১৬. অক্কোসকভাৰদ্ৱাজৱত্থু

অক্কোসন্তি ইমং ধম্মদেসনং সত্থা ৱেড়ুৱনে ৱিহৰন্তো অক্কোসকভাৰদ্ৱাজং আৰব্ভ কথেসি.

তস্স হি ভাতু ভাৰদ্ৱাজস্স ধনঞ্জানী নাম ব্ৰাহ্মণী সোতাপন্না অহোসি. সা খীপিত্ৱাপি কাসিত্ৱাপি পক্খলিত্ৱাপি ‘‘নমো তস্স ভগৱতো অৰহতো সম্মাসম্বুদ্ধস্সা’’তি ইমং উদানং উদানেসি. সা একদিৱসং ব্ৰাহ্মণপৰিৱেসনায পৱত্তমানায পক্খলিত্ৱা তথেৱ মহাসদ্দেন উদানং উদানেসি. ব্ৰাহ্মণো কুজ্ঝিত্ৱা ‘‘এৱমেৱাযং ৱসলী যত্থ ৱা তত্থ ৱা পক্খলিত্ৱা তস্স মুণ্ডকস্স সমণকস্স ৱণ্ণং ভাসতী’’তি ৱত্ৱা ‘‘ইদানি তে, ৱসলি, গন্ত্ৱা তস্স সত্থুনো ৱাদং আৰোপেস্সামী’’তি আহ. অথ নং সা ‘‘গচ্ছ, ব্ৰাহ্মণ, নাহং তং পস্সামি, যো তস্স ভগৱতো ৱাদং আৰোপেয্য, অপি চ গন্ত্ৱা তং ভগৱন্তং পঞ্হং পুচ্ছস্সূ’’তি আহ. সো সত্থু সন্তিকং গন্ত্ৱা অৱন্দিত্ৱাৱ একমন্তং ঠিতো পঞ্হং পুচ্ছন্তো ইমং গাথমাহ –

‘‘কিংসু ছেত্ৱা সুখং সেতি, কিংসু ছেত্ৱা ন সোচতি;

কিস্সস্সু একধম্মস্স, ৱধং ৰোচেসি গোতমা’’তি. (সং. নি. ১.১৮৭);

অথস্স পঞ্হং ব্যাকৰোন্তো সত্থা ইমং গাথমাহ –

‘‘কোধং ছেত্ৱা সুখং সেতি, কোধং ছেত্ৱা ন সোচতি;

কোধস্স ৱিসমূলস্স, মধুৰগ্গস্স ব্ৰাহ্মণ;

ৱধং অৰিযা পসংসন্তি, তঞ্হি ছেত্ৱা ন সোচতী’’তি. (সং. নি. ১.১৮৭);

সো সত্থৰি পসীদিত্ৱা পব্বজিত্ৱা অৰহত্তং পাপুণি. অথস্স কনিট্ঠো অক্কোসকভাৰদ্ৱাজো ‘‘ভাতা কিৰ মে পব্বজিতো’’তি সুত্ৱা কুদ্ধো আগন্ত্ৱা সত্থাৰং অসব্ভাহি ফৰুসাহি ৱাচাহি অক্কোসি. সোপি সত্থাৰা অতিথীনং খাদনীযাদিদানওপম্মেন সঞ্ঞত্তো সত্থৰি পসন্নো পব্বজিত্ৱা অৰহত্তং পাপুণি. অপৰেপিস্স সুন্দৰিকভাৰদ্ৱাজো বিলিঙ্গকভাৰদ্ৱাজোতি দ্ৱে কনিট্ঠভাতৰো সত্থাৰং অক্কোসন্তাৱ সত্থাৰা ৱিনীতা পব্বজিত্ৱা অৰহত্তং পাপুণিংসু.

অথেকদিৱসং ধম্মসভাযং কথং সমুট্ঠাপেসুং, ‘‘আৱুসো, অচ্ছৰিযা ৱত বুদ্ধগুণা, চতূসু নাম ভাতিকেসু অক্কোসন্তেসু সত্থা কিঞ্চি অৱত্ৱা তেসংযেৱ পতিট্ঠা জাতো’’তি. সত্থা আগন্ত্ৱা ‘‘কায নুত্থ, ভিক্খৱে, এতৰহি কথায সন্নিসিন্না’’তি পুচ্ছিত্ৱা ‘‘ইমায নামা’’তি ৱুত্তে, ‘‘ভিক্খৱে, অহং মম খন্তিবলেন সমন্নাগতত্তা দুট্ঠেসু অদুস্সন্তো মহাজনস্স পতিট্ঠা হোমিযেৱা’’তি ৱত্ৱা ইমং গাথমাহ –

৩৯৯. ‘‘অক্কোসং ৱধবন্ধঞ্চ, অদুট্ঠো যো তিতিক্খতি;

খন্তীবলং বলানীকং, তমহং ব্ৰূমি ব্ৰাহ্মণ’’ন্তি.

তত্থ অদুট্ঠোতি এতং দসহি অক্কোসৱত্থূহি অক্কোসঞ্চ পাণিআদীহি পোথনঞ্চ অন্দুবন্ধনাদীহি বন্ধনঞ্চ যো অকুদ্ধমানসো হুত্ৱা অধিৱাসেতি, খন্তিবলেন সমন্নাগতত্তা খন্তিবলং, পুনপ্পুনং উপ্পত্তিযা অনীকভূতেন তেনেৱ খন্তিবলেন সমন্নাগতত্তা বলানীকং তং এৱৰূপং অহং ব্ৰাহ্মণং ৱদামীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

অক্কোসকভাৰদ্ৱাজৱত্থু সোড়সমং.