২৪. মহাপন্থকত্থেৰৱত্থু

যস্স ৰাগো চাতি ইমং ধম্মদেসনং সত্থা ৱেড়ুৱনে ৱিহৰন্তো মহাপন্থকং আৰব্ভ কথেসি.

সো হাযস্মা চূড়পন্থকং চতূহি মাসেহি একং গাথং পগুণং কাতুং অসক্কোন্তং ‘‘ত্ৱং সাসনে অভব্বো, গিহিভোগাপি পৰিহীনো, কিং তে ইধ ৱাসেন, ইতো নিক্খমা’’তি ৱিহাৰা নিক্কড্ঢিত্ৱা দ্ৱাৰং থকেসি. ভিক্খূ কথং সমুট্ঠাপেসুং, ‘‘আৱুসো, মহাপন্থকত্থেৰেন ইদং নাম কতং, খীণাসৱানম্পি মঞ্ঞে কোধো উপ্পজ্জতী’’তি. সত্থা আগন্ত্ৱা ‘‘কায নুত্থ, ভিক্খৱে, এতৰহি কথায সন্নিসিন্না’’তি পুচ্ছিত্ৱা ‘‘ইমায নামা’’তি ৱুত্তে ‘‘ন, ভিক্খৱে, খীণাসৱানং ৰাগাদযো কিলেসা অত্থি, মম পুত্তেন অত্থপুৰেক্খাৰতায চেৱ ধম্মপুৰেক্খাৰতায চ কত’’ন্তি ৱত্ৱা ইমং গাথমাহ –

৪০৭. ‘‘যস্স ৰাগো চ দোসো চ, মানো মক্খো চ পাতিতো;

সাসপোৰিৱ আৰগ্গা, তমহং ব্ৰূমি ব্ৰাহ্মণ’’ন্তি.

তত্থ আৰগ্গাতি যস্সেতে ৰাগাদযো কিলেসা, অযঞ্চ পৰগুণমক্খনলক্খণো মক্খো আৰগ্গা সাসপো ৱিয পাতিতো, যথা সাসপো আৰগ্গে ন সন্তিট্ঠতি, এৱং চিত্তে ন সন্তিট্ঠতি, তমহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

মহাপন্থকত্থেৰৱত্থু চতুৱীসতিমং.