৭. অভযত্থেৰঅপদানৱণ্ণনা

সত্তমাপদানে পদুমুত্তৰো নাম জিনোতিআদিকং আযস্মতো অভযত্থেৰস্স অপদানং. অযম্পি পুৰিমজিনৱৰেসু কতাধিকাৰো তত্থ তত্থ ভৱে ৱিপট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে হংসৱতীনগৰে ব্ৰাহ্মণকুলে নিব্বত্তো. সো ৱুদ্ধিমন্ৱায ৱেদঙ্গপাৰগো সকপৰসমযকুসলো একদিৱসং সত্থু ধম্মদেসনং সুত্ৱা পসন্নমানসো ভগৱন্তং গাথাহি থোমেসি. সো তত্থ যাৱতাযুকং ঠত্ৱা পুঞ্ঞানি কত্ৱা ততো চুতো দেৱলোকে নিব্বত্তো অপৰাপৰং সুগতীসুযেৱং সংসৰন্তো ইমস্মিং বুদ্ধুপ্পাদে ৰাজগহে বিম্বিসাৰৰঞ্ঞো পুত্তো হুত্ৱা নিব্বত্তি, অভযোত্ৱেৱস্স নামং কৰিংসু. সো ৱযপ্পত্তো নিগণ্ঠেহি সদ্ধিং ৱিস্সাসিকো হুত্ৱা চৰন্তো একদিৱসং নিগণ্ঠেন নাটপুত্তেন সত্থু ৱাদাৰোপনত্থায পেসিতো নিপুণপঞ্হং পুচ্ছিত্ৱা নিপুণব্যাকৰণং সুত্ৱা পসন্নো সত্থু সন্তিকে পব্বজিত্ৱা কম্মট্ঠানানুৰূপং ঞাণং পেসেত্ৱা নচিৰস্সেৱ অৰহত্তং পাপুণি.

১৯৫. সো অৰহত্তং পত্ৱা অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো পদুমুত্তৰো নাম জিনোতিআদিমাহ. তং সব্বং সুৱিঞ্ঞেয্যমেৱাতি.

অভযত্থেৰঅপদানৱণ্ণনা সমত্তা.