১০. চূড়সুগন্ধত্থেৰঅপদানৱণ্ণনা

দসমাপদানে ইমম্হি ভদ্দকে কপ্পেতিআদিকং আযস্মতো সুগন্ধত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো কস্সপসম্মাসম্বুদ্ধকালে বাৰাণসিযং ৱিভৱসম্পন্নে কুলে নিব্বত্তো ৱিঞ্ঞুতং পত্ৱা সত্থু সন্তিকে ধম্মং সুত্ৱা সব্বদা নমস্সমানো মহাদানং দদমানো মাসস্স সত্তক্খত্তুং ভগৱতো গন্ধকুটিযা চতুজ্জাতিগন্ধেন ৱিলিম্পেসি. ‘‘মম নিব্বত্তনিব্বত্তট্ঠানে সৰীৰতো সুগন্ধগন্ধো নিব্বত্ততূ’’তি পত্থনং অকাসি. ভগৱা তং ব্যাকাসি. সো যাৱতাযুকং ঠত্ৱা পুঞ্ঞানি কৰোন্তো ততো চুতো দেৱলোকে নিব্বত্তো কামাৱচৰলোকং সৰীৰগন্ধেন সুগন্ধং কুৰুমানো সুগন্ধদেৱপুত্তোতি পাকটো অহোসি. সো দেৱলোকসম্পত্তিযো অনুভৱিত্ৱা ততো চুতো ইমস্মিং বুদ্ধুপ্পাদে মহাভোগকুলে নিব্বত্তি, তস্স মাতুকুচ্ছিগতস্সেৱ মাতুযা সৰীৰগন্ধেন সকলগেহং সকলনগৰঞ্চ সুগন্ধেন একগন্ধং অহোসি, জাতক্খণে সকলং সাৱত্থিনগৰং সুগন্ধকৰণ্ডকো ৱিয অহোসি, তেনস্স সুগন্ধোতি নামং কৰিংসু. সো ৱুদ্ধিং অগমাসি. তদা সত্থা সাৱত্থিযং পত্ৱা জেতৱনমহাৱিহাৰং পটিগ্গহেসি, তং দিস্ৱা পসন্নমানসো ভগৱতো সন্তিকে পব্বজিত্ৱা নচিৰস্সেৱ সহ পটিসম্ভিদাহি অৰহত্তং পাপুণি. তস্স উপ্পন্নদিৱসতো পট্ঠায যাৱ পৰিনিব্বানা এত্থন্তৰে নিপন্নট্ঠানাদীসু সুগন্ধমেৱ ৱাযি. দেৱাপি দিব্বচুণ্ণদিব্বগন্ধপুপ্ফানি ওকিৰন্তি.

২৭২. সোপি থেৰো অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো ইমম্হি ভদ্দকে কপ্পেতিআদিমাহ. তং সব্বং হেট্ঠা ৱুত্তনযত্তা উত্তানত্থত্তা চ সুৱিঞ্ঞেয্যমেৱ, কেৱলং পুঞ্ঞনানত্তং নামনানত্তঞ্চ ৱিসেসো.

চূড়সুগন্ধত্থেৰঅপদানৱণ্ণনা সমত্তা.

পঞ্চপঞ্ঞাসমৱগ্গৱণ্ণনা সমত্তা.