৯. ৱনৱচ্ছত্থেৰঅপদানৱণ্ণনা

নৱমাপদানে ইমম্হি ভদ্দকে কপ্পেতিআদিকং আযস্মতো ৱনৱচ্ছত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো কস্সপস্স ভগৱতো কালে কুলগেহে নিব্বত্তো ৱিঞ্ঞুতং পত্ৱা সত্থু ধম্মদেসনং সুত্ৱা সদ্ধাজাতো পব্বজিত্ৱা পৰিসুদ্ধং ব্ৰহ্মচৰিযং চৰিত্ৱা ততো চুতো দেৱলোকে নিব্বত্তো, ততো চুতো অৰঞ্ঞাযতনে ভিক্খূনং সমীপে কপোতযোনিযং নিব্বত্তো. তেসু মেত্তচিত্তো ধম্মং সুত্ৱা ততো চুতো দেৱমনুস্সেসু সংসৰন্তো ইমস্মিং বুদ্ধুপ্পাদে কপিলৱত্থুস্মিং ব্ৰাহ্মণকুলে নিব্বত্তি. তস্স মাতুকুচ্ছিগতকালেযেৱ মাতু দোহড়ো উদপাদি ৱনে ৱসিতুং ৱনে ৱিজাযিতুং. ততো ইচ্ছানুৰূপৱসেন ৱনে ৱসন্তিযা গব্ভৱুট্ঠানং অহোসি. গব্ভতো নিক্খন্তঞ্চ নং কাসাৱখণ্ডেন পটিগ্গহেসুং. তদা বোধিসত্তস্স উপ্পন্নকালো, ৰাজা তং কুমাৰং আহৰাপেত্ৱা সহেৱ পোসেসি. অথ বোধিসত্তো মহাভিনিক্খমনং নিক্খমিত্ৱা পব্বজিত্ৱা ছব্বসানি দুক্কৰকাৰিকং কত্ৱা বুদ্ধে জাতে সো মহাকস্সপস্স সন্তিকং গন্ত্ৱা তস্সোৱাদে পসন্নো তস্স সন্তিকা বুদ্ধুপ্পাদভাৱং সুত্ৱা সত্থু সন্তিকং গন্ত্ৱা ধম্মং সুত্ৱা পব্বজিত্ৱা নচিৰস্সেৱ ছড়ভিঞ্ঞো অৰহা অহোসি.

২৫১. সো অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ইমম্হি ভদ্দকে কপ্পেতিআদিমাহ. তত্থ ব্ৰহ্মবন্ধু মহাযসোতি এত্থ ব্ৰাহ্মণানং বন্ধু ঞাতকোতি ব্ৰাহ্মণবন্ধূতি ৱত্তব্বে গাথাবন্ধসুখত্থং ‘‘ব্ৰহ্মবন্ধূ’’তি ৱুত্তন্তি ৱেদিতব্বং. লোকত্তযব্যাপকযসত্তা মহাযসো. সেসং সব্বং সুৱিঞ্ঞেয্যমেৱাতি.

ৱনৱচ্ছত্থেৰঅপদানৱণ্ণনা সমত্তা.