৮. লোমসকঙ্গিযত্থেৰঅপদানৱণ্ণনা

অট্ঠমাপদানে ইমম্হি ভদ্দকে কপ্পেতিআদিকং আযস্মতো লোমসকঙ্গিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো কস্সপস্স ভগৱতো কালে ব্ৰাহ্মণকুলে নিব্বত্তো সদ্ধো পসন্নো অহোসি. অপৰো চন্দনো নাম তস্স সহাযো চাসি. তে দ্ৱেপি সত্থু সন্তিকে ধম্মং সুত্ৱা পসন্নমানসা পব্বজিত্ৱা যাৱজীৱং সীলং ৰক্খিত্ৱা সুপৰিসুদ্ধসীলা ততো চুতা দেৱলোকে নিব্বত্তিত্ৱা একং বুদ্ধন্তৰং দিব্বসুখং অনুভৱিংসু. তেসু অযং ইমস্মিং বুদ্ধুপ্পাদে সাকিযকুলে নিব্বত্তিত্ৱা অপৰো চন্দনো দেৱপুত্তো হুত্ৱা তাৱতিংসভৱনে নিব্বত্তি. অথ সো সক্যকুলপ্পসাদকেন কাড়ুদাযিনা আৰাধিতেন ভগৱতা সক্যৰাজূনং মানমদ্দনায কতং ৱেস্সন্তৰধম্মদেসনাযং (জা. ২.২২.১৬৫৫ আদযো) পোক্খৰৱস্সইদ্ধিপাটিহাৰিযং দিস্ৱা পসন্নমানসো পব্বজিত্ৱা মজ্ঝিমনিকাযে ৱুত্তং ভদ্দেকৰত্তসুত্তন্তদেসনং সুত্ৱা অৰঞ্ঞৱাসং ৱসন্তো ভদ্দেকৰত্তসুত্তন্তদেসনানুসাসনং (ম. নি. ৩.২৮৬ আদযো) সৰিত্ৱা তদনুসাৰেন ঞাণং পেসেত্ৱা কম্মট্ঠানং মনসি কৰিত্ৱা অৰহত্তং পাপুণি.

২২৫. অৰহত্তং পত্ৱা অত্তনো পুব্বকম্মং সৰিত্ৱা সঞ্জাতসোমনস্সো পুব্বচৰিতাপদানং পকাসেন্তো ইমম্হি ভদ্দকে কপ্পেতিআদিমাহ. তত্থ কপ্পো তাৱ চতুব্বিধো – সাৰকপ্পো, ৱৰকপ্পো, মণ্ডকপ্পো, ভদ্দকপ্পোতি. তেসু যস্মিং কপ্পে একো বুদ্ধো উপ্পজ্জতি, অযং সাৰকপ্পো নাম. যস্মিং দ্ৱে ৱা তযো ৱা বুদ্ধা উপ্পজ্জন্তি, অযং ৱৰকপ্পো নাম. যস্মিং চত্তাৰো বুদ্ধা উপ্পজ্জন্তি, অযং মণ্ডকপ্পো নাম. যস্মিং পঞ্চ বুদ্ধা উপ্পজ্জন্তি, অযং ভদ্দকপ্পো নাম. অঞ্ঞত্থ পন –

‘‘সাৰকপ্পো মণ্ডকপ্পো, সাৰমণ্ডকপ্পো তথা;

ৱৰকপ্পো ভদ্দকপ্পো, কপ্পা পঞ্চৱিধা সিযুং.

‘‘একো দ্ৱে তযো চত্তাৰো, পঞ্চ বুদ্ধা যথাক্কমং;

এতেসু পঞ্চকপ্পেসু, উপ্পজ্জন্তি ৱিনাযকা’’তি. –

এৱং পঞ্চ কপ্পা ৱুত্তা. তেসু অযং কপ্পো ‘‘ককুসন্ধো কোণাগমনো কস্সপো গোতমো মেত্তেয্যো’’তি পঞ্চবুদ্ধপটিমণ্ডিতত্তা ভদ্দকপ্পো নাম জাতো.

তস্মা ইমস্মিং ভদ্দকপ্পম্হি কস্সপো নাযকো উপ্পজ্জীতি সম্বন্ধো. সেসং উত্তানত্থমেৱাতি.

লোমসকঙ্গিযত্থেৰঅপদানৱণ্ণনা সমত্তা.