১১. কুহকব্ৰাহ্মণৱত্থু

কিং তেতি ইমং ধম্মদেসনং সত্থা কূটাগাৰসালাযং ৱিহৰন্তো একং ৱগ্গুলিৱতং কুহকব্ৰাহ্মণং আৰব্ভ কথেসি.

সো কিৰ ৱেসালিনগৰদ্ৱাৰে একং ককুধৰুক্খং আৰুয্হ দ্ৱীহি পাদেহি ৰুক্খসাখং গণ্হিত্ৱা অধোসিৰো ওলম্বন্তো ‘‘কপিলানং মে সতং দেথ, কহাপণে দেথ, পৰিচাৰিকং দেথ, নো চে দস্সথ, ইতো পতিত্ৱা মৰন্তো নগৰং অনগৰং কৰিস্সামী’’তি ৱদতি. তথাগতস্স ভিক্খুসঙ্ঘপৰিৱুতস্স নগৰং পৱিসনকালে ভিক্খূ তং ব্ৰাহ্মণং দিস্ৱা নিক্খমনকালেপি নং তথেৱ ওলম্বন্তং পস্সিংসু. নাগৰাপি ‘‘অযং পাতোৱ পট্ঠায এৱং ওলম্বন্তো পতিত্ৱা মৰন্তো নগৰং অনগৰং কৰেয্যা’’তি চিন্তেত্ৱা নগৰৱিনাসভীতা ‘‘যং সো যাচতি, সব্বং দেমা’’তি পটিস্সুণিত্ৱা অদংসু. সো ওতৰিত্ৱা সব্বং গহেত্ৱা অগমাসি. ভিক্খূ ৱিহাৰূপচাৰে তং গাৱিং ৱিয ৱিৰৱিত্ৱা গচ্ছন্তং দিস্ৱা সঞ্জানিত্ৱা ‘‘লদ্ধং তে, ব্ৰাহ্মণ, যথাপত্থিত’’ন্তি পুচ্ছিত্ৱা ‘‘আম, লদ্ধং মে’’তি সুত্ৱা অন্তোৱিহাৰং গন্ত্ৱা তথাগতস্স তমত্থং আৰোচেসুং. সত্থা ‘‘ন, ভিক্খৱে, ইদানেৱ সো কুহকচোৰো, পুব্বেপি কুহকচোৰোযেৱ অহোসি. ইদানি পনেস বালজনং ৱঞ্চেতি, তদা পন পণ্ডিতে ৱঞ্চেতুং নাসক্খী’’তি ৱত্ৱা তেহি যাচিতো অতীতমাহৰি.

অতীতে একং কাসিকগামং নিস্সায একো কুহকতাপসো ৱাসং কপ্পেসি. তং একং কুলং পটিজগ্গি. দিৱা উপ্পন্নখাদনীযভোজনীযতো অত্তনো পুত্তানং ৱিয তস্সপি একং কোট্ঠাসং দেতি, সাযং উপ্পন্নকোট্ঠাসং ঠপেত্ৱা দুতিযদিৱসে দেতি. অথেকদিৱসং সাযং গোধমংসং লভিত্ৱা সাধুকং পচিত্ৱা ততো কোট্ঠাসং ঠপেত্ৱা দুতিযদিৱসে তস্স অদংসু. তাপসো মংসং খাদিত্ৱাৱ ৰসতণ্হায বদ্ধো ‘‘কিং মংসং নামেত’’ন্তি পুচ্ছিত্ৱা ‘‘গোধমংস’’ন্তি সুত্ৱা ভিক্খায চৰিত্ৱা সপ্পিদধিকটুকভণ্ডাদীনি গহেত্ৱা পণ্ণসালং গন্ত্ৱা একমন্তং ঠপেসি. পণ্ণসালায পন অৱিদূৰে একস্মিং ৱম্মিকে গোধৰাজা ৱিহৰতি. সো কালেন কালং তাপসং ৱন্দিতুং আগচ্ছতি. তংদিৱসং পনেস ‘‘তং ৱধিস্সামী’’তি দণ্ডং পটিচ্ছাদেত্ৱা তস্স ৱম্মিকস্স অৱিদূৰে ঠানে নিদ্দাযন্তো ৱিয নিসীদি. গোধৰাজা ৱম্মিকতো নিক্খমিত্ৱা তস্স সন্তিকং আগচ্ছন্তোৱ আকাৰং সল্লক্খেত্ৱা ‘‘ন মে অজ্জ আচৰিযস্স আকাৰো ৰুচ্চতী’’তি ততোৱ নিৱত্তি. তাপসো তস্স নিৱত্তনভাৱং ঞত্ৱা তস্স মাৰণত্থায দণ্ডং খিপি, দণ্ডো ৱিৰজ্ঝিত্ৱা গতো. গোধৰাজাপি ধম্মিকং পৱিসিত্ৱা ততো সীসং নীহৰিত্ৱা আগতমগ্গং ওলোকেন্তো তাপসং আহ –

