১৭. সাৰিপুত্তত্থেৰৱত্থু

অক্কোধনন্তি ইমং ধম্মদেসনং সত্থা ৱেড়ুৱনে ৱিহৰন্তো সাৰিপুত্তত্থেৰং আৰব্ভ কথেসি.

তদা কিৰ থেৰো পঞ্চহি ভিক্খুসতেহি সদ্ধিং পিণ্ডায চৰন্তো নালকগামে মাতু ঘৰদ্ৱাৰং অগমাসি. অথ নং সা নিসীদাপেত্ৱা পৰিৱিসমানা অক্কোসি – ‘‘অম্ভো, উচ্ছিট্ঠখাদক উচ্ছিট্ঠকঞ্জিযং অলভিত্ৱা পৰঘৰেসু উড়ুঙ্কপিট্ঠেন ঘট্টিতকঞ্জিযং পৰিভুঞ্জিতুং অসীতিকোটিধনং পহায পব্বজিতোসি, নাসিতম্হা তযা, ভুঞ্জাহি দানী’’তি. ভিক্খূনম্পি ভত্তং দদমানা ‘‘তুম্হেহি মম পুত্তো অত্তনো চূড়ুপট্ঠাকো কতো, ইদানি ভুঞ্জথা’’তি ৱদেতি. থেৰো ভিক্খং গহেত্ৱা ৱিহাৰমেৱ অগমাসি. অথাযস্মা ৰাহুলো সত্থাৰং পিণ্ডপাতেন আপুচ্ছি. অথ নং সত্থা আহ – ‘‘ৰাহুল, কহং গমিত্থা’’তি? ‘‘অয্যিকায গামং, ভন্তে’’তি. ‘‘কিং পন তে অয্যিকায উপজ্ঝাযো ৱুত্তো’’তি? ‘‘অয্যিকায মে, ভন্তে, উপজ্ঝাযো অক্কুট্ঠো’’তি. ‘‘কিন্তি ৱত্ৱা’’তি? ‘‘ইদং নাম, ভন্তে’’তি. ‘‘উপজ্ঝাযেন পন তে কিং ৱুত্ত’’ন্তি? ‘‘ন কিঞ্চি, ভন্তে’’তি. তং সুত্ৱা ভিক্খূ ধম্মসভাযং কথং সমুট্ঠাপেসুং, ‘‘আৱুসো, অচ্ছৰিযা ৱত সাৰিপুত্তত্থেৰস্স গুণা, এৱংনামস্স মাতৰি অক্কোসন্তিযা কোধমত্তম্পি নাহোসী’’তি. সত্থা আগন্ত্ৱা ‘‘কায নুত্থ, ভিক্খৱে, এতৰহি কথায সন্নিসিন্না’’তি পুচ্ছিত্ৱা ‘‘ইমায নামা’’তি ৱুত্তে, ‘‘ভিক্খৱে, খীণাসৱা নাম অক্কোধনাৱ হোন্তী’’তি ৱত্ৱা ইমং গাথমাহ –

৪০০. ‘‘অক্কোধনং ৱতৱন্তং, সীলৱন্তং অনুস্সদং;

দন্তং অন্তিমসাৰীৰং, তমহং ব্ৰূমি ব্ৰাহ্মণ’’ন্তি.

তত্থ ৱতৱন্তন্তি ধুতৱতেন, সমন্নাগতং চতুপাৰিসুদ্ধিসীলেন সীলৱন্তং, তণ্হাউস্সদাভাৱেন অনুস্সদং , ছড়িন্দ্ৰিযদমনেন দন্তং, কোটিযং ঠিতেন অত্তভাৱেন অন্তিমসৰীৰং তমহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

সাৰিপুত্তত্থেৰৱত্থু সত্তৰসমং.