৱ গিৰং ভাসেয্য, তস্মা তমহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

পিলিন্দৱচ্ছত্থেৰৱত্থু পঞ্চৱীসতিমং.