৩. ৱগ্গুমুদাতীৰিযভিক্খুৱত্থু

সেয্যো অযোগুড়োতি ইমং ধম্মদেসনং সত্থা ৱেসালিং উপনিস্সায মহাৱনে ৱিহৰন্তো ৱগ্গুমুদাতীৰিযে ভিক্খূ আৰব্ভ কথেসি. ৱত্থু উত্তৰিমনুস্সধম্মপাৰাজিকে (পাৰা. ১৯৩ আদযো) আগতমেৱ.

তদা হি সত্থা তে ভিক্খূ ‘‘কিং পন তুম্হে, ভিক্খৱে, উদৰস্সত্থায গিহীনং অঞ্ঞমঞ্ঞস্স উত্তৰিমনুস্সধম্মস্স ৱণ্ণং ভাসিত্থা’’তি ৱত্ৱা তেহি ‘‘আম, ভন্তে’’তি ৱুত্তে তে ভিক্খূ অনেকপৰিযাযেন গৰহিত্ৱা ইমং গাথমাহ –

৩০৮. ‘‘সেয্যো অযোগুড়ো ভুত্তো, তত্তো অগ্গিসিখূপমো;

যঞ্চে ভুঞ্জেয্য দুস্সীলো, ৰট্ঠপিণ্ডমসঞ্ঞতো’’তি.

তত্থ যঞ্চে ভুঞ্জেয্যাতি যং দুস্সীলো নিস্সীলপুগ্গলো কাযাদীহি অসঞ্ঞতো ৰট্ঠৱাসীহি সদ্ধায দিন্নং ৰট্ঠপিণ্ডং ‘‘সমণোম্হী’’তি পটিজানন্তো গহেত্ৱা ভুঞ্জেয্য, তত্তো আদিত্তো অগ্গিৱণ্ণো অযোগুড়োৱ ভুত্তো সেয্যো সুন্দৰতৰো. কিং কাৰণা? তপ্পচ্চযা হি একোৱ অত্তভাৱো ঝাযেয্য, দুস্সীলো পন সদ্ধাদেয্যং ভুঞ্জিত্ৱা অনেকানিপি জাতিসতানি নিৰযে পচ্চেয্যাতি অত্থো.

দেসনাৱসানে বহূ সোতাপত্তিফলাদীনি পাপুণিংসূতি.

ৱগ্গুমুদাতীৰিযভিক্খুৱত্থু ততিযং.