৯. একঞ্জলিকত্থেৰঅপদানৱণ্ণনা

সুৱণ্ণৱণ্ণন্তিআদিকং আযস্মতো একঞ্জলিকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং কুলগেহে নিব্বত্তো ৱিঞ্ঞুতং পত্তো ৰতনত্তযে পসন্নো পিণ্ডায চৰন্তং ৱিপস্সিং ভগৱন্তং দিস্ৱা পসন্নমানসো অঞ্জলিং পগ্গহেত্ৱা অট্ঠাসি. সো তেন পুঞ্ঞকম্মেন দেৱমনুস্সেসু সংসৰন্তো সব্বত্থ পূজনীযো হুত্ৱা উভযসম্পত্তিযো অনুভৱিত্ৱা ইমস্মিং বুদ্ধুপ্পাদে ৱিভৱসম্পন্নে কুলে নিব্বত্তিত্ৱা সাসনে পসীদিত্ৱা পব্বজিত্ৱা ৱিপস্সনং ৱড্ঢেত্ৱা অৰহত্তে পতিট্ঠাসি. পুব্বে কতপুঞ্ঞৱসেন একঞ্জলিকত্থেৰোতি পাকটো.

১৮০. সো অত্তনো পুব্বকম্মং সৰিত্ৱা তং হত্থতলে আমলকং ৱিয দিস্ৱা উদানৱসেন পুব্বচৰিতাপদানং পকাসেন্তো সুৱণ্ণৱণ্ণন্তিআদিমাহ. ৱিপস্সিং সত্থৱাহগ্গন্তি ৱাণিজে কন্তাৰা ৱহতি তাৰেতীতি সত্থৱাহো. ৱাড়কন্তাৰা চোড়কন্তাৰা দুব্ভিক্খকন্তাৰা নিৰুদককন্তাৰা যক্খকন্তাৰা অপ্পভক্খকন্তাৰা চ তাৰেতি উত্তাৰেতি পতাৰেতি নিত্তাৰেতি খেমন্তভূমিং পাপেতীতি অত্থো. কো সো? ৱাণিজজেট্ঠকো. সত্থৱাহসদিসত্তা অযম্পি ভগৱা সত্থৱাহো. তথা হি সো তিৱিধং বোধিং পত্থযন্তে কতপুঞ্ঞসম্ভাৰে সত্তে জাতিকন্তাৰা জৰাকন্তাৰা ব্যাধিকন্তাৰা মৰণকন্তাৰা সোকপৰিদেৱদুক্খদোমনস্সুপাযাসকন্তাৰা চ সব্বস্মা সংসাৰকন্তাৰা চ তাৰেতি উত্তাৰেতি পতাৰেতি নিত্তাৰেতি নিব্বানথলং পাপেতীতি অত্থো. সত্থৱাহো চ সো অগ্গো সেট্ঠো পধানো চাতি সত্থৱাহগ্গো, তং সত্থৱাহগ্গং ৱিপস্সিং সম্বুদ্ধন্তি সম্বন্ধো. নৰৱৰং ৱিনাযকন্তি নৰানং অন্তৰে অসিথিলপৰক্কমোতি নৰৱীৰো, তং. ৱিসেসেন কতপুঞ্ঞসম্ভাৰে সত্তে নেতি নিব্বানপুৰং পাপেতীতি ৱিনাযকো, তং.

১৮১. অদন্তদমনং তাদিন্তি ৰাগদোসমোহাদিকিলেসসম্পযুত্তত্তা কাযৱচীমনোদ্ৱাৰেহি অদন্তে সত্তে দমেতীতি অদন্তদমনো, তং. ইট্ঠানিট্ঠেসু অকম্পিযতাদিগুণযুত্তোতি তাদী, তং. মহাৱাদিং মহামতিন্তি সকসমযপৰসমযৱাদীনং অন্তৰে অত্তনা সমধিকপুগ্গলৱিৰহিতত্তা মহাৱাদী, মহতী পথৱিসমানা মেৰুসমানা চ মতি যস্স সো মহামতি, তং মহাৱাদিং মহামতিং সম্বুদ্ধন্তি ইমিনা তুল্যাধিকৰণং. সেসং সুৱিঞ্ঞেয্যমেৱাতি.

একঞ্জলিকত্থেৰঅপদানৱণ্ণনা সমত্তা.