১১. উজ্ঝানসঞ্ঞিত্থেৰৱত্থু

পৰৱজ্জানুপস্সিস্সাতি ইমং ধম্মদেসনং সত্থা জেতৱনে ৱিহৰন্তো উজ্ঝানসঞ্ঞিং নাম একং থেৰং আৰব্ভ কথেসি.

সো কিৰ ‘‘অযং এৱং নিৱাসেতি, এৱং পাৰুপতী’’তি ভিক্খূনং অন্তৰমেৱ গৱেসন্তো ৱিচৰতি. ভিক্খূ ‘‘অসুকো নাম, ভন্তে, থেৰো এৱং কৰোতী’’তি সত্থু আৰোচেসুং. সত্থা, ‘‘ভিক্খৱে, ৱত্তসীসে ঠত্ৱা এৱং ওৱদন্তো অননুপৱাদো. যো পন নিচ্চং উজ্ঝানসঞ্ঞিতায পৰেসং অন্তৰং পৰিযেসমানো এৱং ৱত্ৱা ৱিচৰতি, তস্স ঝানাদীসু একোপি ৱিসেসো নুপ্পজ্জতি, কেৱলং আসৱাযেৱ ৱড্ঢন্তী’’তি ৱত্ৱা ইমং গাথমাহ –

২৫৩. ‘‘পৰৱজ্জানুপস্সিস্স, নিচ্চং উজ্ঝানসঞ্ঞিনো;

আসৱা তস্স ৱড্ঢন্তি, আৰা সো আসৱক্খযা’’তি.

তত্থ উজ্ঝানসঞ্ঞিনোতি এৱং নিৱাসেতব্বং এৱং পাৰুপিতব্বন্তি পৰেসং অন্তৰগৱেসিতায উজ্ঝানবহুলস্স পুগ্গলস্স ঝানাদীসু একধম্মোপি ন ৱড্ঢতি, অথ খো আসৱাৱ তস্স ৱড্ঢন্তি. তেনেৱ কাৰণেন সো অৰহত্তমগ্গসঙ্খাতা আসৱক্খযা আৰা দূৰং গতোৱ হোতীতি.

দেসনাৱসানে বহূ সোতাপত্তিফলাদীনি পাপুণিংসূতি.

উজ্ঝানসঞ্ঞিত্থেৰৱত্থু একাদসমং.