৩. মহাকচ্চানত্থেৰঅপদানৱণ্ণনা

পদুমুত্তৰনাথস্সাতিআদিকং আযস্মতো কচ্চানত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে গহপতিমহাসালকুলগেহে নিব্বত্তেত্ৱা ৱুদ্ধিপ্পত্তো একদিৱসং সত্থু সন্তিকে ধম্মং সুণন্তো সত্থাৰং একং ভিক্খুং সংখিত্তেন ভাসিতস্স ৱিত্থাৰেন অত্থং ৱিভজন্তানং অগ্গট্ঠানে ঠপেন্তং দিস্ৱা সযম্পি তং ঠানন্তৰং পত্থেন্তো দানাদীনি পুঞ্ঞানি কত্ৱা দেৱমনুস্সেসু সংসৰন্তো সুমেধস্স ভগৱতো কালে ৱিজ্জাধৰো হুত্ৱা আকাসেন গচ্ছন্তো সত্থাৰং একস্মিং ৱনসণ্ডে নিসিন্নং দিস্ৱা পসন্নমানসো কণিকাৰপুপ্ফেহি পূজং অকাসি.

সো তেন পুঞ্ঞকম্মেন অপৰাপৰং সুগতীসুযেৱ পৰিৱত্তেত্ৱা কস্সপদসবলস্স কালে বাৰাণসিযং কুলঘৰে নিব্বত্তিত্ৱা পৰিনিব্বুতে ভগৱতি সুৱণ্ণচেতিযকৰণট্ঠানং দসসহস্সগ্ঘনিকায সুৱণ্ণিট্ঠকায পূজং কত্ৱা ‘‘ভগৱা ময্হং নিব্বত্তনিব্বত্তট্ঠানে সৰীৰং সুৱণ্ণৱণ্ণং হোতূ’’তি পত্থৰং অকাসি. ততো যাৱজীৱং কুসলং কত্ৱা একং বুদ্ধন্তৰং দেৱমনুস্সেসু সংসৰিত্ৱা ইমস্মিং বুদ্ধুপ্পাদে উজ্জেনিযং ৰঞ্ঞো চণ্ডপজ্জোতস্স পুৰোহিতস্স গেহে নিব্বত্তি, তস্স নামগ্গহণদিৱসে মাতাপিতৰো ‘‘অম্হাকং পুত্তো সুৱণ্ণৱণ্ণো অত্তনো নামং গহেত্ৱা আগতো’’তি কঞ্চনমাণৱোত্ৱেৱ নামং কৰিংসু. সো ৱুদ্ধিমন্ৱায তযো ৱেদে উগ্গণ্হিত্ৱা পিতু অচ্চযেন পুৰোহিতট্ঠানং লভি. সো গোত্তৱসেন কচ্চানোতি পঞ্ঞাযিত্থ.

ৰাজা চণ্ডপজ্জোতো বুদ্ধুপ্পাদং সুত্ৱা, ‘‘আচৰিয, ত্ৱং তত্থ গন্ত্ৱা সত্থাৰং ইধানেহী’’তি পেসেসি. সো অত্তট্ঠমো সত্থু সন্তিকং উপগতো. তস্স সত্থা ধম্মং দেসেসি. দেসনাপৰিযোসানে সো সত্তহি জনেহি সদ্ধিং সহপটিসম্ভিদাহি অৰহত্তে পতিট্ঠাসি. অথ সত্থা ‘‘এথ, ভিক্খৱো’’তি হত্থং পসাৰেসি. তে তাৱদেৱ দ্ৱঙ্গুলমত্তকেসমস্সুকা ইদ্ধিমযপত্তচীৱৰধৰা ৱস্সসট্ঠিকত্থেৰা ৱিয অহেসুং. এৱং থেৰো সদত্থং নিপ্ফাদেত্ৱা, ‘‘ভন্তে, ৰাজা পজ্জোতো তুম্হাকং পাদে ৱন্দিতুং ধম্মঞ্চ সোতুং ইচ্ছতী’’তি সত্থু আৰোচেসি. সত্থা ‘‘ত্ৱংযেৱ ভিক্খু তত্থ গচ্ছ, তযি গতেপি ৰাজা পসীদিস্সতী’’তি আহ. থেৰো অত্তট্ঠমো তত্থ গন্ত্ৱা ৰাজানং পসাদেত্ৱা অৱন্তীসু সাসনং পতিট্ঠাপেত্ৱা পুন সত্থু সন্তিকমেৱ গতো.

৩১. এৱং সো পত্তঅৰহত্তফলো ‘‘এতদগ্গং, ভিক্খৱে, মম সাৱকানং সংখিত্তেন ভাসিতস্স ৱিত্থাৰেন অত্থং ৱিভজন্তানং যদিদং মহাকচ্চানো’’তি (অ. নি. ১.১৮৮, ১৯৭) এতদগ্গট্ঠানং পত্ৱা অত্তনো পুব্বকম্মং সৰিত্ৱা পুব্বচৰিতাপদানং পকাসেন্তো পদুমুত্তৰনাথস্সাতিআদিমাহ. তত্থ পদুমং নাম চেতিযন্তি পদুমেহি ছাদিতত্তা ৱা পদুমাকাৰেহি কতত্তা ৱা ভগৱতো ৱসনগন্ধকুটিৱিহাৰোৱ পূজনীযভাৱেন চেতিযং, যথা ‘‘গোতমকচেতিযং, আড়ৱকচেতিয’’ন্তি ৱুত্তে তেসং যক্খানং নিৱসনট্ঠানং পূজনীযট্ঠানত্তা চেতিযন্তি ৱুচ্চতি, এৱমিদং ভগৱতো ৱসনট্ঠানং চেতিযন্তি ৱুচ্চতি, ন ধাতুনিধাযকচেতিযন্তি ৱেদিতব্বং. ন হি অপৰিনিব্বুতস্স ভগৱতো সৰীৰধাতূনং অভাৱা ধাতুচেতিযং অকৰি. সিলাসনং কাৰযিত্ৱাতি তস্সা পদুমনামিকায গন্ধকুটিযা পুপ্ফাধাৰত্থায হেট্ঠা ফলিকমযং সিলাসনং কাৰেত্ৱা. সুৱণ্ণেনাভিলেপযিন্তি তং সিলাসনং জম্বোনদসুৱণ্ণেন অভিৱিসেসেন লেপযিং ছাদেসিন্তি অত্থো.

৩২. ৰতনামযং সত্তহি ৰতনেহি কতং ছত্তং পগ্গয্হ মুদ্ধনি ধাৰেত্ৱা ৱাড়বীজনিঞ্চ সেতপৱৰচামৰিঞ্চ পগ্গয্হ বুদ্ধস্স অভিৰোপযিং. লোকবন্ধুস্স তাদিনোতি সকললোকবন্ধুসদিসস্স তাদিগুণসমঙ্গিস্স বুদ্ধস্স ধাৰেসিন্তি অত্থো. সেসং উত্তানত্থমেৱাতি.

মহাকচ্চানত্থেৰঅপদানৱণ্ণনা সমত্তা.