৩. পঞ্চসতৱিপস্সকভিক্খুৱত্থু

যথা পুব্বুড়কন্তি ইমং ধম্মদেসনং সত্থা জেতৱনে ৱিহৰন্তো পঞ্চসতে ৱিপস্সকে ভিক্খূ আৰব্ভ কথেসি.

তে কিৰ সত্থু সন্তিকে কম্মট্ঠানং গহেত্ৱা অৰঞ্ঞং পৱিসিত্ৱা ঘটেন্তা ৱাযমন্তা অপ্পৱিসেসা ‘‘ৱিসেসেত্ৱা কম্মট্ঠানং গহেস্সামা’’তি সত্থু সন্তিকং আগচ্ছন্তা অন্তৰামগ্গে মৰীচিকম্মট্ঠানং ভাৱেন্তাৱ আগমিংসু. তেসং ৱিহাৰং পৱিট্ঠক্খণেযেৱ দেৱো ৱস্সি. তে তত্থ তত্থ পমুখেসু ঠত্ৱা ধাৰাৱেগেন উট্ঠহিত্ৱা ভিজ্জন্তে পুব্বড়কে দিস্ৱা ‘‘অযম্পি অত্তভাৱো উপ্পজ্জিত্ৱা ভিজ্জনত্থেন পুব্বুড়কসদিসোযেৱা’’তি আৰম্মণং গণ্হিংসু. সত্থা গন্ধকুটিযং নিসিন্নোৱ তে ভিক্খূ ওলোকেত্ৱা তেহি সদ্ধিং কথেন্তো ৱিয ওভাসং ফৰিত্ৱা ইমং গাথমাহ –

১৭০. ‘‘যথা পুব্বুড়কং পস্সে, যথা পস্সে মৰীচিকং;

এৱং লোকং অৱেক্খন্তং, মচ্চুৰাজা ন পস্সতী’’তি.

তত্থ মৰীচিকন্তি মযূখং. তে হি দূৰতোৱ গেহসণ্ঠানাদিৱসেন উপট্ঠিতাপি উপগচ্ছন্তানং অগয্হূপগা ৰিত্তকা তুচ্ছকাৱ. তস্মা যথা উপ্পজ্জিত্ৱা ভিজ্জনত্থেন পুব্বুড়কং ৰিত্ততুচ্ছাদিভাৱেনেৱ পস্সেয্য, এৱং খন্ধাদিলোকং অৱেক্খন্তং মচ্চুৰাজা ন পস্সতীতি অত্থো.

দেসনাৱসানে তে ভিক্খূ ঠিতট্ঠানেযেৱ অৰহত্তং পাপুণিংসূতি.

পঞ্চসতৱিপস্সকভিক্খুৱত্থু ততিযং.