১০. সক্কপঞ্হৱত্থু

সব্বদানন্তি ইমং ধম্মদেসনং সত্থা জেতৱনে ৱিহৰন্তো সক্কং দেৱৰাজানং আৰব্ভ কথেসি.

একস্মিঞ্হি সমযে তাৱতিংসদেৱলোকে দেৱতা সন্নিপতিত্ৱা চত্তাৰো পঞ্হে সমুট্ঠাপেসুং ‘‘কতৰং দানং নু খো দানেসু, কতৰো ৰসো ৰসেসু, কতৰা ৰতি ৰতীসু জেট্ঠকা, তণ্হক্খযোৱ কস্মা জেট্ঠকোতি ৱুচ্চতী’’তি? তে পঞ্হে একা দেৱতাপি ৱিনিচ্ছিতুং নাসক্খি. একো পন দেৱো একং দেৱং, সোপি অপৰন্তি এৱং অঞ্ঞমঞ্ঞং পুচ্ছন্তা দসসু চক্কৱাড়সহস্সেসু দ্ৱাদস সংৱচ্ছৰানি ৱিচৰিংসু. এত্তকেনাপি কালেন পঞ্হানং অত্থং অদিস্ৱা দসসহস্সচক্কৱাড়দেৱতা সন্নিপতিত্ৱা চতুন্নং মহাৰাজানং সন্তিকং গন্ত্ৱা ‘‘কিং, তাতা, মহাদেৱতাসন্নিপাতো’’তি ৱুত্তে ‘‘চত্তাৰো পঞ্হে সমুট্ঠাপেত্ৱা ৱিনিচ্ছিতুং অসক্কোন্তা তুম্হাকং সন্তিকং আগতম্হা’’তি. ‘‘কিং পঞ্হং নামেতং, তাতা’’তি. ‘‘দানৰসৰতীসু কতমা দানৰসৰতী নু খো সেট্ঠা, তণ্হক্খযোৱ কস্মা সেট্ঠো’’তি ইমে পঞ্হে ৱিনিচ্ছিতুং অসক্কোন্তা আগতম্হাতি. তাতা, মযম্পি ইমেসং অত্থে ন জানাম, অম্হাকং পন ৰাজা জনসহস্সেন চিন্তিতে অত্থে চিন্তেত্ৱা তঙ্খণেনেৱ জানাতি, সো অম্হেহি পঞ্ঞায চ পুঞ্ঞেন চ ৱিসিট্ঠো, এথ, তস্স সন্তিকং গচ্ছামাতি তমেৱ দেৱগণং আদায সক্কস্স দেৱৰঞ্ঞো সন্তিকং গন্ত্ৱা তেনাপি ‘‘কিং, তাতা, মহন্তো দেৱসন্নিপাতো’’তি ৱুত্তে তমত্থং আৰোচেসুং. ‘‘তাতা, ইমেসং পঞ্হানং অত্থং অঞ্ঞোপি জানিতুং ন সক্কোতি, বুদ্ধৱিসযা হেতে. সত্থা পনেতৰহি কহং ৱিহৰতী’’তি পুচ্ছিত্ৱা ‘‘জেতৱনে’’তি সুত্ৱা ‘‘এথ, তস্স সন্তিকং গমিস্সামা’’তি দেৱগণেন সদ্ধিং ৰত্তিভাগে সকলং জেতৱনং ওভাসেত্ৱা সত্থাৰং উপসঙ্কমিত্ৱা ৱন্দিত্ৱা একমন্তং ঠিতো ‘‘কিং, মহাৰাজ, মহতা দেৱসঙ্ঘেন আগতোসী’’তি ৱুত্তে, ‘‘ভন্তে, দেৱগণেন ইমে নাম পঞ্হা সমুট্ঠাপিতা, অঞ্ঞো ইমেসং অত্থং জানিতুং সমত্থো নাম নত্থি, ইমেসং নো অত্থং পকাসেথা’’তি আহ.

সত্থা ‘‘সাধু মহাৰাজ, মযা হি পাৰমিযো পূৰেত্ৱা মহাপৰিচ্চাগে পৰিচ্চজিত্ৱা তুম্হাদিসানং কঙ্খচ্ছেদনত্থমেৱ সব্বঞ্ঞুতঞ্ঞাণং পটিৱিদ্ধং, তযা পুচ্ছিতপঞ্হেসু হি সব্বদানানং ধম্মদানং সেট্ঠং, সব্বৰসানং ধম্মৰসো সেট্ঠো, সব্বৰতীনং ধম্মৰতি সেট্ঠা, তণ্হক্খযো পন অৰহত্তং সম্পাপকত্তা সেট্ঠোযেৱা’’তি ৱত্ৱা ইমং গাথমাহ –

৩৫৪. ‘‘সব্বদানং ধম্মদানং জিনাতি,

সব্বৰসং ধম্মৰসো জিনাতি;

সব্বৰতিং ধম্মৰতি জিনাতি,

তণ্হক্খযো সব্বদুক্খং জিনাতী’’তি.

