২২. অঞ্ঞতৰভিক্খুৱত্থু

নিধায দণ্ডন্তি ইমং ধম্মদেসনং সত্থা জেতৱনে ৱিহৰন্তো অঞ্ঞতৰং ভিক্খুং আৰব্ভ কথেসি.

সো কিৰ সত্থু সন্তিকে কম্মট্ঠানং গহেত্ৱা অৰঞ্ঞে ৱাযমন্তো অৰহত্তং পত্ৱা ‘‘পটিলদ্ধগুণং সত্থু আৰোচেস্সামী’’তি ততো নিক্খমি. অথ নং একস্মিং গামে একা ইত্থী সামিকেন সদ্ধিং কলহং কত্ৱা তস্মিং বহি নিক্খন্তে ‘‘কুলঘৰং গমিস্সামী’’তি মগ্গং পটিপন্না অন্তৰামগ্গে দিস্ৱা ‘‘ইমং থেৰং নিস্সায গমিস্সামী’’তি পিট্ঠিতো পিট্ঠিতো অনুবন্ধি. থেৰো পন তং ন পস্সতি. অথস্সা সামিকো গেহং আগতো তং অদিস্ৱা ‘‘কুলগামং গতা ভৱিস্সতী’’তি অনুবন্ধন্তো তং দিস্ৱা ‘‘ন সক্কা ইমায একিকায ইমং অটৱিং পটিপজ্জিতুং, কং নু খো নিস্সায গচ্ছতী’’তি ওলোকেন্তো থেৰং দিস্ৱা ‘‘অযং ইমং গণ্হিত্ৱা নিক্খন্তো ভৱিস্সতী’’তি চিন্তেত্ৱা থেৰং সন্তজ্জেসি. অথ নং সা ইত্থী ‘‘নেৱ মং এস ভদন্তো পস্সতি, ন আলপতি, মা নং কিঞ্চি অৱচা’’তি আহ. সো ‘‘কিং পন ত্ৱং অত্তানং গহেত্ৱা গচ্ছন্তং মম আচিক্খিস্সসি, তুয্হমেৱ অনুচ্ছৱিকং ইমস্স কৰিস্সামী’’তি উপ্পন্নকোধো ইত্থিযা আঘাতেন থেৰং পোথেত্ৱা তং আদায নিৱত্তি. থেৰস্স সকলসৰীৰং সঞ্জাতগণ্ডং অহোসি. অথস্স ৱিহাৰং গতকালে ভিক্খূ সৰীৰং সম্বাহন্তা গণ্ডে দিস্ৱা ‘‘কিং ইদ’’ন্তি পুচ্ছিংসু. সো তেসং তমত্থং আৰোচেসি. অথ নং ভিক্খূ, ‘‘আৱুসো, তস্মিং পুৰিসে এৱং পহৰন্তে ত্ৱং কিং অৱচ, কিং ৱা তে কোধো উপ্পন্নো’’তি. ‘‘ন মে, আৱুসো, কোধো উপ্পজ্জী’’তি ৱুত্তে সত্থু সন্তিকং গন্ত্ৱা তমত্থং আৰোচেত্ৱা, ‘‘ভন্তে, এস ভিক্খু ‘কোধো তে উপ্পজ্জতী’তি ৱুচ্চমানো ‘ন মে, আৱুসো, কোধো উপ্পজ্জতী’তি অভূতং ৱত্ৱা অঞ্ঞং ব্যাকৰোতী’’তি আৰোচেসুং. সত্থা তেসং কথং সুত্ৱা, ‘‘ভিক্খৱে, খীণাসৱা নাম নিহিতদণ্ডা, তে পহৰন্তেসুপি কোধং ন কৰোন্তিযেৱা’’তি ৱত্ৱা ইমং গাথমাহ –

৪০৫. ‘‘নিধায দণ্ডং ভূতেসু, তসেসু থাৱৰেসু চ;

যো ন হন্তি ন ঘাতেতি, তমহং ব্ৰূমি ব্ৰাহ্মণ’’ন্তি.

তত্থ নিধাযাতি নিক্খিপিত্ৱা ওৰোপেত্ৱা. তসেসু থাৱৰেসু চাতি তণ্হাতাসেন তসেসু, তণ্হাঅভাৱেন থিৰতায থাৱৰেসু চ. যো ন হন্তীতি যো এৱং সব্বসত্তেসু ৱিগতপটিঘতায নিক্খিত্তদণ্ডো নেৱ কঞ্চি সযং হনতি, ন অঞ্ঞে ঘাতেতি, তমহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

অঞ্ঞতৰভিক্খুৱত্থু বাৱীসতিমং.