১২. সুভদ্দপৰিব্বাজকৱত্থু

আকাসেতি ইদং ধম্মদেসনং সত্থা কুসিনাৰাযং উপৱত্তনে মল্লানং সালৱনে পৰিনিব্বানমঞ্চকে নিপন্নো সুভদ্দং পৰিব্বাজকং আৰব্ভ কথেসি.

সো কিৰ অতীতে কনিট্ঠভাতৰি একস্মিং সস্সে নৱক্খত্তুং অগ্গদানং দেন্তে দানং দাতুং অনিচ্ছন্তো ওসক্কিত্ৱা অৱসানে অদাসি. তস্মা পঠমবোধিযম্পি মজ্ঝিমবোধিযম্পি সত্থাৰং দট্ঠুং নালত্থ. পচ্ছিমবোধিযং পন সত্থু পৰিনিব্বানকালে ‘‘অহং তীসু পঞ্হেসু অত্তনো কঙ্খং মহল্লকে পৰিব্বাজকে পুচ্ছিত্ৱা সমণং গোতমং ‘দহৰো’তি সঞ্ঞায ন পুচ্ছিং, তস্স চ দানি পৰিনিব্বানকালো, পচ্ছা মে সমণস্স গোতমস্স অপুচ্ছিতকাৰণা ৱিপ্পটিসাৰো উপ্পজ্জেয্যা’’তি সত্থাৰং উপসঙ্কমিত্ৱা আনন্দত্থেৰেন নিৱাৰিযমানোপি সত্থাৰা ওকাসং কত্ৱা, ‘‘আনন্দ, মা সুভদ্দং নিৱাৰযি, পুচ্ছতু মং পঞ্হ’’ন্তি ৱুত্তে অন্তোসাণিং পৱিসিত্ৱা হেট্ঠামঞ্চকে নিসিন্নো, ‘‘ভো সমণ, কিং নু খো আকাসে পদং নাম অত্থি, ইতো বহিদ্ধা সমণো নাম অত্থি, সঙ্খাৰা সস্সতা নাম অত্থী’’তি ইমে পঞ্হে পুচ্ছি. অথস্স সত্থা তেসং অভাৱং আচিক্খন্তো ইমাহি গাথাহি ধম্মং দেসেসি –

২৫৪. ‘‘আকাসেৱ পদং নত্থি, সমণো নত্থি বাহিৰে;

পপঞ্চাভিৰতা পজা, নিপ্পপঞ্চা তথাগতা.

২৫৫. ‘‘আকাসেৱ পদং নত্থি, সমণো নত্থি বাহিৰে;

সঙ্খাৰা সস্সতা নত্থি, নত্থি বুদ্ধানমিঞ্জিত’’ন্তি.

তত্থ পদন্তি ইমস্মিং আকাসে ৱণ্ণসণ্ঠানৱসেন এৱৰূপন্তি পঞ্ঞাপেতব্বং কস্সচি পদং নাম নত্থি. বাহিৰেতি মম সাসনতো বহিদ্ধা মগ্গফলট্ঠো সমণো নাম নত্থি. পজাতি অযং সত্তলোকসঙ্খাতা পজা তণ্হাদীসু পপঞ্চেসুযেৱাভিৰতা. নিপ্পপঞ্চাতি বোধিমূলেযেৱ সব্বপপঞ্চানং সমুচ্ছিন্নত্তা নিপ্পপঞ্চা তথাগতা. সঙ্খাৰাতি পঞ্চক্খন্ধা. তেসু হি একোপি সস্সতো নাম নত্থি. ইঞ্জিতন্তি বুদ্ধানং পন তণ্হামানাদীসু ইঞ্জিতেসু যেন সঙ্খাৰা সস্সতাতি গণ্হেয্য, তং একং ইঞ্জিতম্পি নাম নত্থীতি অত্থো.

দেসনাৱসানে সুভদ্দো অনাগামিফলে পতিট্ঠহি, সম্পত্তপৰিসাযপি সাত্থিকা ধম্মদেসনা অহোসীতি.

সুভদ্দপৰিব্বাজকৱত্থু দ্ৱাদসমং.

মলৱগ্গৱণ্ণনা নিট্ঠিতা.

অট্ঠাৰসমো ৱগ্গো.