২১. পব্ভাৰৱাসীতিস্সত্থেৰৱত্থু

অসংসট্ঠন্তি ইমং ধম্মদেসনং সত্থা জেতৱনে ৱিহৰন্তো পব্ভাৰৱাসীতিস্সত্থেৰং আৰব্ভ কথেসি.

সো কিৰ সত্থু সন্তিকে কম্মট্ঠানং গহেত্ৱা অৰঞ্ঞং পৱিসিত্ৱা সপ্পাযং সেনাসনং ওলোকেন্তো একং লেণপব্ভাৰং পাপুণি, সম্পত্তক্খণেযেৱস্স চিত্তং একগ্গতং লভি. সো ‘‘অহং ইধ ৱসন্তো পব্বজিতকিচ্চং নিপ্ফাদেতুং সক্খিস্সামী’’তি চিন্তেসি. লেণেপি অধিৱত্থা দেৱতা ‘‘সীলৱা ভিক্খু আগতো, ইমিনা সদ্ধিং একট্ঠানে ৱসিতুং দুক্খং. অযং পন ইধ একৰত্তিমেৱ ৱসিত্ৱা পক্কমিস্সতী’’তি চিন্তেত্ৱা পুত্তে আদায নিক্খমি. থেৰো পুনদিৱসে পাতোৱ গোচৰগামং পিণ্ডায পাৱিসি. অথ নং একা উপাসিকা দিস্ৱাৱ পুত্তসিনেহং পটিলভিত্ৱা গেহে নিসীদাপেত্ৱা ভোজেত্ৱা অত্তানং নিস্সায তেমাসং ৱসনত্থায যাচি. সোপি ‘‘সক্কা মযা ইমং নিস্সায ভৱনিস্সৰণং কাতু’’ন্তি অধিৱাসেত্ৱা তমেৱ লেণং অগমাসি. দেৱতা তং আগচ্ছন্তং দিস্ৱা ‘‘অদ্ধা কেনচি নিমন্তিতো ভৱিস্সতি, স্ৱে ৱা পৰসুৱে ৱা গমিস্সতী’’তি চিন্তেসি.

এৱং অড্ঢমাসমত্তে অতিক্কন্তে ‘‘অযং ইধেৱ মঞ্ঞে অন্তোৱস্সং ৱসিস্সতি, সীলৱতা পন সদ্ধিং একট্ঠানে পুত্তকেহি সদ্ধিং ৱসিতুং দুক্কৰং, ইমঞ্চ ‘নিক্খমা’তি ৱত্তুং ন সক্কা, অত্থি নু খো ইমস্স সীলে খলিত’’ন্তি দিব্বেন চক্খুনা ওলোকেন্তী উপসম্পদমাড়কতো পট্ঠায তস্স সীলে খলিতং অদিস্ৱা ‘‘পৰিসুদ্ধমস্স সীলং, কিঞ্চিদেৱস্স কত্ৱা অযসং উপ্পাদেস্সামী’’তি তস্স উপট্ঠাককুলে উপাসিকায জেট্ঠপুত্তস্স সৰীৰে অধিমুচ্চিত্ৱা গীৱং পৰিৱত্তেসি. তস্স অক্খীনি নিক্খমিংসু, মুখতো খেড়ো পগ্ঘৰি. উপাসিকা তং দিস্ৱা ‘‘কিং ইদ’’ন্তি ৱিৰৱি. অথ নং দেৱতা অদিস্সমানৰূপা এৱমাহ – ‘‘মযা এস গহিতো, বলিকম্মেনপি মে অত্থো নত্থি, তুম্হাকং পন কুলূপকং থেৰং লট্ঠিমধুকং যাচিত্ৱা তেন তেলং পচিত্ৱা ইমস্স নত্থুকম্মং দেথ, এৱাহং ইমং মুঞ্চিস্সামী’’তি. নস্সতু ৱা এস মৰতু ৱা, ন সক্খিস্সামহং অয্যং লট্ঠিমধুকং যাচিতুন্তি. সচে লট্ঠিমধুকং যাচিতুং ন সক্কোথ, নাসিকাযস্স হিঙ্গুচুণ্ণং পক্খিপিতুং ৱদেথাতি. ইদম্পি ৱত্তুং ন সক্কোমাতি. তেন হিস্স পাদধোৱনউদকং আদায সীসে আসিঞ্চথাতি. উপাসিকা ‘‘সক্কা ইদং কাতু’’ন্তি ৱেলায আগতং থেৰং নিসীদাপেত্ৱা যাগুখজ্জকং দত্ৱা অন্তৰভত্তে নিসিন্নস্স পাদে ধোৱিত্ৱা উদকং গহেত্ৱা, ‘‘ভন্তে, ইদং উদকং দাৰকস্স সীসে আসিঞ্চামা’’তি আপুচ্ছিত্ৱা ‘‘তেন হি আসিঞ্চথা’’তি ৱুত্তে তথা অকাসি. সা দেৱতা তাৱদেৱ তং মুঞ্চিত্ৱা গন্ত্ৱা লেণদ্ৱাৰে অট্ঠাসি.

