৫. অনভিৰতভিক্খুৱত্থু

ন কহাপণৱস্সেনাতি ইমং ধম্মদেসনং সত্থা জেতৱনে ৱিহৰন্তো একং অনভিৰতভিক্খুং আৰব্ভ কথেসি.

সো কিৰ সাসনে পব্বজিত্ৱা লদ্ধূপসম্পদো ‘‘অসুকট্ঠানং নাম গন্ত্ৱা উদ্দেসং উগ্গণ্হাহী’’তি উপজ্ঝাযেন পেসিতো তত্থ অগমাসি. অথস্স পিতুনো ৰোগো উপ্পজ্জি. সো পুত্তং দট্ঠুকামো হুত্ৱা তং পক্কোসিতুং সমত্থং কঞ্চি অলভিত্ৱা পুত্তসোকেন ৱিপ্পলপন্তোযেৱ আসন্নমৰণো হুত্ৱা ‘‘ইদং মে পুত্তস্স পত্তচীৱৰমূলং কৰেয্যাসী’’তি কহাপণসতং কনিট্ঠস্স হত্থে দত্ৱা কালমকাসি. সো দহৰস্স আগতকালে পাদমূলে নিপতিত্ৱা পৱট্টেন্তো ৰোদিত্ৱা, ‘‘ভন্তে, পিতা তে ৱিপ্পলপন্তোৱ কালকতো, ময্হং পন তেন কহাপণসতং হত্থে ঠপিতং, তেন কিং কৰোমী’’তি আহ. দহৰো ‘‘ন মে কহাপণেহি অত্থো’’তি পটিক্খিপিত্ৱা অপৰভাগে চিন্তেসি – ‘‘কিং মে পৰকুলেসু পিণ্ডায চৰিত্ৱা জীৱিতেন, সক্কা তং কহাপণসতং নিস্সায জীৱিতুং, ৱিব্ভমিস্সামী’’তি. সো অনভিৰতিযা পীড়িতো ৱিস্সট্ঠসজ্ঝাযনকম্মট্ঠানো পণ্ডুৰোগী ৱিয অহোসি. অথ নং দহৰসামণেৰা ‘‘কিং ইদ’’ন্তি পুচ্ছিত্ৱা ‘‘উক্কণ্ঠিতোম্হী’’তি ৱুত্তে আচৰিযুপজ্ঝাযানং আচিক্খিংসু. অথ নং তে সত্থু সন্তিকং নেত্ৱা সত্থু দস্সেসুং. সত্থা ‘‘সচ্চং কিৰ ত্ৱং উক্কণ্ঠিতো’’তি পুচ্ছিত্ৱা, ‘‘আম, ভন্তে’’তি ৱুত্তে ‘‘কস্মা এৱমকাসি, অত্থি পন তে কোচি জীৱিতপচ্চযো’’তি আহ. ‘‘আম, ভন্তে’’তি. ‘‘কিং তে অত্থী’’তি? ‘‘কহাপণসতং, ভন্তে’’তি. তেন হি কত্থচি তাৱ সক্খৰা আহৰ, গণেত্ৱা জানিস্সাম ‘‘সক্কা ৱা তাৱত্তকেন জীৱিতুং, নো ৱা’’তি. সো সক্খৰা আহৰি. অথ নং সত্থা আহ – ‘‘পৰিভোগত্থায তাৱ পণ্ণাসং ঠপেহি, দ্ৱিন্নং গোণানং অত্থায চতুৱীসতি, এত্তকং নাম বীজত্থায, যুগনঙ্গলত্থায, কুদ্দালৱাসিফৰসুঅত্থাযা’’তি এৱং গণিযমানে তং কহাপণসতং নপ্পহোতি. অথ নং সত্থা ‘‘ভিক্খু তৱ কহাপণা অপ্পকা, কথং এতে নিস্সায তণ্হং পূৰেস্সসি, অতীতে কিৰ চক্কৱত্তিৰজ্জং কাৰেত্ৱা অপ্ফোটিতমত্তেন দ্ৱাদসযোজনট্ঠানে কটিপ্পমাণেন ৰতনৱস্সং ৱস্সাপেতুং সমত্থো যাৱ ছত্তিংস সক্কা চৱন্তি, এত্তকং কালং দেৱৰজ্জং কাৰেত্ৱাপি মৰণকালে তণ্হং অপূৰেত্ৱাৱ কালমকাসী’’তি ৱত্ৱা তেন যাচিতো অতীতং আহৰিত্ৱা মন্ধাতুজাতকং (জা. ১.৩.২২) ৱিত্থাৰেত্ৱা –

‘‘যাৱতা চন্দিমসূৰিযা পৰিহৰন্তি, দিসা ভন্তি ৱিৰোচনা;

সব্বেৱ দাসা মন্ধাতু, যে পাণা পথৱিস্সিতা’’তি. –

ইমিস্সা গাথায অনন্তৰা ইমা দ্ৱে গাথা অভাসি –

১৮৬. ‘‘ন কহাপণৱস্সেন, তিত্তি কামেসু ৱিজ্জতি;

অপ্পস্সাদা দুখা কামা, ইতি ৱিঞ্ঞায পণ্ডিতো.

১৮৭. ‘‘অপি দিব্বেসু কামেসু, ৰতিং সো নাধিগচ্ছতি;

তণ্হক্খযৰতো হোতি, সম্মাসম্বুদ্ধসাৱকো’’তি.

তত্থ কহাপণৱস্সেনাতি যং সো অপ্ফোটেত্ৱা সত্তৰতনৱস্সং ৱস্সাপেসি, তং ইধ কহাপণৱস্সন্তি ৱুত্তং. তেনপি হি ৱত্থুকামকিলেসকামেসু তিত্তি নাম নত্থি. এৱং দুপ্পূৰা এসা তণ্হা. অপ্পস্সাদাতি সুপিনসদিসতায পৰিত্তসুখা. দুখাতি দুক্খক্খন্ধাদীসু আগতদুক্খৱসেন পন বহুদুক্খাৱ. ইতি ৱিঞ্ঞাযাতি এৱমেতে কামে জানিত্ৱা. অপি দিব্বেসূতি সচে হি দেৱানং উপকপ্পনককামেহি নিমন্তেয্যাপি আযস্মা সমিদ্ধি ৱিয এৱম্পি তেসু কামেসু ৰতিং ন ৱিন্দতিযেৱ. তণ্হক্খযৰতোতি অৰহত্তে চেৱ নিব্বানে চ অভিৰতো হোতি, তং পত্থযমানো ৱিহৰতি. সম্মাসম্বুদ্ধসাৱকোতি সম্মাসম্বুদ্ধেন দেসিতস্স ধম্মস্স সৱনেন জাতো যোগাৱচৰভিক্খূতি.

দেসনাৱসানে সো ভিক্খু সোতাপত্তিফলে পতিট্ঠহি, সম্পত্তপৰিসাযপি সাত্থিকা ধম্মদেসনা অহোসীতি.

অনভিৰতভিক্খুৱত্থু পঞ্চমং.