১১. ৱক্কলিত্থেৰৱত্থু

পামোজ্জবহুলোতি ইমং ধম্মদেসনং সত্থা ৱেড়ুৱনে ৱিহৰন্তো ৱক্কলিত্থেৰং আৰব্ভ কথেসি.

সো কিৰাযস্মা সাৱত্থিযং ব্ৰাহ্মণকুলে নিব্বত্তিত্ৱা ৱযপ্পত্তো পিণ্ডায পৱিট্ঠং তথাগতং দিস্ৱা সত্থু সৰীৰসম্পত্তিং ওলোকেত্ৱা সৰীৰসম্পত্তিদস্সনেন অতিত্তো ‘‘এৱাহং নিচ্চকালং তথাগতং দট্ঠুং লভিস্সামী’’তি সত্থু সন্তিকে পব্বজিত্ৱা যত্থ ঠিতেন সক্কা দসবলং পস্সিতুং, তত্থ ঠিতো সজ্ঝাযকম্মট্ঠানমনসিকাৰাদীনি পহায সত্থাৰং ওলোকেন্তোৱ ৱিচৰতি. সত্থা তস্স ঞাণপৰিপাকং আগমেন্তো কিঞ্চি অৱত্ৱা ‘‘ইদানিস্স ঞাণং পৰিপাকং গত’’ন্তি ঞত্ৱা ‘‘কিং তে, ৱক্কলি, ইমিনা পূতিকাযেন দিট্ঠেন, যো খো, ৱক্কলি, ধম্মং পস্সতি, সো মং পস্সতি. যো মং পস্সতি, সো ধম্মং পস্সতী’’তি (সং. নি. ৩.৮৭) ৱত্ৱা ওৱদি. সো এৱং ওৱদিতোপি সত্থু দস্সনং পহায নেৱ অঞ্ঞত্থ গন্তুং সক্কোতি. অথ নং সত্থা ‘‘নাযং ভিক্খু সংৱেগং অলভিত্ৱা বুজ্ঝিস্সতী’’তি উপকট্ঠায ৱস্সূপনাযিকায ৰাজগহং গন্ত্ৱা ৱস্সূপনাযিকদিৱসে ‘‘অপেহি, ৱক্কলি, অপেহি, ৱক্কলী’’তি পণামেসি. সো ‘‘ন মং সত্থা আলপতী’’তি তেমাসং সত্থু সম্মুখে ঠাতুং অসক্কোন্তো ‘‘কিং ময্হং জীৱিতেন, পব্বতা অত্তানং পাতেস্সামী’’তি গিজ্ঝকূটং অভিৰুহি.

সত্থা তস্স কিলমনভাৱং ঞত্ৱা ‘‘অযং ভিক্খু মম সন্তিকা অস্সাসং অলভন্তো মগ্গফলানং উপনিস্সযং নাসেয্যা’’তি অত্তানং দস্সেতুং ওভাসং মুঞ্চি. অথস্স সত্থু দিট্ঠকালতো পট্ঠায তাৱমহন্তোপি সোকো পহীযি. সত্থা সুক্খতড়াকং ওঘেন পূৰেন্তো ৱিয থেৰস্স বলৱপীতিপামোজ্জং উপ্পাদেতুং ইমং গাথমাহ –

৩৮১. ‘‘পামোজ্জবহুলো ভিক্খু, পসন্নো বুদ্ধসাসনে;

অধিগচ্ছে পদং সন্তং, সঙ্খাৰূপসমং সুখ’’ন্তি.

তস্সত্থো – পকতিযাপি পামোজ্জবহুলো ভিক্খু বুদ্ধসাসনে পসাদং ৰোচেতি, সো এৱং পসন্নো বুদ্ধসাসনে সন্তং পদং সঙ্খাৰূপসমং সুখন্তি লদ্ধনামং নিব্বানং অধিগচ্ছেয্যাতি. ইমঞ্চ পন গাথং ৱত্ৱা সত্থা ৱক্কলিত্থেৰস্স হত্থং পসাৰেত্ৱা –

‘‘এহি ৱক্কলি মা ভাযি, ওলোকেহি তথাগতং;

অহং তং উদ্ধৰিস্সামি, পঙ্কে সন্নংৱ কুঞ্জৰং.

‘‘এহি ৱক্কলি মা ভাযি, ওলোকেহি তথাগতং;

অহং তং মোচযিস্সামি, ৰাহুগ্গহংৱ সূৰিযং.

‘‘এহি ৱক্কলি মা ভাযি, ওলোকেহি তথাগতং;

অহং তং মোচযিস্সামি, ৰাহুগ্গহংৱ চন্দিম’’ন্তি. –

ইমা গাথা অভাসি. সো ‘‘দসবলো মে দিট্ঠো, এহীতি চ অৱ্হানম্পি লদ্ধ’’ন্তি বলৱপীতিং উপ্পাদেত্ৱা ‘‘কুতো নু খো গন্তব্ব’’ন্তি গমনমগ্গং অপস্সন্তো দসবলস্স সম্মুখে আকাসে উপ্পতিত্ৱা পঠমপাদে পব্বতে ঠিতেযেৱ সত্থাৰা ৱুত্তগাথা আৱজ্জেন্তো আকাসেযেৱ পীতিং ৱিক্খম্ভেত্ৱা সহ পটিসম্ভিদাহি অৰহত্তং পত্ৱা তথাগতং ৱন্দমানোৱ ওতৰিত্ৱা সত্থু সন্তিকে অট্ঠাসি. অথ নং সত্থা অপৰভাগে সদ্ধাধিমুত্তানং অগ্গট্ঠানে ঠপেসীতি.

ৱক্কলিত্থেৰৱত্থু একাদসমং.