থেৰোপি ভত্তকিচ্চাৱসানে উট্ঠাযাসনা অৱিস্সট্ঠকম্মট্ঠানতায দ্ৱত্তিংসাকাৰং সজ্ঝাযন্তোৱ পক্কামি. অথ নং লেণদ্ৱাৰং পত্তকালে সা দেৱতা ‘‘মহাৱেজ্জ মা ইধ পৱিসা’’তি আহ. সো তত্থেৱ ঠত্ৱা ‘‘কাসি ত্ৱ’’ন্তি আহ. অহং ইধ অধিৱত্থা দেৱতাতি. থেৰো ‘‘অত্থি নু খো মযা ৱেজ্জকম্মস্স কতট্ঠান’’ন্তি উপসম্পদমাড়কতো পট্ঠায ওলোকেন্তো অত্তনো সীলে তিলকং ৱা কাড়কং ৱা অদিস্ৱা ‘‘অহং মযা ৱেজ্জকম্মস্স কতট্ঠানং ন পস্সামি, কস্মা এৱং ৱদেসী’’তি আহ. ন পস্সসীতি. আম, ন পস্সামীতি? আচিক্খামি তেতি. আম, আচিক্খাহীতি. তিট্ঠতু তাৱ দূৰে কতং, অজ্জেৱ তযা অমনুস্সগহিতস্স উপট্ঠাকপুত্তস্স পাদধোৱনউদকং সীসে আসিত্তং, নাসিত্তন্তি? আম, আসিত্তন্তি. কিং এতং ন পস্সসীতি? এতং সন্ধায ত্ৱং ৱদেসীতি? আম, এতং সন্ধায ৱদামীতি. থেৰো চিন্তেসি – ‘‘অহো ৱত মে সম্মা পণিহিতো অত্তা, সাসনস্স অনুৰূপং ৱত মে চৰিতং, দেৱতাপি মম চতুপাৰিসুদ্ধিসীলে তিলকং ৱা কাড়কং ৱা অদিস্ৱা দাৰকস্স সীসে আসিত্তপাদধোৱনমত্তং অদ্দসা’’তি তস্স সীলং আৰব্ভ বলৱপীতি উপ্পজ্জি. সো তং ৱিক্খম্ভেত্ৱা পাদুদ্ধাৰম্পি অকত্ৱা তত্থেৱ অৰহত্তং পত্ৱা ‘‘মাদিসং পৰিসুদ্ধং সমণং দূসেত্ৱা মা ইধ ৱনসণ্ডে ৱসি, ত্ৱমেৱ নিক্খমাহী’’তি দেৱতং ওৱদন্তো ইমং উদানং উদানেসি –

‘‘ৱিসুদ্ধো ৱত মে ৱাসো, নিম্মলং মং তপস্সিনং;

মা ত্ৱং ৱিসুদ্ধং দূসেসি, নিক্খম পৱনা তুৱ’’ন্তি.

সো তত্থেৱ তেমাসং ৱসিত্ৱা ৱুত্থৱস্সো সত্থু সন্তিকং গন্ত্ৱা ভিক্খূহি ‘‘কিং, আৱুসো, পব্বজিতকিচ্চং তে মত্থকং পাপিত’’ন্তি পুট্ঠো তস্মিং লেণে ৱস্সূপগমনতো পট্ঠায সব্বং তং পৱত্তিং ভিক্খূনং আৰোচেত্ৱা, ‘‘আৱুসো, ত্ৱং দেৱতায এৱং ৱুচ্চমানো ন কুজ্ঝী’’তি ৱুত্তে ‘‘ন কুজ্ঝি’’ন্তি আহ. ভিক্খূ তথাগতস্স আৰোচেসুং, ‘‘ভন্তে, অযং ভিক্খু অঞ্ঞং ব্যাকৰোতি, দেৱতায ইদং নাম ৱুচ্চমানোপি ন কুজ্ঝিন্তি ৱদতী’’তি. সত্থা তেসং কথং সুত্ৱা ‘‘নেৱ, ভিক্খৱে, মম পুত্তো কুজ্ঝতি, এতস্স গিহীহি ৱা পব্বজিতেহি ৱা সংসগ্গো নাম নত্থি, অসংসট্ঠো এস অপ্পিচ্ছো সন্তুট্ঠো’’তি ৱত্ৱা ধম্মং দেসেন্তো ইমং গাথমাহ –

৪০৪. ‘‘অসংসট্ঠং গহট্ঠেহি, অনাগাৰেহি চূভযং;

অনোকসাৰিমপ্পিচ্ছং, তমহং ব্ৰূমি ব্ৰাহ্মণ’’ন্তি.

তত্থ অসংসট্ঠন্তি দস্সনসৱনসমুল্লপনপৰিভোগকাযসংসগ্গানং অভাৱেন অসংসট্ঠং. উভযন্তি গিহীহি চ অনাগাৰেহি চাতি উভযেহিপি অসংসট্ঠং. অনোকসাৰিন্তি অনালযচাৰিং তং এৱৰূপং অহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

পব্ভাৰৱাসীতিস্সত্থেৰৱত্থু একৱীসতিমং.