২৩. সামণেৰানং ৱত্থু

অৱিৰুদ্ধন্তি ইমং ধম্মদেসনং সত্থা জেতৱনে ৱিহৰন্তো চত্তাৰো সামণেৰে আৰব্ভ কথেসি.

একা কিৰ ব্ৰাহ্মণী চতুন্নং ভিক্খূনং উদ্দেসভত্তং সজ্জেত্ৱা ব্ৰাহ্মণং আহ – ‘‘ৱিহাৰং গন্ত্ৱা চত্তাৰো মহল্লকব্ৰাহ্মণে উদ্দিসাপেত্ৱা আনেহী’’তি. সো ৱিহাৰং গন্ত্ৱা ‘‘চত্তাৰো মে ব্ৰাহ্মণে উদ্দিসিত্ৱা দেথা’’তি আহ. তস্স সংকিচ্চো পণ্ডিতো সোপাকো ৰেৱতোতি সত্তৱস্সিকা চত্তাৰো খীণাসৱসামণেৰা পাপুণিংসু. ব্ৰাহ্মণী মহাৰহানি আসনানি পঞ্ঞাপেত্ৱা ঠিতা সামণেৰে দিস্ৱাৱ কুপিতা উদ্ধনে পক্খিত্তলোণং ৱিয তটতটাযমানা ‘‘ত্ৱং ৱিহাৰং গন্ত্ৱা অত্তনো নত্তুমত্তেপি অপ্পহোন্তে চত্তাৰো কুমাৰকে গহেত্ৱা আগতোসী’’তি ৱত্ৱা তেসং তেসু আসনেসু নিসীদিতুং অদত্ৱা নীচপীঠকানি অত্থৰিত্ৱা ‘‘এতেসু নিসীদথা’’তি ৱত্ৱা ‘‘গচ্ছ, ব্ৰাহ্মণ, মহল্লকে ওলোকেত্ৱা আনেহী’’তি আহ. ব্ৰাহ্মণো ৱিহাৰং গন্ত্ৱা সাৰিপুত্তত্থেৰং দিস্ৱা ‘‘এথ, অম্হাকং গেহং গমিস্সামা’’তি আনেসি. থেৰো আগন্ত্ৱা সামণেৰে দিস্ৱা ‘‘ইমেহি ব্ৰাহ্মণেহি ভত্তং লদ্ধ’’ন্তি পুচ্ছিত্ৱা ‘‘ন লদ্ধ’’ন্তি ৱুত্তে চতুন্নমেৱ ভত্তস্স পটিযত্তভাৱং ঞত্ৱা ‘‘আহৰ মে পত্ত’’ন্তি পত্তং গহেত্ৱা পক্কামি. ব্ৰাহ্মণীপি ‘‘কিং ইমিনা ৱুত্ত’’ন্তি পুচ্ছিত্ৱা ‘‘এতেসং নিসিন্নানং ব্ৰাহ্মণানং লদ্ধুং ৱট্টতি, আহৰ মে পত্ত’’ন্তি অত্তনো পত্তং গহেত্ৱা গতো, ন ভুঞ্জিতুকামো ভৱিস্সতি, সীঘং গন্ত্ৱা অঞ্ঞং ওলোকেত্ৱা আনেহীতি. ব্ৰাহ্মণো গন্ত্ৱা মহামোগ্গল্লানত্থেৰং দিস্ৱা তথেৱ ৱত্ৱা আনেসি. সোপি সামণেৰে দিস্ৱা তথেৱ ৱত্ৱা পত্তং গহেত্ৱা পক্কামি. অথ নং ব্ৰাহ্মণী আহ – ‘‘এতে ন ভুঞ্জিতুকামা, ব্ৰাহ্মণৱাদকং গন্ত্ৱা একং মহল্লকব্ৰাহ্মণং আনেহী’’তি.

