২. সাগতত্থেৰঅপদানৱণ্ণনা

সোভিতো নাম নামেনাতিআদিকং আযস্মতো সাগতত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে একস্মিং ব্ৰাহ্মণকুলে নিব্বত্তো সব্বসিপ্পেসু নিপ্ফত্তিং পত্তো নামেন সোভিতো নাম হুত্ৱা তিণ্ণং ৱেদানং পাৰগূ সনিঘণ্ডুকেটুভানং সাক্খৰপ্পভেদানং ইতিহাসপঞ্চমানং পদকো ৱেয্যাকৰণো লোকাযতমহাপুৰিসলক্খণেসু অনৱযো. সো একদিৱসং পদুমুত্তৰং ভগৱন্তং দ্ৱত্তিংসমহাপুৰিসলক্খণসিৰিযা সোভমানং উয্যানদ্ৱাৰেন গচ্ছন্তং দিস্ৱা অতীৱ পসন্নমানসো অনেকেহি উপাযেহি অনেকেহি গুণৱণ্ণেহি থোমনং অকাসি. ভগৱা তস্স থোমনং সুত্ৱা ‘‘অনাগতে গোতমস্স ভগৱতো সাসনে সাগতো নাম সাৱকো ভৱিস্সতী’’তি ব্যাকৰণং অদাসি. সো ততো পট্ঠায পুঞ্ঞানি কৰোন্তো যাৱতাযুকং ঠত্ৱা ততো চুতো দেৱলোকে নিব্বত্তো. কপ্পসতসহস্সদেৱমনুস্সেসু উভযসম্পত্তিযো অনুভৱিত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো. তস্স মাতাপিতৰো সোমনস্সং ৱড্ঢেন্তো সুজাতো আগতোতি সাগতোতি নামং কৰিংসু. সো সাসনে পসীদিত্ৱা পব্বজিত্ৱা ৱিপস্সনং ৱড্ঢেত্ৱা অৰহত্তং পত্তো.

১৭. এৱং সো পুঞ্ঞসম্ভাৰানুৰূপেন পত্তঅৰহত্তফলো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো সোভিতো নাম নামেনাতিআদিমাহ. তত্থ তদা পুঞ্ঞসম্ভাৰস্স পৰিপূৰণসমযে নামেন সোভিতো নাম ব্ৰাহ্মণো অহোসিন্তি সম্বন্ধো.

২১. ৱিপথা উদ্ধৰিত্ৱানাতি ৱিৰুদ্ধপথা কুমগ্গা, উপ্পথা ৱা উদ্ধৰিত্ৱা অপনেত্ৱা. পথং আচিক্খসেতি, ভন্তে, সব্বঞ্ঞু তুৱং পথং সপ্পুৰিসমগ্গং নিব্বানাধিগমনুপাযং আচিক্খসে কথেসি দেসেসি ৱিভজি উত্তানিং অকাসীতি অত্থো. সেসং উত্তানত্থমেৱাতি.

সাগতত্থেৰঅপদানৱণ্ণনা সমত্তা.