তত্থ সব্বদানং ধম্মদানন্তি সচেপি হি চক্কৱাড়গব্ভে যাৱ ব্ৰহ্মলোকা নিৰন্তৰং কত্ৱা সন্নিসিন্নানং বুদ্ধপচ্চেকবুদ্ধখীণাসৱানং কদলিগব্ভসদিসানি চীৱৰানি দদেয্য, তস্মিং সমাগমে চতুপ্পদিকায গাথায কতানুমোদনাৱ সেট্ঠা. তঞ্হি দানং তস্সা গাথায সোড়সিং কলং নাগ্ঘতি. এৱং ধম্মস্স দেসনাপি ৱাচনম্পি সৱনম্পি মহন্তং. যেন চ পুগ্গলেন বহূনং তং ধম্মস্সৱনং কাৰিতং, তস্সেৱ আনিসংসো মহা. তথাৰূপায এৱ পৰিসায পণীতপিণ্ডপাতস্স পত্তে পূৰেত্ৱা দিন্নদানতোপি সপ্পিতেলাদীনং পত্তে পূৰেত্ৱা দিন্নভেসজ্জদানতোপি মহাৱিহাৰসদিসানং ৱিহাৰানঞ্চ লোহপাসাদসদিসানঞ্চ পাসাদানং অনেকানি সতসহস্সানি কাৰেত্ৱা দিন্নসেনাসনদানতোপি অনাথপিণ্ডিকাদীহি ৱিহাৰে আৰব্ভ কতপৰিচ্চাগতোপি অন্তমসো চতুপ্পদিকায গাথায অনুমোদনাৱসেনাপি পৱত্তিতং ধম্মদানমেৱ ৱৰং সেট্ঠং. কিং কাৰণা? এৱৰূপানি হি পুঞ্ঞানি কৰোন্তা ধম্মং সুত্ৱাৱ কৰোন্তি, নো অসুত্ৱা. সচে হি ইমে সত্তা ধম্মং ন সুণেয্যুং, উড়ুঙ্কমত্তং যাগুম্পি কটচ্ছুমত্তং ভত্তম্পি ন দদেয্যুং. ইমিনা কাৰণেন সব্বদানেহি ধম্মদানমেৱ সেট্ঠং. অপিচ ঠপেত্ৱা বুদ্ধে চ পচ্চেকবুদ্ধে চ সকলকপ্পং দেৱে ৱস্সন্তে উদকবিন্দূনি গণেতুং সমত্থায পঞ্ঞায সমন্নাগতা সাৰিপুত্তাদযোপি অত্তনো ধম্মতায সোতাপত্তিফলাদীনি অধিগন্তুং নাসক্খিংসু, অস্সজিত্থেৰাদীহি কথিতধম্মং সুত্ৱা সোতাপত্তিফলং সচ্ছিকৰিংসু, সত্থু ধম্মদেসনায সাৱকপাৰমীঞাণং সচ্ছিকৰিংসু. ইমিনাপি কাৰণেন, মহাৰাজ, ধম্মদানমেৱ সেট্ঠং. তেন ৱুত্তং – ‘‘সব্বদানং ধম্মদানং জিনাতী’’তি.

সব্বে পন গন্ধৰসাদযোপি ৰসা উক্কংসতো দেৱতানং সুধাভোজনৰসোপি সংসাৰৱট্টে পাতেত্ৱা দুক্খানুভৱনস্সেৱ পচ্চযো. যো পনেস সত্ততিংসবোধিপক্খিযধম্মসঙ্খাতো চ নৱলোকুত্তৰধম্মসঙ্খাতো চ ধম্মৰসো, অযমেৱ সব্বৰসানং সেট্ঠো. তেন ৱুত্তং – ‘‘সব্বৰসং ধম্মৰসো জিনাতী’’তি. যাপেসা পুত্তৰতিধীতুৰতিধনৰতিইত্থিৰতিনচ্চগীতৱাদিতাদিৰতিপভেদা চ অনেকপ্পভেদা ৰতী, সাপি সংসাৰৱট্টে পাতেত্ৱা দুক্খানুভৱনস্সেৱ পচ্চযো. যা পনেসা ধম্মং কথেন্তস্স ৱা সুণন্তস্স ৱা ৱাচেন্তস্স ৱা অন্তো উপ্পজ্জমানা পীতি উদগ্গভাৱং জনেতি, অস্সূনি পৱত্তেতি, লোমহংসং জনেতি, সাযং সংসাৰৱট্টস্স অন্তং কত্ৱা অৰহত্তপৰিযোসানা হোতি. তস্মা সব্বৰতীনং এৱৰূপা ধম্মৰতিযেৱ সেট্ঠা. তেন ৱুত্তং – ‘‘সব্বৰতিং ধম্মৰতি জিনাতী’’তি তণ্হক্খযো পন তণ্হায খযন্তে উপ্পন্নং অৰহত্তং সকলস্সপি ৱট্টদুক্খস্স অভিভৱনতো সব্বসেট্ঠমেৱ. তেন ৱুত্তং – ‘‘তণ্হক্খযো সব্বদুক্খং জিনাতী’’তি.

এৱং সত্থৰি ইমিস্সা গাথায অত্থং কথেন্তেযেৱ চতুৰাসীতিযা পাণসহস্সানং ধম্মাভিসমযো অহোসি. সক্কোপি সত্থু ধম্মকথং সুত্ৱা সত্থাৰং ৱন্দিত্ৱা এৱমাহ – ‘‘ভন্তে, এৱংজেট্ঠকে নাম ধম্মদানে কিমত্থং অম্হাকং পত্তিং ন দাপেথ, ইতো পট্ঠায নো ভিক্খুসঙ্ঘস্স কথেত্ৱা পত্তিং দাপেথ, ভন্তে’’তি. সত্থা তস্স ৱচনং সুত্ৱা ভিক্খুসঙ্ঘং সন্নিপাতেত্ৱা, ‘‘ভিক্খৱে, অজ্জাদিং কত্ৱা মহাধম্মস্সৱনং ৱা পাকতিকধম্মস্সৱনং ৱা উপনিসিন্নকথং ৱা অন্তমসো অনুমোদনম্পি কথেত্ৱা সব্বসত্তানং পত্তিং দদেয্যাথা’’তি আহ.

সক্কপঞ্হৱত্থু দসমং.