সামণেৰাপি পাতোৱ পট্ঠায কিঞ্চি অলভমানা জিঘচ্ছায পীড়িতা নিসীদিংসু. অথ নেসং গুণতেজেন সক্কস্স আসনং উণ্হাকাৰং দস্সেসি. সো আৱজ্জেন্তো তেসং পাতোৱ পট্ঠায নিসিন্নানং কিলন্তভাৱং ঞত্ৱা ‘‘মযা তত্থ গন্তুং ৱট্টতী’’তি জৰাজিণ্ণো মহল্লকব্ৰাহ্মণো হুত্ৱা তস্মিং ব্ৰাহ্মণৱাদকে ব্ৰাহ্মণানং অগ্গাসনে নিসীদি. ব্ৰাহ্মণো তং দিস্ৱা ‘‘ইদানি মে ব্ৰাহ্মণী অত্তমনা ভৱিস্সতী’’তি এহি গেহং গমিস্সামা’’তি তং আদায গেহং অগমাসি. ব্ৰাহ্মণী তং দিস্ৱাৱ তুট্ঠচিত্তা দ্ৱীসু আসনেসু অত্থৰণং একস্মিংযেৱ অত্থৰিত্ৱা, ‘‘অয্য, ইধ নিসীদাহী’’তি আহ. সক্কো গেহং পৱিসিত্ৱা চত্তাৰো সামণেৰে পঞ্চপতিট্ঠিতেন ৱন্দিত্ৱা তেসং আসনপৰিযন্তে ভূমিযং পল্লঙ্কেন নিসীদি. অথ নং দিস্ৱা ব্ৰাহ্মণী ব্ৰাহ্মণং আহ – ‘‘অহো তে আনীতো ব্ৰাহ্মণো, এতম্পি উম্মত্তকং গহেত্ৱা আগতোসি, অত্তনো নত্তুমত্তে ৱন্দন্তো ৱিচৰতি, কিং ইমিনা, নীহৰাহি ন’’ন্তি. সো খন্ধেপি হত্থেপি কচ্ছাযপি গহেত্ৱা নিক্কড্ঢিযমানো উট্ঠাতুম্পি ন ইচ্ছতি. অথ নং ব্ৰাহ্মণী ‘‘এহি, ব্ৰাহ্মণ, ত্ৱং একস্মিং হত্থে গণ্হ, অহং একস্মিং হত্থে গণ্হিস্সামী’’তি উভোপি দ্ৱীসু হত্থেসু গহেত্ৱা পিট্ঠিযং পোথেন্তা গেহদ্ৱাৰতো বহি অকংসু. সক্কোপি নিসিন্নট্ঠানেযেৱ নিসিন্নো হত্থং পৰিৱত্তেসি. তে নিৱত্তিত্ৱা তং নিসিন্নমেৱ দিস্ৱা ভীতৰৱং ৰৱন্তা ৱিস্সজ্জেসুং. তস্মিং খণে সক্কো অত্তনো সক্কভাৱং জানাপেসি. অথ নেসং আহাৰং অদংসু. পঞ্চপি জনা আহাৰং গহেত্ৱা একো কণ্ণিকামণ্ডলং ৱিনিৱিজ্ঝিত্ৱা, একো ছদনস্স পুৰিমভাগং, একো পচ্ছিমভাগং, একো পথৱিযং নিমুজ্জিত্ৱা, সক্কোপি একেন ঠানেন নিক্খমীতি এৱং পঞ্চধা অগমংসু. ততো পট্ঠায চ পন তং গেহং পঞ্চছিদ্দগেহং কিৰ নাম জাতং.

সামণেৰেপি ৱিহাৰং গতকালে ভিক্খূ, ‘‘আৱুসো, কীদিস’’ন্তি পুচ্ছিংসু. মা নো পুচ্ছিত্থ, অম্হাকং দিট্ঠকালতো পট্ঠায ব্ৰাহ্মণী কোধাভিভূতা পঞ্ঞত্তাসনেসু নো নিসীদিতুম্পি অদত্ৱা ‘‘সীঘং সীঘং মহল্লকব্ৰাহ্মণং আনেহী’’তি আহ. অম্হাকং উপজ্ঝাযো আগন্ত্ৱা অম্হে দিস্ৱা ‘‘ইমেসং নিসিন্নব্ৰাহ্মণানং লদ্ধুং ৱট্টতী’’তি পত্তং আহৰাপেত্ৱা নিক্খমি. ‘‘অঞ্ঞং মহল্লকং ব্ৰাহ্মণং আনেসী’’তি ৱুত্তে ব্ৰাহ্মণো মহামোগ্গল্লানত্থেৰং আনেসি, সোপি অম্হে দিস্ৱা তথেৱ ৱত্ৱা পক্কামি. অথ ব্ৰাহ্মণী ‘‘ন এতে ভুঞ্জিতুকামা, গচ্ছ ব্ৰাহ্মণৱাদকতো একং মহল্লকব্ৰাহ্মণং আনেহী’’তি ব্ৰাহ্মণং পহিণি. সো তত্থ গন্ত্ৱা ব্ৰাহ্মণৱেসেন আগতং সক্কং আনেসি, তস্স আগতকালে অম্হাকং আহাৰং অদংসূতি. এৱং কৰোন্তানং পন তেসং তুম্হে ন কুজ্ঝিত্থাতি? ন কুজ্ঝিম্হাতি. ভিক্খূ তং সুত্ৱা সত্থু আৰোচেসুং – ‘‘ভন্তে, ইমে ‘ন কুজ্ঝিম্হা’তি অভূতং ৱত্ৱা অঞ্ঞং ব্যাকৰোন্তী’’তি. সত্থা, ‘‘ভিক্খৱে, খীণাসৱা নাম ৱিৰুদ্ধেসুপি ন ৱিৰুজ্ঝন্তিযেৱা’’তি ৱত্ৱা ইমং গাথমাহ –

৪০৬. ‘‘অৱিৰুদ্ধং ৱিৰুদ্ধেসু, অত্তদণ্ডেসু নিব্বুতং;

সাদানেসু অনাদানং, তমহং ব্ৰূমি ব্ৰাহ্মণ’’ন্তি.

তত্থ অৱিৰুদ্ধন্তি আঘাতৱসেন ৱিৰুদ্ধেসুপি লোকিযমহাজনেসু আঘাতাভাৱেন অৱিৰুদ্ধং. হত্থগতে দণ্ডে ৱা সত্থে ৱা অৱিজ্জমানেপি পৰেসং পহাৰদানতো অৱিৰতত্তা অত্তদণ্ডেসু জনেসু নিব্বুতং নিক্খিত্তদণ্ডং, পঞ্চন্নং খন্ধানং অহং মমন্তি গহিতত্তা সাদানেসু তস্স গহণস্স অভাৱেন অনাদানং তং এৱৰূপং অহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

সামণেৰানং ৱত্থু তেৱীসতিমং.