‘‘সমণং তং মঞ্ঞমানো, উপগচ্ছিমসঞ্ঞতং;

সো মং দণ্ডেন পাহাসি, যথা অসমণো তথা.

‘‘কিং তে জটাহি দুম্মেধ, কিং তে অজিনসাটিযা;

অব্ভন্তৰং তে গহনং, বাহিৰং পৰিমজ্জসী’’তি. (জা. ১.৪.৯৭-৯৮);

অথ নং তাপসো অত্তনো সন্তকেন পলোভেতুং এৱমাহ –

‘‘এহি গোধ নিৱত্তস্সু, ভুঞ্জ সালীনমোদনং;

তেলং লোণঞ্চ মে অত্থি, পহূতং ময্হ পিপ্ফলী’’তি. (জা. ১.৪.৯৯);

তং সুত্ৱা গোধৰাজা ‘‘যথা যথা ত্ৱং কথেসি, তথা তথা মে পলাযিতুকামতাৱ হোতী’’তি ৱত্ৱা ইমং গাথমাহ –

‘‘এস ভিয্যো পৱেক্খামি, ৱম্মিকং সতপোৰিসং;

তেলং লোণঞ্চ কিত্তেসি, অহিতং ময্হ পিপ্ফলী’’তি. (জা. ১.৪.১০০);

এৱঞ্চ পন ৱত্ৱা ‘‘অহং এত্তকং কালং তযি সমণসঞ্ঞং অকাসিং, ইদানি পন তে মং পহৰিতুকামতায দণ্ডো খিত্তো, তস্স খিত্তকালেযেৱ অসমণো জাতো. কিং তাদিসস্স দুপ্পঞ্ঞস্স পুগ্গলস্স জটাহি, কিং সখুৰেন অজিনচম্মেন. অব্ভন্তৰঞ্হি তে গহনং, কেৱলং বাহিৰমেৱ পৰিমজ্জসী’’তি আহ. সত্থা ইমং অতীতং আহৰিত্ৱা ‘‘তদা এস কুহকো তাপসো অহোসি, গোধৰাজা পন অহমেৱা’’তি ৱত্ৱা জাতকং সমোধানেত্ৱা তদা গোধপণ্ডিতেন তস্স নিগ্গহিতকাৰণং দস্সেন্তো ইমং গাথমাহ –

৩৯৪. ‘‘কিং তে জটাহি দুম্মেধ, কিং তে অজিনসাটিযা;

অব্ভন্তৰং তে গহনং, বাহিৰং পৰিমজ্জসী’’তি. (জা. ১.৪.৯৮);

তত্থ কিং তে জটাহীতি অম্ভো দুপ্পঞ্ঞ তৱ বদ্ধাহিপি ইমাহি জটাহি সখুৰায নিৱত্থাযপি ইমায অজিনচম্মসাটিকায চ কিমত্থোতি. অব্ভন্তৰন্তি অব্ভন্তৰঞ্হি তে ৰাগাদিকিলেসগহনং, কেৱলং হত্থিলণ্ডং অস্সলণ্ডং ৱিয মট্ঠং বাহিৰং পৰিমজ্জসীতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

কুহকব্ৰাহ্মণৱত্থু একাদসমং.