১৯. অঞ্ঞতৰব্ৰাহ্মণৱত্থু

যো দুক্খস্সাতি ইমং ধম্মদেসনং সত্থা জেতৱনে ৱিহৰন্তো অঞ্ঞতৰং ব্ৰাহ্মণং আৰব্ভ কথেসি.

তস্স কিৰেকো দাসো অপঞ্ঞত্তে সিক্খাপদে পলাযিত্ৱা পব্বজিত্ৱা অৰহত্তং পাপুণি. ব্ৰাহ্মণো তং ওলোকেন্তো অদিস্ৱা একদিৱসং সত্থাৰা সদ্ধিং পিণ্ডায পৱিসন্তং দ্ৱাৰন্তৰে দিস্ৱা চীৱৰং দড়্হং অগ্গহেসি. সত্থা নিৱত্তিত্ৱা ‘‘কিং ইদং, ব্ৰাহ্মণা’’তি পুচ্ছি. দাসো মে, ভো গোতমাতি. পন্নভাৰো এস, ব্ৰাহ্মণাতি. ‘‘পন্নভাৰো’’তি চ ৱুত্তে ব্ৰাহ্মণো ‘‘অৰহা’’তি সল্লক্খেসি. তস্মা পুনপি তেন ‘‘এৱং, ভো গোতমা’’তি ৱুত্তে সত্থা ‘‘আম, ব্ৰাহ্মণ, পন্নভাৰো’’তি ৱত্ৱা ইমং গাথমাহ –

৪০২. ‘‘যো দুক্খস্স পজানাতি, ইধেৱ খযমত্তনো;

পন্নভাৰং ৱিসংযুত্তং, তমহং ব্ৰূমি ব্ৰাহ্মণ’’ন্তি.

তত্থ দুক্খস্সাতি খন্ধদুক্খস্স. পন্নভাৰন্তি ওহিতখন্ধভাৰং চতূহি যোগেহি সব্বকিলেসেহি ৱা ৱিসংযুত্তং তমহং ব্ৰাহ্মণং ৱদামীতি অত্থো. দেসনাৱসানে সো ব্ৰাহ্মণো সোতাপত্তিফলে পতিট্ঠহি, সম্পত্তানম্পি সাত্থিকা ধম্মদেসনা অহোসীতি.

অঞ্ঞতৰব্ৰাহ্মণৱত্থু একূনৱীসতিমং.